Ажәабжьқәа

Популярное

Рауль Хаджимба: 2008 шықәса нанҳәамза 8 рзы Аахыҵ Уаԥстәыла иҟалаз ахҭысқәа Қырҭтәыла аҭоурых нбан еиқәаҵәала ианхалоит

397
08.08.2019 15:15
Рауль Хаджимба: 2008 шықәса нанҳәамза 8 рзы Аахыҵ Уаԥстәыла иҟалаз ахҭысқәа Қырҭтәыла аҭоурых нбан еиқәаҵәала ианхалоит
Аҧсны иҟоу Аахыҵ Уаҧтәыла Ацҳаражәҳәарҭа аҿы нанҳәа 8, 2008 шықәсазы иҟалаз аибашьра иалааӡыз ҳаҭырла иргәаладыршәеит.

Аҟәа. Нанҳәамза 8. Аҧсныпресс. Дамеи Касланӡиа. Нанҳәамза 8 рзы, жәеиза шықәса раҧхьа Аахыҵ Уаԥстәыла Ареспубликаҿы излагаз аибашьра амш аҽны Аҧсны Аҳәынҭқарраҟны иҟоу Аахыҵ-Уаԥстәыла Ацҳаражәҳәарҭаҿы агәаларшәагатә усмҩаҧгатәқәа мҩаҧысит.

Нанҳәамзатәи аибашьраҿы иҭахаз ргәалашәаразы арахь имҩахыҵит Аҳәынҭқарра Ахада Рауль Ҳаџьымба, Жәлар Реизара – Апарламент аиҳабы Валери Кәарҷиа, аҧыза-министр Валери Бганба, Аҧсны иҟоу Урыстәылатәи Афедерациа аҷыдалкаатә зинмчы змоу Ацҳаражәҳәаҩ Алексеи Двинианин, Аҧсны иҟоу Преднестровтәи-Молдавтәи Ареспублика ахаҭарнак Гарри Купалба, Аахыҵ Уаҧстәыла адәныҟатәи аусқәа рминистр Дмитри Медоев.

Аҧсны иҟоу Аахыҵ Уаҧстәыла аҷыдалкаатә зинмчы змоу Ацҳаражәҳәаҩ Олег Бациев аиҧылара аартуа еизаз иргәалаиршәеит: “Иахьа 11 шықәса ҵит аҭынч уааҧсыра, Цхьынвал ахьчаҩцәа, иара убас урыстәылатәи абжьаҟазаратә аруаа ахьҭахаз, аҭынчреи ауаҩытәыҩсеи ирҿагылоу ацәгьоура мҩаҧгоуижьҭеи. Ҳарҭ еснагь иаҳҳәалоит, Аахыҵ Уаҧстәыла ахаан иахашҭӡом 2008 шықәса нанҳәамзазтәи урҭ амш хьанҭақәа раан ауаҧс жәлар рыцхырааразы игылаз аурыс солдаҭцәеи аофицарцәеи рфырхаҵара атәы. Рыхьӡ кашәара ақәым агрессор иҿагылараҟны жәҩахыр еибыҭарала иқәҧоз аурыси ауаҧс солдаҭцәеи, ауаҧс жәлар реиқәырхаразы, ари адгьыл аҿы аҭынчра ашьақәыргыларазы. Урҭ рыхьӡқәа ауаҧс жәлар абиҧарақәа ргәалашәараҿы наӡаӡа иаанхоит”.

Ахәҭакахьала, Аҧсны Аҳәынҭқарра Ахада Рауль Ҳаџьымба Урыстәылатәи Афедерациа анапхгара ишьҭырхыз аӡбамҭа иабзоураны, Аахыҵ Уаҧстәыла аҭынчра ашьақәыргылара алыршахеит ҳәа инаҵшьны иазгәеиҭеит: “2008 шықәса нанҳәамза 8 рзы Аахыҵ Уаҧстәыла иҟалаз ахҭысқәа Қырҭтәыла аҭоурых нбан еиқәаҵәала ианхалоит. Урҭ ауаҧс жәлар рганахь ала мацара акәмызт агеноцид амҩаҧгара рыҽҽазыршәоз. Урыстәыла анапхгара урҭ амшқәа рзы иҟанаҵаз ашьаҿа ҕәҕәа ашьҭахь ҳажәларқәа реиқәырхара алнаршеит. Рыхьӡ кашәара ақәым иҭахаз зегьы, аҭынч уааҧсыра, аибашьцәа, абжьаҟазаҩцәа, зыҧсҭазаара атәыла ахьчара иахҭнызҵаз”, – ҳәа иҳәеит Аҳәынҭқарра Ахада.

Аԥсны иҟоу Урыстәылатәи Афедерациа Ацҳаржәҳәаҩ Алексеи Двинианин, нанҳәамзазтәи аибашьра Қырҭтәыла аганахь ала ацкауразы иҟарҵоз аҽазышәарақәа шьақәзырҕәҕәаз акакәны иҟалеит ҳәа инаҵшьны иазгәеиҭеит: “2008 шықәса нанҳәамза 8 Кавказ агеополитикатә ҭагылазаашьа шьаҭанкыла изыҧсахыз рыцхәны иҟалеит. Мцҳәарыла Аахыҵ Уаҧстәыла иақәлаз ақырҭуа архәҭақәа цәгьацәыҧхамшьарала “адәышкәаҕьаз” захьӡу аоперациа алазгалаз Қарҭ аганахьала ацкауреи иаартны имҩыҧыргоз агрессиеи ирҿырҧшыганы иҟалеит. 2008 шықәса нанҳәамзазы Урыстәыла қәнагала, ламысцқьала Мраҭашәара ирҳәозаалакгьы, абылра иаҿыз Цхьынвал ацхыраара анаҭеит. Агәра згоит, ҩ-еибашьрак хацзыркыз ақырҭқәа Аҧсни Аахыҵ Уаҧстәылеи рыжәларқәа рҿаҧхьа иҟарҵаз ацәгьауразы аҭак ҟарымҵар амуа ишыҟало. Нанҳәамза 8 трагедиатә рыцхәны аҭоурых ианхалеит. Ари амш аҽны ҳара ҳаҭырла иахгәалашоит аахыҵ Уаҧстәыла ахьыҧшымреи аҭынчреи зхы ақызҵаз зегьы. Ари амш иара убасақырҭуа мпыҵахалара аҟынтәи ахақәиҭтәреи Аиааира агареи ирымшны иҟалеит. Аҧсни Урыстәылеи Аахыҵ Уаҧстәылеи ирыбжьоу имабзиаратә еизыҟазаашьақәа ессааира иҕәҕәахалааит, хра злоу аҿиара аиуааит! Ҳамчи ҳаахшыҩи еилаҵаны иҳалҳаршаша акыр ирацәоуп!”

Дмитри Медоев нанҳәамза, 2008 шықәса рыцхә еиқәацәаны иҿыцӡоу аҭоурых адаҟьақәа ирнылеит ҳәа иазгәеиҭеит. "Аха убри аан ари арыцхә – Аахыҵ Уаҧстәыла 600 шықәса раҧхьа иацәыӡыз аҳәынҭқарратәра  аиҭашьақәыргылара иадҳәалахеит. Ҳара Урыстәылатәи Афедерациа анапхгара  иаднакылаз нанҳәамзатәи аӡбамҭа акыр аџьшьара аҳҭоит, уи иаҵоу аҵак ду еилаҳкаауеит”, – ҳәа иҳәеит иара.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа