Ажәабжьқәа

Популярное

Аҟәа ақалақь аҿы Аиааира аинралцәа – Сулҭан Сосналиеви Сергеи Дбари рбаҟақәа аартра иазкыз ацеремониа мҩаҧысит

90
30.09.2017 13:23
Аҟәа ақалақь аҿы Аиааира аинралцәа – Сулҭан Сосналиеви Сергеи Дбари рбаҟақәа аартра иазкыз ацеремониа мҩаҧысит
Аҟәа Ахьӡ-Аҧша апарак аҿы Аиааира аинралцәа – Сулҭан Сосналиеви Сергеи Дбари рбаҟақәа аартра иазкыз ацеремониа мҩаҧысит.

Аҟәа. Цәыббрамза 30. Аҧсныпресс. Аҟәа ақалақь Ахьӡ-Аҧша апарк аҿы Леон иорден занашьоу, аорден “Ахьӡ-Аҧша” I аҩаӡара акавалерцәа, аинрал -леитенант цәа Сулҭан Сосналиеви Сергеи Дбари рбаҟақәа раартра иазкыз ацеремониа мҩаҧысит.



Иарбоу аусмҩаҧгатә аҿы Аҳәынҭқарра Ахада ихаҭыҧуаҩ Витали Габниа еизаз зегьы Аиааира Амшныҳәа рыдиныҳәалеит: 

“25 шықәса рыҧхьа Қырҭтәыла ҳажәлар рықәхра хықәкыс иҟаҵаны аибашьра хацнаркит. Нанҳәамза 14 ауха, 1992 шықәсазы Қырҭтәыла Аҳәынҭсовет ар Аҧсны атерриториа иалалеит. Нанҳәамза 14 рзы Иреиҳаӡоу Асовет ахантәаҩы Владислав Арӡынба ателехәаҧшрала иуаажәлар рахь аҧсадгьыл ахьчаразы иҩагыларц азы ааҧхьара ҟаиҵеит. 
Усҟан, 1992-тәи ашықәс азы, ҳхи-ҳаҧси, ҳҭаацәеи ҳныхабаақәеи рыхьчара азы  хгылару, мамзаргьы аҕа иҿаҧхьа ҳхы лаҳарҟәру ҳәа азҵаара ықәгылан. Ҳара  5-миллион ҩык рҟынӡа инаӡо Қырҭтәыла ар ҳаҿагылеит, ҳамчқәа шеиҟармызгьы, аиааира агара ҳҽазаҳшәон. Абарт иуадаҩӡаз аибашьра раҧхьаӡатәи амшқәа рзы ауп хатәгәаҧхарала нхыҵи-аахыҵи ҳашьцәа анҳавагыла. Урҭ усҟан иҳарҭаз адгылара ҳгәы шьҭнахит, еиҳагы ҳамчқәа еизнагеит, агәыҕра ҳгәаҵаҿы иҧхеи-ҧхеиуа иааҭанаҵеит. Усҟан ҳара иҳауз адгылара иахьагьы уашьҭангьы ахә ашьара уадаҩхоит.

Қырҭтәыла аганахьала иаҳҿагылеит хатәгәаҧхарала иааны қырҭтәылатәи аруаа ирыцеибашьуаз амилаҭеилыхра иадгылоз украинатәи аибашьцәа. Аҧсны аганахьала аибашьра раҧхьаӡатәи амшқәа инадыркны аиашьаратә цхыраара аҭара иаҿын Нхыҵ-Кавказтәи ашьхарыуаа жәлар Рконфедерациа. Нхыҵ-Ккавказ ареспубликақәа зегьы рҟынтәи ашьха акаҵәарақәа ирхысны Аҧсныҟа рашьцәа ирывагыларц иаауан ҳашьцәа: џьоукы аӡәа-ӡәала иаауан, даҽа џьоукыз гәыҧ-гәыҧла. Анаҩс урҭ  иаҧырҵоз аиҿкаарақәа аҿиара иаҿыз арбџьармчқәа ирылалон. Ацхырааразы иҩагылеит Ҭырқәтәыла, Шьамтәыла, егьырҭ аҳәаанырцәтәи атәылақәа рҿы инхоз аҧсуа диаспора ахаҭарнакцәа, Приднестровие атәылауаа, Алада Урыстәыла аҟынтәи аказакцәа, уҳәа ирацәаҩны Аҧсны аҧеиҧш згәы иҵхоз зегьы. Ҳара еилаҳкааит ҳхала ҳшыҟам, ҳашьцәа шҳавагыло, уи иаанагозгьы Аиааира ҳара хымҧада иаҳгоит ҳәа ауп.

413 мшы ицоз аибашьра аҿы, цәыббрамза 28  – ҭоурыхтә рыцхуп.  Ари амш аҽны Мрагыларатәии Мраҭашәаратәи афронтқәа реиқәшәара ҟалеит. Аҧсны аҳҭнықалақь Аҟәа ахақәиҭтәра Амш ҳара иаагаз Аиааира иасимволны иҟалеит, уи ашьҭахь аҕа шьҭахьҟа дхьаҵуа мацара Аҧсны далымҵыр ада ҧсыхәа имоуӡеит. Егры, Аҧсни Қырҭтәылеи ирыбжьоу аҳәынҭқарратә ҳәаа аҿы иахашәыршәырит Аҧсны Абираҟ!

Иахьа, 24 шықәса рышьҭахь, ҳара Ахьӡ-Аҧша Амемориал аҧҿьа ҳгылоуп. Араҟа иахьа-уажәраанӡагьы хабарда ибжьаӡыз ҳҩызцәа рхаҭара ашьақәыргыларазы аҭҵаара-еилкааратә аусмҩаҧгатәқәа мҩаҧыргоит. Иахьа, ҳара иаҳгәалаҳаршәоит иҳацәҭахаз ҳҩызцәа. Урҭ ргәалашәара ҳгәаҵаҿы наунагӡа иаанхоит!



Иахьа ҳара Аҧсны жәлар Рџьынџьтәылатәи еибашьра афырхацәа, иаагаз Аиааира иасимволны иҟалаз: хатәгәаҧхарала Аҧсны ахьчразы зегьы раҧхьаӡа игылаз иреиуоу, Аҧсны Аҳәынҭқарра атәылахьчара актәи аминистр, аинрал-леитенант Сулҭан Асламбек-иҧа Сосналиев, Аҧсни Асовет еидгылеи  рырратә наҧхгаҩы, аҧсуа жәлар аҵеи иаша, аинрал-леитенант Сергеи Платон-иҧа Дбар ргәалашәара анаунагӡара иазкны рбаҟақәа ааҳартуеит. Аҧсны ахақәиҭреи ахьыҧшымреи рзы зхы ақәызҵаз зегьы ргәалашәара наунанагӡа ҳгәаҵаҿы иаанхоит. Нагӡара ақәзааит ҳхьыҧшымра!"  – ҳәа иҳәеит Витали Габниа.


 
Аҧсны Афырхаҵа иҧшәмаҧҳәыс Лиубовь Сосналиева  Аҧсны ауааҧсыра Аиааира Амш рыдылныҳәалеит: Зегьы аҭынчреи аизҳазыҕьареи шәзеиҕьасшьоит, ишәҭыкакаҷааит ҳ-Аҧсны ҧшӡа, ачҳареи ахшыҩи, усҟан, аибашьра аамҭа азы еиҧш иахьагьы аӡәк еиҧш аҟазаара анцәа иҳаҭәеишьааит”.



Лиубовь Сосналиева, Ахьӡ-Аҧша апарк аҿы иргылахаз амемориали абаҟақәеи Аиааира ахьӡала иҟаҵаз асимволра азнауеит ҳәа иазгәалҭеит. “Урҭ ихьыҧшым Аҧсны ахьаҳзаанрыжьыз ауп сара иреиҳау баҟаны исыҧхьаӡо.  Сулҭан Сосналиев ибаҟа аргылара аҭыҧ алхра азы азҵаара анықәгылаз аамҭазы, сара уи абраҟа, Ахьӡ-Аҧша апарк аҿы иргылазарц азы аҳәара ҟасҵеит”, – ҳәа илҳәеит Лиубовь Сосналиева.
 
 Лиубовь Сосналиева, Сулҭан Асламбек-иҧа  зегьы раҧхьаӡа иргылоз, уимоу аҧсҭазаара аҵкьысгьы иҳараикуаз ахьӡ-аҧша акәын ҳәа инаҵшьны иазгәалҭеит. “Сара  абиуст аҧызҵаз асахьаҭыхыҩцәа ҭабуп ҳәа расҳәар сҭахуп. Уи Сулҭан Асламбек -иҧа ҧшрала-сахьала иеиҧшра адагьы, илаз адоуҳатә мчи апатриотизми шьахәлаҵәҟьа ианыҧшуеит”, – ҳәа лажәа хыркәшо иазгәалҭеит Лиубовь Сосналиева.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа