Ажәабжьқәа

Популярное

Витали Дараселиа ииубилеи аламҭалазы Имемориал ареставрациа азуп

186
06.10.2017 13:17
Витали Дараселиа ииубилеи аламҭалазы Имемориал ареставрациа азуп
Очамчыра ақалақь аҿы Асовет Еидгыла зҽаҧсазтәыз аспорт азҟаза Витали Дараселиа имемориал ареставорациа азура иадҳәалоу аусурақәа хыркәшахеит.

Аҟәа. Жьҭаарамза 6. Аҧсныпресс. Мадина Чагәааҧҳа. Асоветтә шьамылампыласҩы, абжьаорахьчаҩ, зҽаҧсазтәыз аспорт азҟаза Витали Дараселиа 60-шықәса ихыҵра аиубилеи аламҭалазы, ашьапылампыласҩы иқалақь гәакьа аҿы игылоу имемориал арестоврациа азуп. Абри атәы Аҧсныпресс акорреспондент диҿцәажәо иҳәеит ахәыҷтәы шьапылампылтә клуб “Динамо-Сухум” азыҟаҵаҩ Мераб Кәакәасқьыр.

Мераб Кәакәасқьыр иҟаиҵаз адыррақәа рыла, амемориали уи акәша-мыкәшеи  аиҭашьақәыргыларатә усурақәа рымҩаҧгара хыркәшоуп. “152 метра рҟынӡа инаӡо, абаҟа иакәаршаз агәара ҧсаххеит, иҿыцу алампионқәа шьақәыргылан, абаҟа иаҵанакуа атерриториа ариаҵәара рҽеин, ахаҳәцәымҩа рҿыцын. Амемориал ахаҭа амармалташьи ахаҳәи ирылхын. Аиҭашьақәыргыларатә усурақәа ирықәхарџьхеит 2 миллион мааҭ инарзынаҧшуа”, – ҳәа иҳәеит Мераб Кәакәасқьыр.

Мераб Кәакәасқьыр иара убас иҟаиҵаз адыррақәа рыла, аусурақәа рынагӡаразы ацхыраара ду анаҭеит атәыла аминистрцәа Реилазаара, абаҟа иаҿыкәаршоу агәара аргылара зхахьы изгаз Москватәи аҧсуа Диаспора, Гагра араион Ахадара иарбоу аус 100 нызықь мааҭ азоунажьит, Очамчыра араион Ахадара аусмҩаҧгатә аусуратә техника ала еиқәнаршәеит, амемориал иаҵанакуа атерриториа ариаҵәара мҩаҧнагеит. Иара убас ацхыраара ду ҟарҵеит: хаҭалатәи анаплакыҩцәа Џьон Ҭаркьыл, уи ихатәы харџь ала амҩатә хаҳәцәы ааихәеит, Денис Тапаҕәуа – амемориал уахынла арлашаразы арлашагақәа аахәаны инаишьҭит, Ҭырқәтәылантәи хаҭалатәи анаплакҩы Мизан Хапат – ацемент, аҷабга, уҳәа егьырҭ амаҭәахәқәа рыла аиқәыршәара маҧигеит.

Мераб Кәакәасқьыр, аиҭашьақәыргыларатә усурақәа рымҩаҧгара азы абжьгара ҟазҵаз Аҧсны абҩарҵәыреи аспорти рзы аҳәынҭқарратә Еилакы ахантәаҩы Баграт Хәытабеи Аҧсны ашьапылампыл азы Афедерациа апрезидент Џьума Кәарацхьелиеи роуп ҳәа иазгәеиҭеит.

Ахәҭакахьала, Очамчыра араион Ахадара аҿари аспорти рыҟәша аиҳабы Ҭемыр Ҧачлиа, жьҭаарамза 9, Витали Дараселиа иира амш аҽны имемориал аҿаҧхьа алахьеиқәҵаратә митинг аиҿкаара азҧхьагәаҭоуп ҳәа адырра ҟаиҵеит. Иарбоу аусмҩаҧгатә рхы аладырхәраны иҟоуп араион Ахадара ахаҭарнакцәа. Ашьапылампыл аветеранцәа, ақалақь ауааҧсыра. “Анаҩс, Аҟәа ақалақь астадион хада аҿы зыхьӡ нагоу аспортсмен игәалашәара иазкны ашьапылампылтә клуб “Ерцахә” Аҧсны еизгоу акомандеи рветеранцәа рыбжьара аиҩызаратә матч мҩаҧгахоит”, – ҳәа иҳәеит Ҭемыр Ҧачлиа.



(АП): Витали Дараселиа жьҭаарамза 9, 1957 шықәса Очамчыра ақалақь аҿы диит. Асовет Еидгыла ашьапылампыл, абжьарахьчаҩ, Асоветтә Социалисттә Республикақәа Реидгыла аспорт азҟаза. Испорттә усура ашықәсқәа рҕьырак Қарҭтәи “Динамо” азы иқәгылара иазкын. 1980-1981 шықәса азы Ахраҿақәа рыхраҿа аматч аҿы акоманда “Карл Цейсса” амба аамҭа хада анҵәамҭанӡа 3 минуҭк шагыз зегь зыӡбо ампыл ҭаиршәит. Иҟалаз автомашәыр иахҟьаны дҭахеит. Витали Дараселиа амилаҭтә фырхаҵа иаҳасабала Иҧсадгьыл аҿы иқалақь гәакьа Очамчыра анышә дамадоуп.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа