Ажәабжьқәа

Популярное

Владимир Гериа: иааиуа ашықәс азы 3 нызықь гектар инарзынаҧшуа ақәаарыхырҭақәа ишҳамырку ахимиатә маҭәашьарқәа рыла аус рыдулахоит

157
06.11.2017 17:13
Владимир Гериа: иааиуа ашықәс азы 3 нызықь гектар инарзынаҧшуа ақәаарыхырҭақәа ишҳамырку ахимиатә маҭәашьарқәа рыла аус рыдулахоит
Апты ҟаҧшь ақәгара азы “Зондер” ҳәа изышьҭоу ахәшәмаҭәашьар иалоу аеффективреи уи ахархәараан иахәҭоу ахымҩаҧгашьеи ртәы Аҧсныпресс акорреспондентцәа Аҧсны ақыҭанхамҩа Аминистрреи Аҧсны Аҭҵаарадыррақәа Ракадемиа иатәу аекологиа Аинститути рҿы ирзеиҭарҳәеит.

Аҟәа. Абҵарамза 6. Аҧсныпресс. Мадина Чагәааҧҳа /Дамеи Касланӡиа. Ақыҭанхамҩа аалыҵқәа ааха ҕәҕәа рызҭо апты ҟаҧшь ҳәа изышьҭоу аҧхасҭа зырҿио ахәаҷа-маҷа хкы аҿагылара азы Аҧсныҟа иаагаз ишҳамырку ахимиатә маҭәашьарқәа иалоу аеффективреи уи ахархәараан иахәҭоу ахымҩаҧгашьеи ртәы Аҧсныпресс акорреспондентцәа ирзеиҭарҳәеит Аҧсны ақыҭанхамҩа Аминистрра аҵиаақәа рзы амаҵзура анаҧхгаҩы Владимир Гериеи Аҧсны Аҭҵаарадыррақәа Ракадемиа иатәу аекологиа Аинститут адиректор Роман Дбари.   

Владимир Гериа иажәақәа рыла ишеилкаахаз ала, апты ҟаҧшь ақәгара азы Аҧсныҟа иаагаз “Зондер” ҳәа изышьҭоу ахәшәмаҭәашьарқәа “Бифетринин” ҳәа хыс измоу апестицидқәеи аферомонқәеи рыла ишьақәгылоуп. “Иарбоу ишҳамырку ахимиатә маҭәашьар аҵиаақәа ааха ҕәҕәа рызҭо ахәаҷа-маҷа хкқәа рҿагылара азы акыр аеффектира злоу хархәагоуп. Ҳара апестицидқәа рхәархәара иадҳәаланы аҧышәа ду ҳамоуп. Сынтәа Аҧсны ахимиатә маҭәашьарқәа рыла 5 нызықь гектар инарзынаҧшуа ақәаарыхырҭақәа аус рыдулан, уажәазы ари амаҭәашьар  аганахьала аҽҧныҳәара ҟамлаӡацт”, – ҳәа иҳәеит Владимир Гериа.  

Владимир Гериа иҟаиҵаз адыррақәа рыла, уажәазы Аҧсныҟа иааит 2,5 тонн рҟынӡа ишҳамырку ахимиатә маҭәашьарқәа. “Гектарк аус адулара азы 1литрак инарзынаҧшуа “Зондер” ҳәа изышьҭоу амаҭәашьар аҭаххоит. Убас ала, иҳамоу ахимиатә маҭәашьарқәа рыла иааиуа ашықәс ҿыц азы 3 нызықь гектар рҟынӡа ақәаарыхырҭақәа аус рыдаҳулартә ҳаҟоуп. Раҧхьатәи аусурақәа ирылагоит лаҵарамза алагамҭа инақәыршәаны, аҵиаақәа ашәҭра иалагаанӡа. Аха зныктәи аусдулара мызкы иалагӡаны ауп аеффективра анамоу, анаҩс уи даҽа знык имҩаҧгатәхоит. Иҳауз ишҳамырку ахимиатә маҭәашьарқәа ақыҭанхамҩа Аусбарҭа Ақәҵарала ареспублика араионқәа 5 рахь еихшан”, – ҳәа иҳәеит Владимир Гериа. Владимир Гериа ишҳамырку ахимиатә маҭәашьарқәа рхархәараан аспециалистцәа атәыла аекологиатә система аҭагылазаашьа ҷыдала иацклаҧшлоит ҳәа агәра ҳиргеит. “Атәыла ақыҭанхамҩа азы  астратегиатә ҵакы змоу аҵиаа хкқәа роуп аус зыдулахо. Уи араса, ацитрусқәа, ажь, уҳәа роуп. “Зондер” ашәарҭара ахҧатәи акласс змоу маҭәашьаруп, даҽакала иуҳәозар, ахархәараҿы еиҳа имаҷны ааха зырҿио маҭәашьарны иҟоуп. Ари ахимиатә маҭәашьар иарбоу ахыҧхьаӡарала ахархәара аекологиатә шәарҭадара аганахьала аспециалистцәа митәык агәҭынчымра рызцәырнагом. Аха уеизгьы, аки-аки иацәыхарамкәа еиҭаҳау аҵиаақәа аус рыдулараан хымҧада изықәныҟәатәу аҽацәыхьчаратә уснагӡатәқәагьы ыҟоуп”.   

Ишҳамырку ахимиатә маҭәашьарқәа рхархәараан агәаҽанызаара шаҭаху азы иҳәеит Роман Дбаргьы: “Жәаҳәарада, ахимиатә маҭәашьарқәа–аекосистема азы хра злам усуп, аха ахәаҷа-маҷақәа идырҿио аҧхасҭеи ақыҭанхамҩатә аалыҵқәа рыхьчареи рыбжьара акомпромисс аҧшаара ахәҭоуп”. 

Роман Дбар ишҳамырку ахимиатә маҭәашьарқәа рхархәараан агәаҽанызаара аарҧшра шаҭаху азгәеиҭеит: “аусурақәа рхыркәшараанӡа ашьхымӡақәа реиҭагара хымҧадатәиуп. Амаҭәашьарқәа зегьы рхатәы ҽҳәараамҭа рымоуп, уи аамышьҭахь аус зыдулаз ақыҭанхамҩатә аалыҵ афара ашәарҭара аҵаны иҟалаӡом. Зыӡбахә ҳамоу арҭ амаҭәашьарқәа иацу аинструкциа иақәыршәаны ианаамҭоу ахархәара хымҧадатәиуп”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа