Аҟәа ақалақьтә Еизара адепутатцәа аӡы ахархәаразы ахәԥсақәа рыԥсахра азҵаара иахәаԥшит.

08.Нанҳәа.2024

Аҟәа ақалақьтә Еизара адепутатцәа аӡы ахархәаразы ахәԥсақәа рыԥсахра азҵаара иахәаԥшит.

Аҟәа. Нанҳәамза 8, 2024 шықәса. Аԥсныпресс. Аҟәа ақалақьтә Еизара адепутатцәа реилатәара мҩаԥысит аԥшьаша, нанҳәамза 8 рзы. Аилатәара аҿы ишьҭыхыз атемақәа ируакуп ӡыла аиқәыршәареи аӡымҩахгареи рзы атарифқәа ртема.

Аҳҭнықалақь ахада Беслан Ешба ажәалагала ҟаиҵеит кубометрк азы 4 мааҭк рҟынтәи хә- мааҭк рҟынӡа ашьҭыхразы. Уи иажәақәа рыла, аӡы ахархәаразы ауааԥсыра имаҷны ахә ршәоит, уи аан дара ӡыла реиқәыршәаразы ахарџь маҷымкәа иаҭахуп.

Азҵаара аимак-аиҿак цәырнагеит. Аилацәажәара алҵшәақәа рыла, еиуеиԥшым ахархәаҩцәа ркатегориақәа рзы аӡы кубометрк ахархәаразы есымзатәи ахәԥсақәа шьақәыргылан:

- аԥхьаӡагақәа ззықәгылоу анхацәа рзы 1 кубометрк аӡы азы — 4 - мааҭк, аԥхьаӡагақәа ззықәгылам анхацәа рзы — 1 кубометрк аӡы азы 10 -мааҭк;

- аҳәынҭқарратә усбарҭақәеи абиуџьеттә еиҿкаарақәеи рзы 1 кубометрк аӡы азы — 70 мааҭ;

- ааглыхратәии акоммерциатәии еиҿкаарақәа рзы 1 кубометрк аӡы азы — 100 мааҭк;

- Аԥсны хылаԥшра знамҭо анаплакқәеи, аиҿкаарақәеи, аусбарҭақәеи рзы 1 кубометрк аӡы азы — 210 мааҭ.

Адгьылтә хәҭақәа аӡы рықәҭәаразы атариф ашьақәыргылара азҵаара ашьҭыхра адепутатцәа мап ацәыркит.

Ас еиԥш аӡбамҭа рыдыркылеит нанҳәамза 8 рзы имҩаԥысыз Аҟәатәи ақалақьтә Еизара адепутатцәа реилатәара аҿы.

Read 143 times - Амҽыша, 11 Нанҳәа 2024 01:18