Ажәабжьқәа

Популярное

Ареспубликатә Политикатә Партиа Аҧсны Ажәлар Ракзаара Афорум: Еицырдыруа 1977 шықәсатәи аҧсуа шәҟәы ацәаҳәақәа зегьы Аҧснытәи аҭоурых адаҟьақәа хьтәы нбанла ианылеит

149
27.12.2017 13:47
Ареспубликатә Политикатә Партиа Аҧсны Ажәлар Ракзаара Афорум: Еицырдыруа 1977 шықәсатәи  аҧсуа шәҟәы ацәаҳәақәа зегьы Аҧснытәи аҭоурых адаҟьақәа хьтәы нбанла ианылеит
Ареспубликатә Политикатә Партиа Аҧсны Ажәлар Ракзаара Афорум аҳәамҭа аланарҵәеит.

Аҟәа. Ҧхынҷкәынмза  27. Аҧсныпресс. Ареспубликатә Политикатә Партиа Аҧсны Ажәлар Ракзаара Афорум “130-ҩык Рышәҟәы” 40-шықәса ахыҵра инамаданы аҳәамҭа аланарҵәеит.  

Аҳәамҭа аҿы иаҳәоит: 

“1977-1978 шш. рзы имҩаҧысуаз ахҭысқәа ҳтәыла иҿыцӡоу аҭоурых аҿы иҷыдоу аҭыҧ аанакылеит. Сынтәа 130-ҩык Аҧсны иналукааша ауаажәларратә усзуҩцәеи амилаҭтә интеллигенциа ахаҭарнакцәеи Асоветтә Социалтә Республикақәа Реидгылара иреиҳаӡоу анаҧхгараҭара ахьӡала рнапы зҵарҩыз Ашәҟәы 40 шықәса ахыҵит. Аҧеиҧш ачаҧара аҵакы змаз ари Аусшәҟәы жәашықәсала Қырҭтәыла Аҧсны аганахьала имҩаҧнагоз аполитика иамаз амилаҭеилыхратә-шовинисттә ҟазшьа аанарҧшуан.

Ашәҟәы аҿы  иҵабыргыз афактқәа рыла ишьаҭаркыз Ареспублика Аҧсны  автономиа аҳасабала Қырҭтәыла аилазаара мчыла алагалара иазкыз апроцесс аарҧшын. Аҧсны атопонимикеи аҭоурыхи реицакра  иадҳәалоу азҵаара ҷыдала иазааҭгылан. Ари аҳәамҭа аҿы Аҧсны амилаҭтә интересқәа  рыркьаҿра мҩаҧызгоз Қырҭтәыла Акомунисттә Партиа Ацентркомитет акадртә политика ҕәҕәала ақәыӡбара аиуит. Ашәҟәы авторцәеи уи знапы аҵазҩызи асоветтә партиатә елита аҿаҧхьа аҩ-республикак анаҩстәи реицыҟазаара алмыршареи Аҧснытәи Автономтә Республика Қырҭтәылатәи Асоветтә Республика аилазаара алҵра ахымҧадатәреи рзы хьаҳәхьачарада азҵаара ықәдыргылеит. Ари аусшәҟәы аҿы иарбаз аполитика-зинтә проблемақәа аобиективла хшыҩзышьҭрала азнеиреи аилыргареи, урҭ рыӡбареи рмыцхәрас, ареспублика усҟантәи анаҧхгара Ашәҟәы авторцәа ауаажәларратә лахь рырҭеит, хықәкыла афактқәа реицакреи амилаҭбжьаратә еиҿагылара аҧшьгареи рзы ахара рыдырҵеит. Урҭ рыхьӡ аларҟәра азы мҽхакы ҭбаала аусура мҩаҧысуа иалагеит. Анаҧхгара аҟынтәи иааиуаз адҵақәа рыла, аколлективқәа реизарақәа мҩаҧгахон, урҭ рҿы Ашәҟәы авторцәа “амилаҭеилыхыҩ”, “ахьӡ ахҵаҩы” ҳәа  имцырку ахара рыдырҵон. Аобком абиуро аилатәарақәа, апленумқәа, активқәа реилатәарақәа мҩаҧыргон. Уаҟа атрибуна аҟынтәи акала ишьаҭаркымыз  ақәыӡбареи ахарадҵареи мҩаҧысуан. Уи дырҵабыргоит усҟантәи аамҭазы иҭыҵуаз акьыҧхьымҭақәа. Хазы игаз амилаҭ-хақәиҭратә қәҧара аҧызацәа Асоветтә Еидгыла Акоммунисттә Партиа алахәылацәа реилазаара иалцан,иааныркылоз амаҵураҭыҧқәа рҟынтәи иамхын,  уи -моу еиқәырчачаз аус ала ашьаустә хьырхәра иақәыршәан.  Ас еиҧш ауснагӡатәқәа атәыла аҩныҵҟа ауаажәларра-политикатә ҭагылазаашьа аибарххарахь икылнагеит. 1978 шықәсазы имҩаҧгаз, хыҧхьаӡара рацәала ауаа злахәыз Аҟәатәи, Лыхнытәи, Ҧақәашьтәи, Бзыҧтәи ажәлар реизарақәа  ареспублика зегьы архыџхыџит, Қарҭтәи  аметрополиа адиктат иаҿагыланы  амассатә акциақәа рымҩаҧгара иалагеит. Кремль  Асовет Еидгыла Акоммунисттә Партиа Ацентркомитет амаӡаныҟәгаҩ И. В. Капитонови егьырҭ иреиҳаӡоу апартиатә ҷынуааи наҧхгара зырҭоз акомиссиа Аҧсныҟа идәықәнаҵар акәхеит. Аамҭа кьаҿ иалагӡаны Аҧсны аганахьала Асовет Еидгыла Акоммунисттә Партиа Ацентркомитети аминистрцәа Реилазаареи ҷыдала ирыдыркылаз  Ақәҵара ҭыҵит. Уи инақәыршәаны, иаҧҵан Аҧснытәи аҳәынҭқарратә Телехәаҧшра, аҳәынҭқарратә университет, ажурналқәа “Аҧсны аҟазара”, “Ашколи аҧсҭазаареи”. Аҧсны аекономика аҿиара азы хра злаз, ажәлар рынхамҩа иазкыз анаплакқәа жәпакы рфинанстәра хацыркхеит. 

Ареспубликатә политикатә Партиа “Ажәлар ракзаара Афорум” ҳазҭоу аамҭазы ҳреспублика аҿы иҟоу  аполитикцәеи еиҵагыло аҿари, 1977-1978 шықәсқәа рзы имҩаҧысуаз акырӡа зҵазкуаз ахҭысқәеи урҭ ҳажәлар рмилаҭтә хдырра аизырҳара аҿы инанагӡаз ароль дууи ртәы хымҧада ирдыруазароуп ҳәа агәаанагара амоуп. Урҭ Аҧсны ахьыҧшымра анаҩстәи азықәҧареи Сталини Бериеи раамҭа хлымӡаах азы акыр ирмаҷыз уи аҳәынҭқарратә суверенитет  аиҭашьақәыргылареи иҕәҕәоу аидеологиатәи азинтәи шьаҭа анаҭеит. 

1977 шықәсазы иҩыз аҭоурыхтә Шәҟәы знапы аҵазҩыз рҕьырак иахьа рыҧсҭазаара иалҵхьеит. Аха урҭ аҧсуа жәлар аполитикатә ҽҳәаақәҵара азы рықәҧара аҿы инарыгӡаз ароль ахәшьара аҭара уадаҩуп.Усҟантәи аамҭа хьанҭақәа рзы Аҧсны ахақәиҭра иазықәҧоз рхаҭарнакцәа аӡәырҩы изаамҭанымкәа рыҧсҭазаара иалҵит. Урҭ ргәалашәара аҿаҧхьа ҳхы лаҳарҟәуеит! Еицырдыруа 1977 шықәсатәи  аҧсуа шәҟәы ацәаҳәақәа зегьы Аҧснытәи аҭоурых адаҟьақәа хьтәы нбанла ианылеит. Ҳара иаҳуалҧшьуп ихьыҧшым, зхы иақәиҭу аҿиара амҩа анылара азы алшара ҳазҭаз ҳажәлар рытрадициақәеи рҭоурыхтә ҧышәеи аиҷаҳареи аиқәырхареи”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа