Ажәабжьқәа

Сулҭан Сосналиев Константин Озган изы: сара уи раҧхьаӡа акәны Ҟабарда иаҭааз Аҧсны аделегациа аилазаараҿы данызба, уи ажәлар рыбзиабареи рыгәрагареи змоу уаҩны дшыҟоу иаразнак еилыскааит

107
15.05.2019 12:12
Сулҭан Сосналиев Константин Озган изы: сара уи раҧхьаӡа акәны Ҟабарда иаҭааз Аҧсны аделегациа аилазаараҿы данызба, уи ажәлар рыбзиабареи рыгәрагареи змоу уаҩны дшыҟоу иаразнак еилыскааит
Аҧсны иналукааша ауаажәларра-политикатә усзуҩ Константин Озган иахьа иҧсы ҭазҭгьы 80-шықәса ихыҵуан.

Аҟәа. Рашәарамза 15. Аҧсныпресс. Иахьа Аҧсны иналукааша ауаажәларра-политикатә усзуҩ Константин Озган иҧсы ҭазҭгьы  80-шықәса ихыҵуан.

Аҧсны ауаажәларра-политикатә усзуҩ игәалашәараҿы дшаанхаз атәы Екатерина Бебиа лышәҟәы “Константин Озган” адаҟьақәа рҿы еиҭеиҳәоит Кавказ ашьхарыуа жәларқәа Рконфедерациа апрезидент Муса Шанибов: “Константин Константин-иҧа ҳара аӡәгьы иаҳзымыӡбоз Кавказ иҟоу азҵаара хада аӡбара илиршеит. Иҟоу абри ауп, шьала-дала еизыҟоу ажәларқәа рыда, Кавказ жәытә-натә аахыижьҭеи егьырҭ ажәларқәа жәпакы рхаҭарнакцәа ықәынхоит. Ахәҭакахьала, аказакцәа. Кавказ даара иҕәҕәаны иқәгылан аказакцәеи, егьырҭ ажәларқәа рхаҭарнакцәеи реизыҟазаашьа азҵаара. Иара, Константин Константин-иҧа  иоуп раҧхьаӡа аказакцәа рымариа аиура зылшаз. Ҳаргьы уи зны-зынла лафла, зны-зынла ҵабыргыҵәҟьаны ус иҧхьаӡаны ”Атаманцәа рҧыза” ҳәа ианиаҳҳәогьы ыҟоуп. Ростов, Ҟәбина, Терек, уҳәа рҟынтәи Нхыҵ Кавказ аказакцәа реилазаара атаманцәа зегьы уи рацәажәашьа дақәшәон, игәра ргартә аҟаҵара илиршеит. Иџьоушьаша, Константин Константин-иҧа акалмыкцәа ирыдҳәалаз апроблемагьы аӡбара илшеит, урҭгьы рацәажәашьа дақәшәеит. Аибырхахарақәа зцыз амомоентқәа рҭышәынтәалара илиршеит. Константин Озган ибзоурала аказакцәа реилазаарақәа зегьы Аконфедерациа иадгыланы Аҧсны ахьчаразы игылеит... Константин Константин-иҧа Ставрополь ақалақь аҿы аказакцәа реилазаарақәа зегьы рхаҭарнакцәа еизганы рҧылара анеиҿикааз аҽны, Урыстәылатәи аказакцәа реилазаара атаман (аамтак азы уи саргьы санидимкылазгьы сгәалашәоит), хықәкыла Кавказ ашьхарыуа жәларқәа Рконфедерациа ахаҭарнакцәа дырҧылац азы Москвантәи дааит. Ари азҵаарагьы қәҿиарала аӡбара алыршахеит Константин Озган ибзоурала...”

Ари ашәҟәы адаҟьақәа иара убас ирнылеит Аҧсны Афырхаҵа, аинрал  Сулҭан Сосналиев Константин Озган изы игәалашәарақәагьы: “Иареи сареи ҳаиқәшәараанӡа ҭаку шыбжьаз, ҳара, аҟабарда чқәынцәа Константин Озган иӡбахә ҳаҳахьан. Сара раҧхьаӡа акәны Ҟабарда иаҭааз Аҧсны аделегациа аилазаараҿы данызба, уи ажәлар рыбзиабареи рыгәрагареи змоу уаҩны дшыҟоу иаразнак еилыскааит. Сгәалашәараҿы иаанхеит уи Аконфедерциа аилатәараҿы иқәгылара. Азал аҿы итәаз зегьы еицҿакны – ари ауаҩ аполитикатә усзуҩ дууп ҳәа иазгәарҭеит. Уи апартиатә система аҿы иусуратә ҧышәа ду даараӡа инубаалон. Аха уи иара убас иацын аҟәышра, ахарахәыцра, агәеилгара. Аибашьра анцозгьы уи Аҧсны атәылахьчара аус активла далахәын. Аибашьра ашьҭахьтәи ашықәсқәа рызгьы уи еилаҧыхааса ишьҭаз Аҧсны аиҭашьақәыргылараҿы илиршаз акыр ирацәоуп…”



(АП): Константин Константин-иҧа Озган лаҵарамза 15, 1939 шықәса рзы Гәдоуҭа араион, Лыхны ақыҭан диит.

1967 шықәса рзы Қырҭтәылатәи асубтропикатә институт ибзиаӡаны далгеит. 

1967-1976 шш. – Гәдоуҭатәи ачаифабрика асмена аиҳабыс, анџьныр хадас, анаҩс адиректорс аус иуан.  

1976-1978 шш. – Гәдоуҭа араион анагӡком ақыҭанхамҩа Аусбарҭа аиҳабыс аус иуан. 

1978 по 1989 шш. – Гәдоуҭатәи апартиа араионтә Комитет сктәи амаӡаныҟәгаҩыс аус иуан, аамҭак ала (1978-1990 шш.) Аҧснытәи АССР Иреиҳаӡоу Асовет адепутатс дыҟан.

1978-1987 шш. – Аҧснытәи АССР Иреиҳаӡоу Асовет Апрезидиум ахантәаҩы ихаҭыҧуаҩыс дыҟан.

1981 ш. рзы Асовет Еидгыла Акоммунисттә Партиа Акомитет Хада (ЦК КПСС) Иреиҳаӡоу апартиатә школ ибзиаӡаны далгеит. 

1987-1990 шш инаркны – Аҧснытәи АССР Иреиҳаӡоу Асовет ахантәаҩыс аус иуан.

1978 -1989 шш. – Аҧсны имҩаҧысуаз аполитикатә хҭысқәа зегьы активла далахәын. Аҧсуа жәлар рмилаҭтә-хақәиҭратә қәҧара ихы ахьалаирхәуаз азы,  Қырҭтәыла анапхгара аҧшьгарала, апартиа Гәдоуҭа араионтә ҟәша актәи амаӡаныҟәгаҩ имаҵураҭыҧ аҟынтәи ихы дақәиҭтәхеит.

1989 ш. рзы абжьқәа реиҳарак иоуны, Гәдоҭа араион анагӡаратә Комитет ахантәаҩыс далырхит. Иара убасҟанҵәҟьа, Қырҭтәылатәи Асоциалисттә Республика Апрокуратура аҧшьгарала, Асовет Еидгыла Апрокуратура аполитикатә хҭысқәа рылахәхара азы ашьауҕатә усеилыргара хацнаркуеит. 

1989-1994 шш. – Кавказ ашьхарыуа жәларқәа Рконфедерациа активла ихы алаирхәуан; Кавказ ашьхарыуа жәларқәа Рконфедерациа (КНК) кавказтәи аилазаарақәа Рхеилак ахантәаҩыс дыҟан. 

1991-1996 шықәсқәа инадыркны – Ареспублика Аҧсны Иреиҳаӡоу Асовет – Апарламент адепутат; апрезидиум алахәыла, асоциал-економикатә ҿиара азы апарламенттә Комиссиа ахантәаҩы. 

1992-1993 шш. Аҧсны Аџьынџьтәылатәи еибашьра аан – атәылахьчаразы аҳәынҭқарратә комитет алахәыла. 

Нхыҵ Кавказынтәи, Алада Урыстәылантәи аказакцәа, аҳәаанырцәтәи аҧсуа-база жәлар рдиаспора, уҳәа  Аҧсныҟа хатәгәаҧхарала еибашьра иааз аибашьцәа рхаҭарнакцәа рыбжьара мҽхакы ҭбаала аусура наигӡон. Аҧсны анапхгара анапынҵала, Краснодартәии Ставропольтәии атәылаҿацәқәа, Ростовтәи аобласть, Адыгеиа, Ҟарачы-Черкессиа, Ҟбарда-Балкариа, Аахыҵ Уаҧстәыла, Ингушетиа, Чечентәыла, Дагьсҭан рхадацәа изныкымкәа дырҧылахьан.

1996-1997 шш. – Ареспублика Аҧсны адәныҟатәи аусқәа рминистрс аус иуан.

1997-1999 шш. – Аҧсны аҧыза-министр актәи ихаҭыҧуаҩ, аекономика аминистрс дыҟан.

Ҧхынҷкәынмза, 1999-2002 шш. инаркны  – Ареспублика Аҧсны ашәахтәқәеи аизгақәеи рзы аҳәынҭқарратә Маҵзура ахантәаҩыс аус иуан.

2002-2007шш. инаркны Аҧсны Жәлар Реизара- Апарламент аиҳабы ихаҭыҧуаҩыс дыҟан.

2009-2016 шш. инаркны  – Ареспублика Аҧсны абыргцәа Рхеидкыла напхгара аиҭон.

“Аорденқәа “Аҳаҭыр Адырга”, “Ахьӡ-Аҧша» II аҩаӡара, ҧсрашьҭахь  Леон иорден ианашьоуп.

Иҧсҭазаара далҵит хәажәкырамза 22, 2016 шықәса рзы Аҟәа ақалақь аҿы.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа