Ажәабжьқәа

Аԥснытәи аделегациа Иорданиа аусуратә ҭаара мҩаԥнагеит

440
23.01.2017 16:00
Аԥснытәи аделегациа Иорданиа аусуратә ҭаара мҩаԥнагеит
Ауаажәларратә еиҿкаара «Жәларбжьаратәи афонд Аԥсны» ахада Сонер Гогәуа наԥхгара зиҭоз Аԥснытәи аделегациа Иорданиа, Ҳашимиҭтәи акралра иаҭааит.

Аҟәа. Ажьырныҳәа 23. Аԥсныпресс. Аделегациа иалахәын Аԥсны аекономика аминистрра иатәу аҳәынҭқарратә инвестициатә маҵзура аиҳабы Алмас Ҭаниа, «Жәларбжьаратәи афонд Аԥсны» ахьӡала Ҭырқәтәылатәи ахаҭарнак Џьенгиз Ашәба, афонд аусзуҩ Жанна Леиԥҳа, аусдкылаҩцәа Витали Смыр, Дмитри Аргәын, Беслан Џьапуа, Ауаажәларратә Палата алахәыла Низам Ҳаԥаҭ.

Аҭаара аҳәаақәа ирҭагӡаны, аделегациа аекономикатә хырхарҭа змаз аиԥыларақәа, иара убас Иорданиа иҟоу аԥсуа-адыга диаспора реизара ахы аланархәит. Аиԥыларақәа рҿы аҩ-тәылак аекономикеи, атуризми ақыҭанхамҩатә усқәеи рхырхарҭала аусеицура рыбжьаҵара иалацәажәон.

«Иорданиа, ҳара аекономикатә хырхарҭа анаҩсангьы, ҳзықәгәыӷуа тәыла ҩызаны ҳахәаԥшуеит. Ари атәыла, зықьҩыла ҳџьынџьуаа рзы ԥсадгьылк иаҩызаны иҟалеит. Ҳара иаҳҭахуп аҳәаанырцә инхо ҳдиаспореи ҳареи ҳаимадара арӷәӷәареи, ҳашьцәа рҭоурыхтә ԥсадгьыл разхьарԥшреи», – ҳәа азгәеиҭеит афонд ахада Сонер Гогәуа.

Иара убас, Аԥснытәи аделегациа ачерқьес быргцәа реилазаареи, ачерқьестә абиԥара ҿа аклуби рҟны аиԥыларақәа мҩаԥнагеит.

«Иорданиа иҟоу аилазаара даара азҿлымҳара анаҭоит аҿар аԥсуа милаҭтә культура рылааӡара, уи иадҳәалоу аусмҩаԥгатәқәагьы лассы-лассы еиҿнакаауеит. Уи аҟны аҳәынҭқарра анаԥхгара рылша хымԥада ирацәоуп, атәыла иқәынхо ажәларқәа зегьы ркультурақәа реигәныҩразы аҭагылазаашьа рзаԥнаҵоит», – ҳәа иқәгылараҿы иҳәеит Сонер Гогәуа.

Аилатәара ахыркәшамҭазы, аԥшәмацәеи асасцәеи агәаларшәагатә ҳамҭақәа еимырдеит.


Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа