Ажәабжьқәа

Аҧсны Жәлар Реизара – Апарламент адепутатцәа Аахыҵ Уаҧстәыла Ахада иҧылеит

113
20.05.2019 12:37
Аҧсны Жәлар Реизара – Апарламент адепутатцәа Аахыҵ Уаҧстәыла Ахада иҧылеит
Аҧснытәи Апарламент аделегациа Аахыҵ Уаҧстәыла Апарламент VI ааҧхьара аусура ахыркәшара иазкыз агәырҕьаратә еилатәара аҽаланархәит.

Аҟәа. Лаҵарамза 20. Аҧсныпресс. Аҧснытәи Апарламент аделегациа Аахыҵ Уаҧстәыла Апарламент VI ааҧхьара аусура ахыркәшара иазкыз агәырҕьаратә еилатәара ахы аланархәит.  

Аделегациа аилазаараҿы иҟоуп Аҧсны Апарламент аиҳабы ихаҭыҧуаҩ Левон Галустиан, акультуреи, аҿари аспорти русқәа рзы апарламенттә Еилакы ахантәаҩы Венори Бебиа,  жәларбжьаратәии апарламентбжьаратәии аимадареи, аџьынџьуаа рымадареи рзы апарламенттә Еилакы ахантәаҩы ихаҭыҧуаҩ Асҭамыр Логәуа.

Апарламент аиҳабы Валери Кәарҷиа Аҧсны Жәлар Реизара – Апарламент ахьӡала Аахыҵ Уаҧстәыла Апарламент Ахантәаҩы Пиотр Гассиев ихьӡала адныҳәаларатә шәҟәы дәықәиҵеит.

Адныҳәаларатә шәҟәы аҿы Валери Кәарҷиа, ахәҭакахьала иазгәеиҭеит: “Аусура аамҭахәҭа иалагӡаны Апарламент уажәтәи ааҧхьара аилазаара аҳәынҭқарратә, ауаажәларратә ҧсҭазаара иадҳәалоу анорма-зинтә шьаҭа аиҕьтәра иазырханы мҽхакы ҭбаала аусура нанагӡеит, иара убри ала аҳәынҭқарра аекономикатәи ауаажәларра-политикатә ҿиареи, уи ашәарҭадареи жәларбжьаратәи аизыҟазаашьақәеи рырҕәҕәара, уҳәа аганахьала ихадоу аиститут аҳасабала ашьақәгылара алшеит.

Аахыҵ Уаҧстәыла Апарламент VI ааҧхьара аусура ахыркәшара шәыдаҳныҳәалоит.

Аҧсни Аахыҵ Уаҧстәылеи рыжларқәа рҭоурыхтә ҿиара аетапқәа зегьы рҿы рхақәиҭреи рҳәынҭқарратә хьыҧшымреи иазықәҧон. Ҳпарламентқәа рыбжьара аконструктивра злоу аизыҟазаашьақәа аҩганктәи жәларбжьаратәи аиқәшаҳаҭрақәеи, иара убас, 2016 шықәсазы Цхьынвал ақалақь аҿы знапаҵыҩра мҩаҧысыз Аҧсны Аҳәынҭқарреи Аахыҵ Уаҧстәылеи Рпарламентқәа рыбжьара аусеицуразы Аиқәшаҳаҭреи рыла ишьаҭаркуп. Ҷыдала ҭабуп ҳәа раҳҳәоит Аахыҵ Уаҧстәыла Апарламент анапхгара ихадоу аҧшьгарақәеи иаадырҧшыз адгылареи, шықәсырацәала хра злоу аусеицуреи рзы.

Агәра ҳгоит Аахыҵ Уаҧстәыла Апарламент анагӡаратә мчра аструктурақәа алархәны аҳәынҭқарра анаҩстәи аргылареи, аҿиареи, уи ауааҧсыра реизҳазыҕьареи иазырхоу аусура ишацхраало”.

Иара убас, аныҳәатә усмҩаҧгатәқәа рҳәаақәа ирҭагӡаны, Аахыҵ Уаҧстәыла Ахада Анатоли Бибилови Аҧсны Жәлар Реизара – Апарламент аделегациеи реиҧылара мҩаҧысит.

Асасцәа бзиала шәаабеит ҳәа раҳәо, Аҳәынҭқарра Ахада, Аахыҵ Уаҧстәылатәи Ареспубликеи Аҧсны Аҳәынҭқарреи рҳәынҭқарратә шьақәгылареи рыҿиареи  аҭоурых иаҿырҧшны уахәаҧшуазар, еициз аишьцәа иреиҧшуп ҳәа инаҵшьны иазгәеиҭеит.

“Ҳҭоурых зегьы, ҳреспубликақәа ахьыҧшымреи аҳәынҭқарра ашьақәгылареи рзы изнысыз амҩа аанарҧшуеит. Сара, ҳреспублика Апарламент ала еиҿкаау аныҳәатә усмҩаҧгатә ду аҿы шәбара даара сеигәырҕьоит”, – ҳәа иҳәеит Анатоли Бибилов.

Анатоли Бибилов Аҧсны ахаҭарнакцәа Аахыҵ Уаҧстәыла Апарламент ахь алхрақәа рҿы анаҧшыҩцәа раҳасабала ралахәхара акырӡа аҵак ду шаҵоу азгәеиҭеит.

Ахәҭакахьала, аҧснытәи аделегациа анапхгаҩы, Аҧсны Жәлар Реизара – Апарламент аиҳабы ихаҭыҧуаҩ Левон Галустиан Анатоли Бибилов Аахыҵ Уаҧстәылаҟа ириҭаз ааҧхьаразы ҭабуп ҳәа еиҳәеит. Убри аан уи, ареспубликақәа рыбжьара иҟоу аизыҟазаашьақәа аиашазы аиашьаратә ҟазшьа рыҵоуп ҳәа инаҵшьны иазгәеиҭеит.

Левон Галустиан аҩганктәи апарламентбжьаратәи аизыҟазаашьақәагьы дрылацәажәеит. “2016 шықәса рзы ҳзакәанҧҵаратә усбарҭақәа рыбжьара аусеицуразы ирҿыцу Аиқәшаҳаҭра бжьаҵан.  Иахьа ари аусеицура активла аҿиарамҩа иануп”, – ҳәа иҳәеит иара.

Левон Галустиан иара убас Аахыҵ Уаҧстәыла аҳҭнықалақьи, иааизакны ареспублика зегьы аҭеиҭыҧш аҿы хра злоу аиҭакрақәа шыҟоу азгәеиҭеит. “Ҳара Аахыҵ Уаҧстәыла 2017 шықәсазы ҳаҭаахьан. Арҭ иҳаҩсыз ҩы-шықәса рыла араҟа иааубаратәы хра злоу аиҭакрақәа аҭыҧ роуит. Ҳара уи даара ҳаигәырҕьоит”, – ҳәа иҳәеит иара.

Иара убас, Левон Галустиан Аахыҵ Ҟрым аҿырҧшыла “Аҧсны аҩызцәа Рлига” аҧҵара азы агәазҭазаара шыҟоу азы Уаҧстәыла Ахада  адырра ииҭеит.

Ари аиҿкаара азы Анатоли Бибилов иааркьаҿны адырра ииҭеит аидеиа аҧшьгаҩ Асҭамыр Логәуа.

“Ҳара Жәларбжьаратәи ассоциациа “Ҟрым аҩызцәа Рлига” Ҟрым аинтересқәа рыхьчаразы шаҟа ибзианы аус ауа шьахәлаҵәҟьа иаабон. Убас ала, ҳаргьы аиҧш-зеиҧшу аиҿкаара аҧҵара ҳаӡбеит”, – ҳәа иҳәеит иара. Ахәҭакахьала, Аахыҵ Уаҧстәыла Ахада иарбоу аҧшьгара адгылара аҭара дшазхиоу азгәеиҭеит.

Аиҧылара ахыркәшамҭаз, Левон Галустиан Анатоли Бибилов Аҧсны Аҳәынҭқарра Ахада Рауль Ҳаџьымбеи, Аҧсны Жәлар Реизара – Апарламент аиҳабы Валери Кәарҷиеи рыхьӡала адныҳәаларақәа ииҭеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа