Ажәабжьқәа

Популярное

Витали Габниа атәылауаҩшәҟә ҿыцқәа рыҭара азы: апроцедура ырмариахоит, аха азагхарақәа ҟалаӡом!

125
01.11.2017 15:59
Витали Габниа  атәылауаҩшәҟә ҿыцқәа рыҭара азы: апроцедура ырмариахоит, аха азагхарақәа ҟалаӡом!
Аҧсны Ауаажәларратә Палата аҿы атәылауаҩшәҟә ҿыцқәа рыҭара  иадҳәалоу апроблема алацәажәара иазкны аилатәара мҩаҧысит. 

Аҟәа. Абҵарамза 1. Аҧсныпресс.  Дырмит Басариа.  Аҧсны Ауаажәларратә Палата аҿы атәылауаҩшәҟә ҿыцқәа раиура иадҳәалоу апроблема иалацәажәеит. Аилатәара рхы аладырхәит Аҧсны Аҳәынҭқарра Ахада ихаҭыҧуаҩ Витали Габниа, аҩныҵҟатәи аусқәа рминистр Гарри Аршба, Аҧсны аҩныҵҟатәи аусқәа Рминистрра апаспорттә усбарҭа анаҧхгаҩы Едуард Манаргиа.  

Витали Габниа Ауаажәларратә Палата алахәылацәа атәылауаҩшәҟәқәа рыҭара апроцедура атәы рзеиҭеиҳәеит: “Аҧсуа тәылауаҩшәҟәы иҿыцу ахкы рыҭара, уи азы аусшәҟәқәа ралаҵара амш инаркны15 усуратә мшы ирылагӡаны имҩаҧысуеит.  Атәылауаҩшәҟәы аҭара аамҭа иацҵахар алшоит уи раҧхьаӡа  акәзар, мамзаргьы уаанӡа уи аиура Аҧсны азакәанҧҵара аилагара ацызҭгьы. Усҟан атәылауаҩшәҟәы зауа ҷыдала агәаҭара дахысуеит, уи абжьааҧны аасҭа еиҳаны аамҭа  агоит.   Ас еиҧш аусқәа ирыхәаҧшуеит атәылауаҩра аиура азы иаҧҵоу Акомиссиа. Уи аилазаараҿы иҟоуп 7-ҩык ауаа. Агәаҭара апроцесс  иалагӡаны Аҧсны аҳәынҭқарратә шәарҭадара азы Амаҵзура ахь азыҳәамҭақәа дәықәҵахоит. Ианаҭахха аамҭазы, Урыстәылатәи Афедерациа Афедералтә Шәарҭадара Амаҵзура ахьгьы идәықәҵахоит. Иара убас атәылауаҩшәҟәы аиура азы арзаҳал алазҵаз аҳәынҭқарратә бызшәеи Аҧсны Аконституциеи рдырра азы адырранҵабгьыц имазар ахәҭоуп. Арҭ аусмҩаҧгатәқәа 3 инаркны 6-мзы рҟынӡа аамҭа агоит”. 

Витали Габниа иҟаиҵаз алкаақәа рыла,  рықәра наӡаны ианыҟала нахыс 1994- 1999 шықәсқәа рзы Аҧсны инымхозгьы  иара убас ҿыц атәылауаҩра аиуразы апроцедура ахысра зыхәҭоу ауаа ркатегориа иаҵанакуеит.  Ари аҧҟара “Атәылауаҩра азы” Азакәан ахәҭаҷ 5 аҿы иарбоуп. 

Ахәҭакахьала, агуманитартә программақәа Рцентр ауаҩы изинқәа рыхьчаразы ауаажәларратә адкыларҭа  акоординатор Асида Шьаҟрыл аилатәара алахәылацәа зегьы ауааҧсыра рҟынтәи иааз ашшабҕьыцқәа рыхәаҧшра алҵшәақәа рыла еиқәыршәаз аналитикатә нҵа дырзаҧхьеит: “Ҳара Аҧсны ауааҧсыра рыуаажәларратә зинқәа реилагара иадҳәаланы ироуа апроблемақәа рзы адыррақәа ҳамоуп, избан акәзар урҭ ацхыррара аиуразы активла ҳара иҳадҵаалоит.  Аҵыхәтәантәи аамҭа азы ажәытә тәылауаҩшәҟәы уи иҿыцу ахкы ала аҧсахраан имаҷымкәа апроблемақәа зызцәырҵыз ауаа лассы-лассы иаҳзаауеит. Ишеилкаахаз ала, иҟоуп  ихадоу апроблемақәа ҩба: апаспорттә стол аусзуҩцәа ламысла русура азнеиреи, азакәанҧҵара аҿы иҟоу азымхарақәеи агхақәеи. 2005 шықәсанӡа аус зуаз атәылауаҩра азы азакәан аҿы  изеиҧшразаалак аамҭа иалагӡаны еиҧмырҟьаӡакәа Аҧсны ақәынхара ахымҧадатәра азы ахәҭаҷ ыҟаӡамызт. Ари аиҭакра акыр аамҭа рышьҭахь ауп ианалагалаха. Убри аҟнытә аӡәырҩы Аҧсны иалҵны ианцоз ас еиҧш апроблемақәа ирықәшәар алшоит ҳәа рхахьы ирзаагомызт. Иагьа ус иҟазаргьы, 1994 инаркны 1999 шықәсанӡа атәыла ааныжьны ицаз, ахныҟәгара, аҵараиурҭақәа рҿы аҵараиура, уҳәа реиҧш иҟоу анажьратә мзызқәа рымазар алшон.  Аҭагылазаашьа убри аҟара аҵакыдара аҟынӡа инеит, апаспорттә столқәа рҿы Аҧсны Аџьынџьтәылатәи еибашьра активла иалахәыз, аха аибашьрашьҭахь атәыла ааныжьны ицаз ауаа иажәу атәылауаҩшәҟәқәа уи аҿыц хкы ала  рыҧсахра мап анырцәыркуагьы ыҟоуп.   Иазгәаҭатәуп,  бжеиҳан егьырҭ амилаҭқәа иреиуоу ауаа роуп ас еиҧш ахҭысқәа ирықәшәо.  Атәылауаҩшәҟәы ажәытә хкы аҿыц хкы ала аиҭныҧсахлара, атәылауаҩра ашьақәырҕәҕәареи, мамзаргьы уи аанкылареи ирыдҳәалоу процедураны иҟамлароуп.  Убас ала, 2005 шықәсазы аус зуаз атәылауаҩразы Азакәани уи иаҵанакуа ашәҟәынҵақәеи Аҧсны Аконституциа иахьынӡақәшәо аилкааразы хымҧада иҭҵаатәуп”. 

Азинхьчаҩцәа ражәалагалақәеи рызгәаҭарақәеи рҭак ҟаҵо, Аҳәынҭқарра Ахада ихаҭыҧуаҩ иазгәеиҭеит:  “Аҧсны ахьыҧшымра азхаҵара аныҟала ашьҭахь, аӡәырҩы ҳҳәынҭқарра атәылауаҩра роур рҭаххеит, урҭ рхыҧхьаӡараҿы атәылауаҩшәҟәы “аазхәазгьы” ыҟан.  Убри аҟнытә, ауаа атәылауаҩра роура иамоу азакәантә шьаҭа азы реиҭагәаҭара хымҧадатәиуп ҳәа иҳаҧхьаӡоит. Ҳара жәаҳәарада, иарбоу апроцедура агхақәа амазар шалшо еилаҳкаауеит, убри азы атәылауаҩшәҟәы аиҭныҧсахлара иадҳәалоу апроцедура еиҳа ирмариахоит, аха азагхарақәа ҟалаӡом! Иҟаҵаз азинеилагарақәа рзы  иахәҭоу аҭакҧхықәра аӡәгьы дзацәцом!” 

Асида Шьаҟрыл иҟалҵаз аҳәамҭа далацәажәеит Едуард Манаргиа: “Апаспорттә маҵзура еиҳа еиҕьны аус ауазҭгьы, ас еиҧш аҳәамҭақәа еиҳагьы ирацәахон. Аибашьра иалахәыз атәылауаҩшәҟәы аиуразы мап рыцәкра иадҳәалоу ахҭысқәа иаадырҧшуа акы заҵәык ауп,- азакәан зегьы рзы еиҧшны аус ауеит”. 

Едуард Манаргиа иҟаиҵаз адыррақәа рыла, апаспорттә маҵзура ала иахьазы атәылауаҩшәҟәқәа иҿыцу ахкқәа рзы 41 145 бланк ылҩаауп. Урҭ рхыҧхьаӡараҿы иҟоу 66 – атәылауаҩра аиуразы акомиссиа ахь идәықәҵоуп, ари ахыҧхьаӡара ҳаҧхьаҟа ессаира еизҳалоит. 

Убри аан, атәыла аҩныҵҟатәи аусқәа рминистр Гарри Аршба аҩныҵҟатәи аусқәа Рминистрра ҧсымцқьарыла зус иазнеиуа апаспорттә столқәа русзуҩцәа  ирыхәҭоу  ақәнага рақәыршәара азы аусуреи ахылаҧшра амҩаҧгареи ишазхиоу еизаз агәра диргеит.  Уи азакәанҧҵара аҿы азымхарақәа  шыҟоу, аха урҭ атәыла  анаҧхгаратәи ауаажәларратәи аструктурақәа еиқәшаҳҭны русецурала рыриашара шалшо азгәеиҭеит.


Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа