Ажәабжьқәа

Популярное

Иҧсҭазаара далҵит Рушьбеи Смыр

125
29.07.2019 17:06
Иҧсҭазаара далҵит Рушьбеи Смыр
Иҧсҭазаара далҵит Аҧсны Жәлар рпоет, Дырмит Гәлиа ихьӡ зху аҳәынҭқарратә премиа алауреат, аорден “Ахьӡ-Аҧша”  II аҩаӡара акавалер Рушьбеи Смыр.

Аҟәа. Ҧхынгәымза 29. Аҧсныпресс. Лана Ҵәыџьҧҳа. 70-шықәса дшырҭагылаз иҧсҭазаара далҵит Аҧсны Жәлар рпоет, Дырмит Гәлиа ихьӡ зху аҳәынҭқарратә премиа алауреат, аорден “Ахьӡ-Аҧша”  II аҩаӡара акавалер Рушьбеи Ҳазараҭ-иҧа Смыр.

Аҧсны аҵарадырреи аҭҵаареи акультуреи рзы Аҳәынҭқарра Ахада иабжьгаҩ Владимир Занҭариа  Аҧсныпресс акорреспондент диҿцәажәо апоет дихцәажәеит: “Рушьбеи Ҳазараҭ-иҧа Смыр аҿаҧыц ҕәҕәа зҿаз иналукааша поетын, уи ирҿиаратә ҟазара акы иалаҩашьомызт, ихатә шәҟәҩыратә стиль иман. Рушьбеи Смыр аҧсуаа рыбзазашьа, рҭоурых бзиаӡаны идыруан, ашәарыцаҩцәа рышьхабызшәа шьахәлаҵәҟьа идыруан, уи зылшоз даара имаҷҩын. Убри зегьы иажәеинраалақәа, ибалладақәа, ипоемақәа зеиҕьаҟам ала ирныҧшит”.

Владимир Занҭариа иажәақәа рыла, Рушьбеи Смыр 60-тәи ашықәсқәа рынҵәамҭа инадыркны амилаҭтә-хақәиҭратә қәҧара далахәын, ауаажәларра-политикатә еиҿкаара “Аидгылара” аҧҵаҩцәа дреиуоуп. Иара хәажәкырамза 18, 1989 шықәса рзы Аҧсны асуверенитет аиҭашьақәыргылара азы имҩаҧысыз Лыхнытәи ажәлар Реизараду аиҿкааҩцәа дыруаӡәкын.

“Рушьбеи Смыр 20 инареиҳаны ажәеинраалақәа реизга дравторуп. Уи иажәеинраалақәа ахә ҳаракны иршьахьан Евгени Евтушенко еиҧш иҟоу еицырдыруа апоетцәа. Иара икалам иҵыҵит амҳаџьырра аамҭа иадҳәалоу ҳажәлар рлахьынҵа  хьанҵа иазку апоема “Симра”. Абри апоема ала иқәыргылан аспектакль. Уи ахәаҧшцәа акыр ахшыҩзышьҭра арҭеит. “Симра” аурыс бызшәахьы еиҭагоуп. Иара убас, 70 инареиҳау  Рушьбеи Смыр иажәеинраалақәа ашәақәа рылхуп”, – ҳәа иҳәеит Владимир Занҭариа.

Аҳәынҭқарра Ахада иабжьгаҩ Рушьбеи Смыр зеиҕьаҟам ауаҩ ҟәыш, аоратор шьахә иакәын ҳәа иазгәеиҭеит. Амҳаџьырра, ахатәы бызшәа, амилаҭтә культуреи атрадициақәеи реиқәырхара, уҳәа иуадаҩыз Аҧсны алахьынҵа иадҳәалаз атемақәа Ажәлар рпоетк иҟазараҿы ихадоу аҭыҧ ааныркылеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа