Ажәабжьқәа

Популярное

Рауль Ҳаџьымба: Хаджимба: обиективла аусҭҵаарақәа мҩаҧганы, арҭ ацәгьоурақәа рзы ахара зду дызусҭазаалак иахьырхәразы иақәнагоу аҭагылазаашьақәа раҧҵара хымҧадатәиуп!”

57
15.07.2019 17:39
Рауль Ҳаџьымба: Хаджимба: обиективла аусҭҵаарақәа мҩаҧганы, арҭ ацәгьоурақәа рзы ахара зду дызусҭазаалак иахьырхәразы иақәнагоу аҭагылазаашьақәа раҧҵара хымҧадатәиуп!”
Аҳәынҭқарра Ахада Аҧсны апрокуратура Хада, атәыла аҩныҵҟатәи аусқәа Рминистрра, аҳәынҭқарратә шәарҭадара Амаҵзура ахаҭарнакцәа алархәны аилатәара мҩаҧигеит.

Аҟәа. Ҧхынгәымза 15. Аҧсныпресс. Аҧсны Аҳәынҭқарра Ахада Рауль Ҳаџьымба атәыла апрокурор хада Зураб Ачба, аҩныҵҟатәи аусқәа рминистр Гарри Аршба, аҳәынҭқарратә шәарҭадара Амаҵзура ахантәаҩы Зураб Маан алархәны азинеиҿкаара арҕәҕәара иадҳәалоу азҵаарақәа рылацәажәара мҩаҧигеит.

Аҳәынҭқарра Ахада актуалра злоу апроблемақәа аликааит:

“Имҩаҧысыз ахҭысқәа, а-Кәыҵниа ҷкәын ишьра, иара убас Аҩныҵҟатәи аусқәа рминистрра ахыбраҟны иаанкылаз а-Ҭарба иеилкаам аҭагылаазашьақәа ирыхҟьаны иҧсҭазаара иалҵра”. Убри аан Рауль Ҳаџьымба инаҵшьнны иазгәеиҭеит: “Шәареи сареи изныкымкәа ҳаиқәшәахьеит ҳуаажәларра ргәы иҵхо азҵаарақәа рзы. Имҩаҧысыз ахҭысқәа, а-Кәыҵниа ҷкәын ишьра, иара убас Аҩныҵҟатәи аусқәа рминистрра ахыбраҟны иаанкылаз а-Ҭарба иеилкаам аҭагылаазашьақәа ирыхҟьаны иҧсҭазаара иалҵра инарымаданы аилацәажәара мҩаҧаҳгахьеит, излауаз ала ҕәҕәала иазгәаҳҭеит обиективла аусҭҵаарақәа мҩаҧганы, арҭ ацәгьоурақәа рзы ахара зду дызусҭазаалак иахьырхәразы иақәнагоу аҭагылазаашьақәа раҧҵаразы.

Аҳәара ҟасҵоит, Панцулаиа иганахьала агәҩара ззыҟоу ауаа Аҧсны адгьылҵакырахь раагаразы жәлабжьаратәи аусеицура аҳәаақәа ирҭагӡаны аусура ишахәҭоу амҩаҧгаразы.

Аҩныҵҟатәи аусқәа Рминистрраҟны иҟоу аҭагылазаашьазы Апрокуратура хада уажәаҧхьа шәаргьы ҳаргьы иазгәаҳҭаз аусура мҩаҧнагароуп, уи алҵшәа ҳуаажәларра ирдырыртә иҟаҵатәуп. Ахара зду азакәан ишаҳәо ала иқәнагоу дақәшәароуп.

Апрокурор хада, Аҩныҵҟатәи аусқәа рминистр инадыркны, Мерцхәылаа иҧаара инамаданы аусҭҵаара иалахәу зегьы рнапы иану аусмҩаҧгатәқәа аҵыхәанӡа инагазароуп. Изхароу аҭакҧхықәра идҵатәуп. Аус здышәулаша, иҟаҵатәны шәнапы иану маҷӡам”, – иҳәеит Аҳәынҭқарра Ахада.

Аҩныҵҟатәи аусқәа рминистр Гарри Аршба имҩаҧгоу аусура атәы далацәажәеит:

“Иҟасҵаз адҵала амаҵзуратә гәаҭара мҩаҧган. Иеизгоу аматериал иҟалаз ахҭыс аҵакы инақәыршәаны аӡбамҭа адкыларазы Аҟәа ақалақь апрокуратурахь инашьҭуп. Анӡор Ҭарба иҧсҭазаара иалҵра зыхҟьаз аҭагылазаашьақәа зегьы хымҧада ишьақәыргылахоит.  Амилициа аусзуҩцәа рыҟнытә амчмырхара, амаҵзуратә зинмчқәа рхыҧара, амаҵзуратә цәгьоурақәа рзы закәанла ахьырхәра ҟалоит, аҭыҧ змаз афактқәа зегьы рышьақәыргыларазы иҳалшо зегьы ҟаҳҵалоит. Ҳазҭагылоу аамҭазы Аҟәа ақалақь Апрокуратура ашьаус хацнаркит ашьаустә ҧшаара аусбарҭа амаҵзуҩы иганахьала. Абри ашьаус аҟны иарбоу аусзуҩцәа зегьы иҟасҵаз адҵала рмаҵзурақәа ирымхуп. Ҳазҭагылоу аамҭазы иақәнагоу аусмҩаҧгатәқәа зегьы рынагӡара ҳаҿуп, хықәкыла Апрокуратуреи ҳареи аусура еицымҩаҧаҳгоит аус иадҳәалоу аҭагылазаашьақәа зегьы рыҭҵааразы.

Атәылауаҩ Кәыҵниа ишьра афакти аҩбатәи а-Кәыҵниа ишьра аҽазышәареи рзы имҩаҧгоуп аоперативтә-ҧшааратә усмҩаҧгатәқәа, аусмҩаҧгатәқәа Аҳәынҭқарратә шәарҭадара амаҵзура алархәны имҩаҧган. Ишьақәыргылан хаҭала ари ацәгьоура ҟазҵаз ахаҿқәа. Урҭ аишьцәа Ҧанцулаиаа роуп. Иахьа иара убас Аҳәынҭқарратә шәарҭадара амаҵзура алархәны урҭ ахьыҟоу аҭыҧ ашьақәыргыларазы аусмҩаҧгатәқәа рынагӡара иаҿуп. Иҳамоу аоперативтә информациа ала, дара Аҧсни Урыстәылеи ирыбжьоу аҳәаа иахысит, аҳәаа излахысыз атранспорт шьақәыргылахоит”.

Апрокурор хада Зураб Ачба адырра ҟаиҵеит аусбарҭа имҩаҧнагаз аусура азы:

“Ҭарба ишьра афакт азы, ахәҭаҷ 288, ахәҭа 3 ала ашьаус хацыркуп. Ари амч ахархәарала амаҵзуратә зинмчқәа рхыҧара ауп иаанаго. Аусҭҵаара мҩаҧнагоит Аҟәа ақалақь Апрокуратура. Ҳазҭагылоу аамҭазы абри ацәгьоура иалахәу ахаҿқәа зегьы рмаҵзурақәа ирымхуп. Ари ацәгьоура иалахәу зегьы рмаҵзуратә цәгьоуроуп ҳәа иҧхьаӡоуп. Хаҭа-хаҭала зегьы рус аҭҵаарала рхара шьақәыргыланы, ауаажәларра рҟынӡа инагахоит”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа