Ажәабжьқәа

Популярное

Рауль Ҳаџьымба: сара ашықәсҿыцтәи аныҳәақәа ҭаацәашәала иазгәасҭоит

367
21.12.2017 17:12
Рауль Ҳаџьымба: сара ашықәсҿыцтәи аныҳәақәа ҭаацәашәала иазгәасҭоит
Аихшьаалатә пресс-конференциа аҿы Аҳәынҭқарра Ахада атәыла аҿы ишьақәгылаз аполитикатә, аекономикатә, асоциалтә ҭагылазаашьа  иадҳәалаз азҵаарақәа жәпакы рҭак ҟаиҵеит.

Аҟәа. Ҧхынҷкәынмза 21. Аҧсныпресс. Мадина Чагәааҧҳа. Аҧсны Аҳәынҭқарра Ахада Рауль Ҳаџьымба имҩаҧигаз апресс-конференциа аҿы еиҭамҵуа аобиектқәа априватизациа рзура иадҳәалоу апроблемақәа дырзааҭгылеит: “Изеиҧшразаалак ахархәара змам аобиектқәа рыргьежьра азҵаара уажәаҧхьагьы изныкымқәа иқәҳаргылахьан. Апарламент аҿы арҭ азҵаарақәа рыӡбара алзыршо азакәан апроект алацәажәара мҩаҧысуеит. Ҳара хыҧхьаӡара рацәала игәыгәҭажьны игылоу аобиектқәа ҳамоуп. Жәаҳәарада, урҭ априватизациа рзура зегьыҵәҟьа ирылшо иҟам, уи зҽазызшәо уи азы алшара змоу роуп. Убарҭ алшарақәа ачынуаа, мамзаргьы уи азы аӡбамҭақәа здызкыло ауааи рзы иандәықәҵахо уамашәа иумбар залшом.  Иара убас аобиект априватизациа азура арццакра, мамзаргьы “арманшәалара” азы еиуеиҧшым ауаа аҵартыша рыҭаразгьы аҧаратә хархәагақәагьы рыҧшаауеит. Аха ус ишәцәырацәоу аҧара шәымазар, урҭ афондқәак рахь иахыҧхьаӡалазар еиҳа еиҕьӡами. Рыцҳарас иҟалаз, априватизациа зызу аобиектқәа реиҳарак аус руӡом. Ҳара арҭ азҵаарақәа Гагра, Аҟәа ақалақьқәа рҿы аӡбара ҳҽазаҳшәоит. Зегьы амчратә усбарҭақәа рҟынтәи иҟоу ахылаҧшра иадҳәалоуп. Ас еиҧш иҟоу амазара архынҳәра алзыршо азакәан адкылара хымҧадатәны избоит”. 

Рауль Ҳаџьымба ихымҧадатәиу амедицинатә бгаҧса аганахьала имҩаҧысуа аусура далацәажәеит: “Ҳара иахьазы ихараку атехнологиақәа рхархәарала аоперациақәа рымҩаҧгареи ачымазарақәа рышьақәыргылареи рзы алшара ҳамаӡам, Ус еиҧш алшарақәа ҳтәыла анҭыҵ ауп иахьыҟоу. Зегьы ишахәҭоу ала ишьақәҳаргылар, ҳара ҳауаажәлар ирыхәҭоу амедицинатә цхыраара роуртә иҟалоит. 46,5 миллион мааҭ инареиҳаны ахәышәтәра адагьы амҩақьыреи, ачымазаҩ аҳәаанырцә иҟазааразы ихымҧадатәиу аҭагылазаашьақәа раҧҵареи ирықәхарџьхахьеит. Агәыҕра сымоуп, ихымҧадатәиу амедицинатә бгаҧса атема азҵаарақәа жәпакы рыӡбара алнаршап ҳәа. Иазгәаҭатәуп даҽакгьы, ачымазарақәа зегьы зыхьуа рықәра еиҳа- еиҳа иҿахо иалагоит. Уи даара негативла ҧхьаҟатәи ҳҧеиҧш ианыҧшыр алшоит. Ауааҧсыра рдеспансеризациа амҩаҧгара ацҵара азы иахәҭоу аҭагылазаашьақәа аҧҵатәуп. Ари баша аформа аҳасабала имҩаҧгатәу усӡам, уи ачымазарақәа рымҩаҧысшьа, еиҳарак иуҧыло апроблемақәа, уҳәа реилкаара иазырхоуп. Ари азҵаара ауааҧсыра зегьы ииашаны иазнеиӡом, ауааҧсыра рҕьырак адиспансеризациа ианаамҭоу иахысып ҳәа  агәра ганы сыҟоуп”. 

Рауль Ҳаџьымба иазгәеиҭеит: “Сара лассы-лассы еиуеиҧшым азҵаарақәа рыла, уи – моу саппонентцәа рганахьалагьы иаарымчны, иаахжәаны аинформациа ҟазҵо, мамзаргьы згәаанагара зҳәо уаҩык иаҳасабала исыхцәажәон. Иҟалап уи ахьиашоу ыҟазаргьы. Аха сара аҽынкылара сҽасыршьцылеит. Ҳара аизыӡырҩреи аилибакаареи ҳабжьазароуп. Агәра ганы сыҟоуп, аҵыхәтәантәи аамҭа иалагӡаны иҳалҳаршаз зегьы – уи сара мацара сусура ишалҵшәамхаз, уи еиҳарак, аппозициа ацивилизациатә еизыҟазаашьақәа рҳәаақәа ирҭагӡаны азыӡырҩреи, аимак-аиҿак амҩаҧгареи, аилацәажәареи ралахәхара ауп изыбзоуроу”. 

Апресс-конференциа хыркәшо, Аҳәынҭқарра Ахада Аҧсны ажәлар иааиуа Ашықәс Ҿыц Аныҳәеи Иаса Қьырса Иира Амши рыдиныҳәалеит. “Сара сыҧсҭазаара зегьы иалагӡаны знык-ҩынтә роуп Ашықәс Ҿыц Аҧсны анҭыҵ аҧылара санақәшәаз: уи арратә маҵзура санахысуази иҷыдоу ашкол аҿы аҵара анысҵози роуп. Егьырҭ ашықәсқәа зегьы рзы сара Ашықәс Ҿыц ҭаацәашәала аҩны саҧылоит. Ари, зегьы реиҳа аҧхарреи агәыразреи зцу, иузааигәоу рааигәара аҟазаара аныуҭаху ныҳәоуп”, – ҳәа иҳәеит Рауль Ҳаџьымба.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа