Ажәабжьқәа

Валери Бганба ашкол ҿыцқәа аҵарашықәс алагара ишазхиоу гәеиҭеит

975
01.09.2019 20:43
Валери Бганба ашкол ҿыцқәа аҵарашықәс алагара ишазхиоу гәеиҭеит
Аҵараиурҭақәа Аҧсны Аҳәынҭқарра асоциал-економикатә ҿиара ацхырааразы Аинвестициатә Программа ахарџь ала еиҭашьақәыргылан.

Аҟәа. Цәыббрамза 1. Аҧсныпресс. Аҵарашықәс ҿыц аламҭалазы атәыла аҧыза-министр Валери Бганба ареспубликаҿы иҟоу ашколқәа аҵаҩцәа рыдкылара ишазхиоу гәеиҭеит.



Убас, Гәдоуҭа араион аҿы атәыла Анапхгара ахада Платон Шьаҟрыл ихьӡ зху лыхнытәи абжьаратәи ашкол даҭааит. Ашкол анапхгараҭара иҟанаҵо адыррақәа рыла, аргылаҩцәа ргәыҧ ари аҵараиурҭа аҿы аиҭашьақәыргыларатә усурақәа аҵыхәтәанынӡа инарыгӡеит. Арҵаҩратә еилазаара ашкол активистцәа рыцырхырааны аҩнымацәа, аинвентарь, иара убас арҵагатә цхыраагӡатәқәа рыргылара иаҿуп.

Лыхны ақыҭан иҟоу ашкол аиҭашьақәыргылара хацыркын 2017 шықәсазы. Уи мҩаҧысуан Аҧсны Аҳәынҭқарра асоциал-економикатә ҿиара ацхырааразы Аинвестициатә Программа ахарџь ала.



Апроект инақәыршәаны, ҧшьбаны еихагылоу ари аҵараиурҭа аҿы иҟоуп 50 инарзынаҧшуа аклассқәа, иҟоуп иара убас ҷыдала ирхиоу аџьауси ахимиеи ркобинетқәа. Ашколтә спортзал аҵакыра  370 м2 рҟыӡа инаӡоит. Убри аан ашкол ауадақәа зегьы ааизакны рҵакыра  6 600 м2 рҟынӡа инаӡоит.

Ахыбра афымцатә рҧхага асистема ала еиқәыршәоуп, иара убас авидеохылаҧшра  асистемагьы амоуп. Ашколтә крыфарҭеи афатәҟаҵарҭатә ҟәшеи архьшәагагақәеи, афатәҟаҵаразы еиуеиҧшым ахархәагақәеи рыла еиқәыршәоуп.



Аргылаҩцәа иҟарҵаз аҳасабырба инақәыршәаны, ауадақәа рыпроектҟаҵараан асанитар-техникатәи абылрацәыхьчаратәи анормақәа зегьы ҳасаб рызун.

Аҧсны Аҳәынҭқарра шьаҭанкылатәи аргылара Аусбарҭа адыррақәа рыла, аобиект ахарџьнҵа 135 млн 920 нызықь мааҭ рҟынӡа инаӡоит.

Цәыббрамза 2, 2019 шықәса рзы ари ашкол ҩышә-ҩык аҵаҩцәа рзы ашәқәа аанартуеит.



Атәыла аҧыза-министр Валери Бганба иара убас Очамчыра араионгьы даҭааит. Араҟа иара игәеиҭеит Николаи Воуба ихьӡ зху Ҭхьынатәи абжьаратәи ашкол. Уи аргылара ҳазҭоу ашықәс нанҳәамзазы ихыркәшахеит.

Атәыла Анапхгара ахадеи Аҧсны шьаҭанкылатәи аргылара Аусбарҭа анапхгараҭареи, иарбоу аобиект аҿы аусурақәа назыгӡоз анардкыларатә еиҿкаара ахаҭарнакцәа ирҧылеит.



Апроект инақәыршәаны аргылара иазоужьыз аҵакыра 1 800 м2 рҟынӡа инаӡоит. Ҩбаны еихагылоу ари аҵараиурҭа ахыбра аҿы 14 класс ыҟоуп. Уахь иаҵанакуеит иҭбааҭыцәу аспорттә зал, абиблиотека, акрыфарҭа, иҷыдоу амаҭәарқәа –  ахимиа, афизика, аинформатика, атехнологиа рзы аклассқәа.



Аинформатика акласс акомпиутертә техника ала еиқәыршәоуп, азыҟаҵарақәа рымҩаҧгара иазхиоуп.



Атехнологиа аҽазыҟаҵаразы иазоужьу аклассқәа рҿы аӡахыга машьынақәа шьақәыргылоуп, алабҿабатә цхыраагӡатәқәа, иара убас анаплых аҿызааразы ихымҧадатәиу аинвентарь ала еиқәыршәоуп.



Ашкол аҿы аҵаҩцәа рхыҧхьаӡара цәыббрамза 2, 2019 шықәса инаркны 120-ҩык рҟынӡа инаӡоит. Аҧсны Аҳәынҭқарра асоциал-економикатә ҿиара ацхырааразы Аинвестициатә Программа ахарџь ала еиҭашьақәыргылоу ари аобиект ахарџьнҵа 80 миллион мааҭ иреиҳауп.



Аусуратә ҭаара ахыркәшамҭаз Валери Бганба Аладатәи Џьырхәа ақыҭа даҭааит. Араҟа ақыҭамҩақәа руак аҿы акаҭран ақәҵара иадҳәалоу аусурақәа хацыркын. Валери Бганба аргылара амҩаҧысшьеи атехнологиатә процесс аиҿкаареи ахшыҩзышьҭра аиҭеит.

Ақыҭаҿы амҩа аргылара мҩаҧысуеит Ареспубликатә биуџьет ахарџь ала.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа