Ажәабжьқәа

Популярное

Адгәыр Какоба Аҧсны аҭҵаарадырратә ҩаӡарақәа Урыстәыла аганахьала азхаҵара азы: иарбоу апункт Аиқәшаҳаҭра алагалара азы аҽазышәарақәа мҩаҧаагалоит

408
22.12.2017 16:45
Адгәыр Какоба Аҧсны аҭҵаарадырратә ҩаӡарақәа Урыстәыла аганахьала азхаҵара азы:  иарбоу апункт Аиқәшаҳаҭра алагалара азы аҽазышәарақәа мҩаҧаагалоит
Аҧсны аҵареи аҭҵаарадырреи рминистр Адгәыр Какоба Аҧсныпресс акорреспондент диҿцәажәо Москва ақалақь аҿы имҩаҧысыз аҵарадырреи аквалификациеи аҩганктәи азхаҵара азы Аиқәшаҳаҭра далацәажәеит.

Аҟәа. Ҧхынҷкәынмза 22. Аҧсныпресс. Мадина Чагәааҧҳа. Аҧсны аҵареи аҭҵаарадырреи рминистр Адгәыр Какоба Аҧсныпресс акорреспондент диҿцәажәо Аҧсни Урыстәылеи ирыбжьарҵаз “Аҵарадырреи аквалификациеи аҩганктәи азхаҵара азы” анаҧхгарабжьаратәи Аиқәшаҳаҭра  аперспективақәа дрылацәажәеит.

Аминистр Аиқәшаҳаҭра иаҵоу аҵакы ҷыдала дазааҭгылеит: “Урыстәылатәи Афедерациа иреиҳаӡоу аҵараиурҭақәа ирҭало ҳара ҳашколқәа роушьҭымҭацәаеи Аҧсны иреиҳаӡоу аҵараиурҭақәа ирылганы Урыстәыла зҵара иацызҵогьы, аҵарадырра аиура зырҵабырго аусшәҟәы азхаҵара аганахьала ауадаҩрақәа рызцәырҵуан.  Аиқәшаҳаҭра азинмчы аиурала арҭ азҵаарақәа  жәаҳәарада иаҧыххоит”.

 Адгәыр Какоба ишазгәеиҭаз ала, Урыстәылатәи Афедерациа аҵареи аҭҵаареи рминистр Ольга Василиева лыҿцәажәараан, аҧсуа ган ала аҩҳәынҭқаррак аҭҵаарадырратә ҩаӡарақәа разхаҵара азҵаара ахәаҧшразы ажәалагала ҟаҵан. “Уажәазы Аҧсны Анаукақәа Ракадемиа асистема иалоу анаукатә еиҿкаарақәеи аусбарҭақәеи жәпакы рыҩныҵҟа акандидаттәи адоктортәи диссертациақәа ахьыхьчахо иҷыдоу ахеилакқәа рымоуп. Аха макьаназы арҭ аҭҵаарадырратә ҩаӡарақәа Урыстәыла азхаҵара рымаӡам. Ари азҵаара ҳара ҳзы акыр актуалра аҵоуп. Иарбоу апункт Аиқәшаҳаҭра алагалара азы аҽазышәарақәа мҩаҧаагалоит. Ахәҭакахьала, Ольга Василиева ари азҵаара азыхынҳәра дшазхьоу азы аҳәамҭа ҟалҵеит. Иарбоу апункт аус адулареи анаҩс уи Аиқәшаҳаҭра алагалареи ҟалоит иааиуа аамҭақәак рзы”.

Иара убас, аминистр иҟаиҵаз адыррақәа рыла, Урыстәылатәи Афедерациа аҵареи аҭҵаарадырреи Рминистрра ақәшаҳатрала , Аҧсны Аҳәынҭқарреи Урыстәылатәи Афедерациеи ирыбжьарҵаз “Аусеицуреи  астратегиатә еиҩызареи рзы” Аиқәшаҳаҭра  ахәҭаҷқәа 20, 21 рҿы иарбоу ахыдҵақәа рынагӡара аҳәаақәа ирҭагӡаны, 2018-2019 шықәсазы иазҧхьагәаҭоу аусмҩаҧгатәқәа Рыплан анапаҵыҩра мҩаҧган. “Аусшәҟәы аҿы Аҧсны аҵарадырра апроцесс аҩаӡара аизырҳара иазырхоу аусмҩаҧгатәқәа жәпакы азгәаҭоуп. Аҵарадырра азы азакәан апроект аус адулара азҵаарақәа рганахьала ҳара иааиҧмырҟьаӡакәа ацхыраара ҳарҭоит нхыҵкавказтәи афедералтә университет аспециалистцәа. Ҩы-шықәса ирылагӡаны урҭ ҳашколқәа рырҵаҩцәа рзы азанааҭә ҩаӡара аизырҳара акурсқәа мҩаҧыргоит, иара убас, ҳара иҟаҳҵаз аҳәарала дара  аҵараиурҭақәа рнаҧхгаҩцәагьы рзы ҩынтә азанааҭтә ҩаӡара аизырҳара акурсқәа мҩаҧыргеит. Арҭ акурсқәа рымҩаҧгара хымҧадатәны иҟан, избан акәзар аҵыхәтәантәи 20-шықәса ирылагӡаны ари аҩыза амасштаб змоу аусмҩаҧгатәқәа мҩаҧырымгаӡацызт. Иара убас, аплан аҳәаақәа ирҭагӡаны Аҧснытәи азеиҧш ҵараиурҭақәа рзы аурыс бызшәеи алитературеи, Урыстәыла аҭоурых, иааҳакәыршаны иҟоу адунеи, уҳәа рзы арҵагашәҟәқәа раагара алыршарагьы иалацәажәан.  Арҵагашәҟәқәа раагара еиҿнакаалоит Урыстәыла аусеицуразы аиҿкаара (Россотрудничество). Уи адагьы, аплан иарбоуп иҷыдоу-абжьаратәии иреиҳаӡоуи аҵараиура азы апрограмма ҿыцқәеи арҵаҩцәа рыквалификациа аизырҳара азы акурсқәа рымҩаҧгареи. Раҧхьаӡа акәны ҳара иазҧхьагәаҳҭеит, Урыстәылатәи Афедерациа аҵареи аҵарадырреи рминистр Ольга Василиева адгыларагьы алҭеит иҷыдоу-абжьаратәии иреиҳаӡоуи аҵараиура  аусбарҭақәа русзуҩцәа рзы акурсқәа реиҿкаара”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа