Ажәабжьқәа

Популярное

Ауадҳара иаатраны иҟоуп арзҩыдаратә хәыҷтәы лагерь “Ажәеиҧшьаа”

59
18.07.2019 14:30
Ауадҳара иаатраны иҟоуп арзҩыдаратә хәыҷтәы лагерь “Ажәеиҧшьаа”
Актәи агәыҧ ашьхаҟа идәықәлоит ҧхынгәымза 22 рзы.

Аҟәа. Ҧхынгәымза 18. Аҧсныпресс. Дамеи Касланӡиа. Аҧсны аҵареи аҭҵаареи Рминистрреи, Аҧсны Аҳәынҭқарра аџьеи аусура анапалакреи асоциалтә еиқәыршәареи Рминистрреи ахәыҷтәы арзҩыдаратә лагерь “Ажәеиҧшьаа” аусура еиҿнакаауеит. Ахәыҷқәа рыҧсшьараамҭа алагерь аҿы ишырхыргараны иҟоу атәы далацәажәеит аҵареи аҭҵаареи Рминистрра апресс-мацӡура аиҳабы Аслан Қәҭелиа.

Аслан Қәҭелиа иҟаиҵаз адыррақәа рыла, алагерь Риҵатәи амилаҭтә реликттә парк аҵакыраҿы ишьақәыргылоуп. "Ари атәыла абжьаратәи ашколқәа рҵаҩцәа ргәабзиара арзҩыдаразы ҳаамҭазтәи аҧсшьарҭа ҭыҧуп. Уи абар шьҭа ҩышықәса инеиҧынкыланы еиҿыркаауеит, уимоу, есышықәсагьы аиҿкаара азҧхьагәаҭоуп. Сынтәа Ауадҳара рыҧсы ршьартә еиҧш алшара роуеит 250-ҩык 12-16 шықәса зхыҵуа ашколхәыҷқәа. Зныкала зыҧсы зшьо ргәыҧ 40-50-ҩык рыла еиҿкаахоит.  Урҭ 7-мшы ашьхара иҟазаауеит”, – ҳәа алкаа ҟаиҵеит иара.

Аслан Қәҭелиа иҟаиҵаз адыррақәа рыла, алагерь ахь идәықәҵахо ахәыҷқәа араионтә ҵарадырра аҟәшақәа ишьақәдыргыло асиақәа рыла иалкаахоит. Зегьы раҧхьӡа иргыланы, уи аҵарашықәс иалагӡаны аҵараҿы аума, аспорт аҿы аума зхы бзианы иаазырҧшыз, мамзаргьы аолимпиадақәа рҿы аиааира згаз, иара убас ахәыҷырацәа змоу аҭаацәа ирылҵыз ахәыҷқәа ракәхоит. “Мчыбжьык ала ахәыҷқәа ирыдгалахоит атуристтә маршрутқәа рыла аныҟәарақәа, Риҵа аҧсабара аҧшӡарақәа рбара, уҳәа егьырҭ аинтересс зцу аусмҩаҧгатәқәа жәпакы.  Аҧснытәи аҳәынҭқарратә Университет алекторцәеи ашколқәа рырҵаҩцәеи рыцхыраарала урҭ Аҧсны аҭоурых, агеографиа, аетнологиа, уҳәа амаҭәарқәа рыла алекциақәа-асеминарқәа ирхысуеит. Жәаҳәарада, рыҧсшьараамҭа иалагӡаны аҧсуа милаҭтә хәмаррақәа рыла ишьаҭарку еиуеиҧшым ахкқәа рыла аицлабрақәа мҩаҧгахоит”, – ҳәа адырра ҟаиҵеит атәыла аҵареи аҭҵаареи Рминистрра апресс маҵзура аиҳабы. 

Убри аан, Аслан Қәҭелиа инаҵшьны иазгәеиҭеит: “Ашколхәыҷқәа алагерь аҿы рыҟазаара аамҭа зегьы иалагӡаны ирыцзаауеит аҧышәа змоу  аҵареи аҭҵаареи Рминистрра аусзуҩцәа. Ахәыҷқәа ршәарҭадара иацклаҧшлоит Аҧсны иҷыдоу аҭагылазаашьақәа рзы Аминистрреи, атәыла аҩныҵҟатәи аусқәа Рминистрреи. Ахәыҷқәа ргәабзиара аҭагылазаашьа иахылаҧшлоит иҷаҧшьоу аҳақьымцәа. Алагерь аҿы мышкахьы хынтә акыфара еиҿкаахоит. Алагерь алахәылацәа иахәҭоу аинвентарь зегьы ала еибыҭахоит, мацара ирыцзароуп рыҧсахга маҭәақәеи, аҧхамаҭәақәеи, иара убас  рхатәы гигиена ахархәагақәа”. 

Актәи агәыҧ Ауадҳараҟа амҩа иқәлоит ашәахьа, ҧхынгәымза 22, Аҟәа ақалақь Аиааира Ашҭаҟынтә, ашьжьымҭан, асааҭ 7:00 рзы.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа