Ажәабжьқәа

Популярное

Ҭоуба зуеит, сымч-сылша, схы-сыхшыҩ, сыҧсҭазаара зегьы Сыҧсадгьыл, сыуаажәлар рымаҵ аура ишазыскуа: Аҧсны Ахадас иалху имацура анагӡарахь днеит

545
09.10.2019 14:00
Ҭоуба зуеит, сымч-сылша, схы-сыхшыҩ, сыҧсҭазаара зегьы Сыҧсадгьыл, сыуаажәлар рымаҵ аура ишазыскуа: Аҧсны Ахадас иалху имацура анагӡарахь днеит
Аҧсны Аҳәынҭқарра Ахада Рауль Ҳаџьымба имаҵура анагӡарахь инеира иазку аныҳәатә церемониа аминистрцәа Реилазаара аилатәарақәа рзал Хада аҿы имҩаҧысит.

Аҟәа. Жьҭаарамза 9. Аҧсныпресс. Лана Ҵәыџьҧҳа/Ҭамара Ачҧҳа. Ақәа ақалақь, аминистрцәа Реилазаара аилатәарақәа рзал Хада аҿы, Аҧсны Аҳәынҭқарра Ахадас иалху Ҳаџьымба Рауль Џьумка-иҧа имаҵура адкылара иазку аныҳәатә церемониа мҩаҧысит.



Аусмҩаҧгатә рхы аладырхәит азакәанҧҵаратә, анагӡаратә, аӡбаратә мчра ахаҭарнакцәа, алхратә Комиссиа хада алахәылацәа, Аҧсны иҟоу Урыстәылатәи Афедерациа Ацҳаражәҳәаҩ Алексеи Двинианин, Аҧсны иҟоу Аахыҵ Уаҧстәыла Ацҳаражәҳәаҩ Олег Боциев.  Аҧсны Аҳәынҭқарра Ахадас иалху Ҳаџьымба Рауль Џьумка-иҧа имаҵура адкылара иазку аныҳәатә церемониа  асацәа раҳасабала рхы аладырхәит: Алада Уаҧстәыла Ареспублика Ахада Анатоли Бибилов, Урыстәылатәи Афедерациа Аҳәынҭқарратә Дума Ахантәаҩы ихаҭыҧуаҩ Ольга Тимофеева, Аҩадатәи Кавказ аусқәа рзы Урыстәылатәи Афедерациа Аминистр Сергеи Чеботариов, Аҧсны иҟоу Никарагуа Аҷыдалкаатәи Азинмчы змоуи Ацҳаражәҳәаҩ Альба Асусена Торрес-Мехиа, Приднестровиатәи Молдавиатәи Ареспублика Иреиҳаӡоу Асовет Ахантәаҩы Александр Коршунов, Арцах Ареспублика акультура аминистр Лерник Ованнисиан, Адыгеиа Ареспублика Аҳәынҭқарратә Хеилак – Хасе Ахантәаҩы Владимир Нарожныи, Донецктәи Жәлартә Республика Ахада Денис Пушилин, Лугансктәи Жәлартә Республика Адәныҟатәи аусқәа рминистр Владислав Деинего, Приднестровтәи Молдавтәи Ареспублика Иреиҳаӡоу Асовет ахантәаҩы Александр Коршунов, Ҟабарда-Балкариатәи Ареспублика Ахада Иусбарҭа аиҳабы Маҳамед Кодзоков, Аҩада Уаҧстәыла Аконституциатә Ӡбарҭа ахантәаҩы Станислав Кесаев, Ҭырқәтәылатәи Ареспубликаҟны иҟоу Аҧсуа культуратә центрқәа Рфедерациа ахантәаҩы Аҭанур Аҟәысба, Ареспублика Ливан иҟоу Ауаажәларратә Еиҿкаара “Адыга Хасе” ахантәаҩы Ливан Риад Цыба, Иорданиа иҟоу Аҧсуа культуратә центр ахантәаҩы Чичба Хасан, Ҟарачы-Черкесстәи Ареспублика Апарламент ахантәаҩы ихаҭыҧуаҩ Мусса Экзеков, руководители добровольческих организаций Каплан Куижев, Мурат Жиров, Тимур Шарданов, Сергей Дудиев, Исхак Афаунов, Джанибек Кужев, Чесентәи Ареспублика Апарламент аиҳабы ихаҭыҧуаҩ Шаид Жамалдаев напхгара зиҭо Чечентәылатәи аделегациа,  Калмыкиа Ареспублика Аиҳабыра Ахантәаҩы Иури Заицев.

Аныҳәатә еилатәара ааиртит Аҧсны Жәлар Реизара – Апарламент Аиҳабы Валери Кәарҷиа.

“Ҳаҭыр зқәу аҩызцәа, ҳаҭыр зқәу асасцәа. Ииасыз Аҧсны Ахада иалхрақәа ишьақәдырҕәҕәеит ҳтәылаҿы адемократиатә принципқәа аиааира шыргаз, адунеи зегьы аҿы ҳуаажәларра атәылауаҩратә ҭәымҭа ишҭагылаз, Аҧсны ҳәынҭқаррак аҳасабала ишышьақәгылаз ддырбеит. Алхратә кампаниа амҩаҧысшьа иацклаҧшуаз хыҧхьаӡара рацәала анаҧшыҩцәа аӡәк иеиҧш иазгәарҭеит Аҧсны азакәанҧҵареи, жәларбжьаратәи адемократиатә принципқәеи ажәлар ицивилизациатәу ргәазыҳәара атрадициақәеи ишрықәшәо атәы.

Имҩаҧысыз алхрақәа рполитикатә ҵаки рҵабыргреи шьақәдырҕәҕәоит иалху Ахада ихьӡала иааиуа адныҳәаларақәа, Ахада имаҵура анагӡарахь анеира иазку аныҳәатә церемониа иалахәу аделегациақәа”, – ҳәа иҳәеит Валери Кәарҷиа.

Жәлар Реизара – Апарламент аиҳабы ажәлар рыхьӡала Аҧсны аҩызара азҭо зегьы ҭабуп ҳәа реиҳәеит, аиашьаратә еизыҟазаашьақәа хра злоу аҿиара шацҵахо азы агәыҕра ааирҧшит.



Анаҩс ҭоуба ауразы ааҧхьара иҭан Аҧсны Аҳәынҭқарра Ахадас иалху Рауль Ҳаџьымба.

Аҧсны Аҳәынҭқарра Аконституциа инапы нақәҵаны, Рауль Ҳаџьымба ҭоуба иуит: “Ҭоуба зуеит, сымч-сылша, схы-сыхшыҩ, сыҧсҭазаара зегьы Сыҧсадгьыл, сыуаажәлар рымаҵ аура ишазыскуа, сыжәлар ирымҭаны снапаҿы иҟало амчра ҳҳәынҭқарра Аконституциа, иахьатәи уи амш, уаҵәтәи уи аҧеиҧш рыхьчаразы схы ишасырхәо. Жәлар рылахь соуааит иҧшьоу абри ахықәкы сацәхьаҵны саныҟала. Иа Анцәа Ду суҳәоит, сыҧсадгьыли сыуаажәлари рымаҵ аураҿы амчи алшареи суҭарц”.



Инагӡаз Аҧсны Аҳәынҭқарра Агимн анаҩс, Аҳәынҭқарра Ахада инапы аркразы азал иҩнагалан аҳәынҭқарратә мчхара атрибутқәа.



Анаҩс имҩаҧысит Рауль Ҳаџьымба ахада имчхара адыргақәа – ахада ибираҟ, Аҳәынҭқарратә герб, “Аҧсны Ахада” ҳәа аҩыра зну амҳәыр официалла инапы аркра, иара убас Аҧсны Арбџьар мчқәа Ркомандаҟаҵаҩ хада иаҳасабала иҟазаара символра азызуа аҳәа. Ахада имчхара аазырҧшуа егьи адырга – аҧсуа лабашьа иаанарҧшуеит милаҭрацәала еилоу Аҧсны жәлар ргәыҕрақәеи ргәазыҳәарақәеи – ижәлар аҭынчреи аизҳазыҕьареи рызнаигаразы аҳәынҭқарратә ҟәыҕара, ахада ихачҳара.
  
Аҧсны Жәлар Реизара – Апарламент Ахантәаҩы Валери Кәарҷиа Аҧсны Аҳәынҭқарра Ахада Рауль Ҳаџьымба ақәгыларазы ажәа ииҭеит.



Аҳәынҭқарра Ахада ажәахә ҟаҵо дықәгылеит:

“Ҳаҭыр зқәу ҳауаажәлар! Ҳаҭыр зқәу ҳасасцәа!

Иахьа абра имҩаҧысуа ахҭыс – ихьыҧшым Аҧсны Аҳәынҭқарра аполитикатә ҭоурых ҿыц иадаҟьоуп. Уи иаанарҧшуеит, егьа уадаҩра ыҟазаргьы, ҳара ҳаҩныҵҟа, ма ҳакәша-мыкәша, ҳтәыла, хьаҵрак ҟамҵа, аҿиареи, аизҳареи, адемократиеи рымҩа ишану. Аҧсны Ахада иалхра мҩаҧысит иааидкыланы аҭынчратә, аҭышәынтәаларатә ҟазшьа аманы. Ааи, иҟан аимак-аиҿак, аргама еибаҳҳәон иҳагу-иҳабзоу, ҳрылацәажәон иахьа хымҧада иӡбатәны иҟоу апроблемақәа, аха урҭ ҳмилаҭтә етика аҳәаақәа ирҭагӡан. Уажәтәи алхрақәа иҧышәагоу даҽа шьаҿакны иҟалеит ҳазну амҩаҿы, аҳәынҭқарра аргылараҿы, аполитика-зинтә культура аҧҟарақәа рықәныҟәараҿы.
Алхрақәа хыркәшоуп. Иҟоуп алҵшәақәа здызкыло, издызымкыло. Сгәы иаанагоит, уажәшьҭа усӡбатәны иҟалароуп ҳәа ҳазлагаз аиҭакрақәа рымҽхак арҭбаара. Уи азы ихымҧадатәны иҟоуп ауаа реидкылара, ажәлар раӡәкра. Сақәгәыҕуеит, уи аганахьала аилкаареи, аҟәыҕареи аадырҧшып ҳәа аполитикатә еиҿкаарақәа рнапхгаҩцәа зегьы, Аҧсны аҧеиҧш хьаас, гәҭыхас измоу зегьы, неилых ҟамҵакәа.

Ҳаҧхьа ишьҭоуп асоциалтә-економикатә ҭагылазаашьа шьаҭанкыла аиҕьтәра аус. Адунеитә геополитика ҳасаб азуны, азҿлымҳара ҷыда рыгымхароуп амилаҭтә шәарҭадареи атәылахьчареи. Ихадарақәоу ируакуп ацәгьаурақәа рҿагылара, азинтә леишәа арҕәҕәара ирыдҳәалоу азҵаарақәа. Иара убас хыхь-хыхьла акәымкәа, апрограмматә знеишьа аарҧштәуп адемографиатә проблемақәа рыҭҵаараҿы, раларҵәараҿы. Априоритетқәа ируакны иаанхоит аҳәынҭқарратә бызшәа амч, алша, амҽхак арҭбаареи, ҳмилаҭтә хаҿра аазырҧшуа, ибеиоу Аҧсны аҭоурых аӡыргареи.

Иҵегь ирҕәҕәатәуп, ареалтә ҟазшьа рыҭатәуп аҳәаанырцәтәи ҳџьынџьуааи ҳареи ҳаимадарақәа. Урыстәылатәи Афедерациеи ҳареи ҳастратегиатә усеицура аҩаӡара иаҳа-иаҳа ишьҭыхуа, агәцаракра агаҳмыжьроуп ҳҭоурыхтә лахьынҵа иузаҟәымҭхо Нхыҵ Кавказ.

Сара издыруеит, абарҭқәа зегьы ҳамч шрықәхо, ҳабжьара ианыҟала аилибакаара, аизыразра. Даҽа мҩакгьы ҳамам!
Гәык-ҧсыкала ишәзеиҕьасшьоит агәамч-ҕәҕәа, аихьӡара ҿыцқәа!

Ҳаҭыр зқәу ҳауаажәлар, иахьатәи аизара зхы алазырхәыз аҳәаанырцәтәи ҳколлегацәа, ҳашьцәа, ҳаҳәшьцәа! Иҭабуп ҳәа шәасҳәоит аҭакҧхықәра ду зцыз ари алхратә кампаниа ашҟа иаашәырҧшыз азҿлымҳаразы, досу ҳтәыла аҿиара, ашьақәгылара аус иадышәҵо аџьабааи, агәбылреи, алшамҭақәеи рзы! Иазҳалааит, ишәҭыкакаҷлааит ахьыҧшымра амҩа иану Аҧсны Аҳәынҭқарра! Шьардаамҭа Аҧсынра”.



Анаҩс, адныҳәаларатә ажәахә иаҧхьеит Алада Уаҧстәыла Ареспублика Ахада Анатоли Бибилов, Урыстәылатәи Афедерациа Аҳәынҭқарратә Дума Ахантәаҩы ихаҭыҧуаҩ Ольга Тимофеева, Аҩадатәи Кавказ аусқәа рзы Урыстәылатәи Афедерациа Аминистр Сергеи Чеботариов. Никарагуа Ареспублики анапхгара ахьӡала Ахада дидныҳәалеит Аҧсны иҟоу Никарагуа Аҷыдалкаатәи Азинмчы змоуи Ацҳаражәҳәаҩ Альба Асусена Торрес-Мехиа, Приднестровиатәи Молдавиатәи Ареспублика анапхгара ахьӡала – ПМА Иреиҳаӡоу Асовет Ахантәаҩы Александр Коршунов, Арцах Ареспублика анапхгара ахьӡала – Арцах Ареспублика Акультура аминистр Лерник Ованнисиан, Адыгеиа Ареспублика ахьӡала – Аҳәынҭқарратә Хеилак – Хасе Ахантәаҩы Владимир Нарожныи, Ҟабарда-Балкариатәи Ареспублика ахьӡала адныҳәалара ҟаиҵеит ҞБА Ахада Иадминистрациа Анапхгаҩы Муҳамед Кодзоков, Ҟарачы-Черқьестәи Ареспублика ахьӡала – ҞЧА Жәлар Реизара Ахантәаҩы ихаҭыҧуаҩ Мусса Екзеков. Адныҳәаларақәа ирыҧхьеит иара убас Ачечентә Республика Ахада ихьӡала, Аҩада Уаҧстәыла Ареспублика Ахада – Аланиа Ахада ихьӡала. Иара убас ацеремониаҟны иқәгылеит Ҭырқәтәылатәи Ареспубликаҟны иҟоу Аҧсуа культуратә центрқәа Рфедерациа ахантәаҩы Аҭанур Аҟәысба, Донецктәи Жәлартә Республика Ахада Денис Пушилин, Лугансктәи Жәлартә Республика Адәныҟатәи аусқәа рминистр Владислав Деинего, Калмыкиа Ареспублика Аиҳабыра Ахантәаҩы Иури Заицев.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа