Михаил Мурашко Ареспубликатә хәышәтәырҭа иахьаҵанакуа антиографиа аппарат азы ахыбра аргылара шымҩаԥысуа гәеиҭеит.
Аусурақәа агәабзиарахьчара Аминистрра иҟанаҵаз атехникатә хыдҵа инақәыршәаны имҩаԥысуеит.
Зыргылара мҩаԥысуа аобиект аҿы иҷыдоу аҳауаҭышәныртәалара асистема аҭахны иҟоуп, иара убас арентгенцәыхьчаратә ашәқәа, аԥенџьырқәа, апанельқәа.
«Аргыларатә усурақәа ирласны имҩаԥысуеит. Ааигәа аихагылаҩкаага ҭадырҭәааит», - ҳәа иҳәеит Аԥсны агәабзиарахьчара аминистр Едуард Быҭәба.
Миихаил Мурашко лаҵарамза 15-нӡа аргылара иадҳәалоу атехникатә зҵаарақәа зегьы шыӡбахо азы агәыӷра ааирԥшит.
Анаҩс изҭааз обиектны иҟалеит Ахәыҷтәы республикатә хәышәтәырҭа аргылара иахьаҿу аплошьадка.
Ари амедусбарҭа аргылара мҩаԥысуеит Аԥсны асоциал-економикатә ҿиара адгылара аҭара иазку Аинвестициатә программа аҳәаақәа ирҭагӡаны. Ахәышәтәырҭа аусура алагара азԥхьагәаҭоуп 2026 шықәса рзы.
«Атехникатә уадаҩра ҳәа акгьы ыҟаӡам, апроект еиқәыршәоуп, еиқәыршаҳаҭуп, аусурақәа зегьы урыстәылатәи аекспертиза иахысыз апроект инақәыршәаны имҩаԥысуеит. Иахьатәи амш азы аванс аҳасабала иазоужьхеит 191 млн. мааҭ. Аусурақәа зегьы рхаҭабзиара ҳаракуп, аҽҳәарагьы инақәыршәаны инагӡахоит», - ҳәа иҳәеит Аԥсны Шьаҭанкылатәи аргыларазы Аусбарҭа аиҳабы Демир Гамисониа.
Афинансыркра азеиԥш хышәа-ҵышәа – 651,9 млн. мааҭ рҟынӡа инаӡоит. Аргылара ахьымҩаԥысуа аҵакыра амҽхак – 10 850 ԥшьыркцатә метр рҟынӡа инаӡоит. Иргылахо ахыбра азеиԥш амҽхак 4550,79 ԥшьыркцатә метр. Анардкылаҩ Хада - Зҭакԥхықәра Ҳәаақәҵоу Аилазаара «КДК ДЕВЕЛОПМЕНТ».
Уаанӡа Аҳәынҭқарра Ахада Бадра Гәынбеи Урыстәыла агәабзиарахьчара аминистр Михил Мурашкои ирыбжьарҵаз аиқәшаҳаҭра инақәыршәаны, Аԥсны агәабзиарахьчара Аминистрра ҳамҭас иарҭеит автомашьына “КАМАЗ” иақәгылоу еиҭаҵуа афлиуорогрфиатә кабинет.
Амобилтә медицинатә комплекс Гәдоуҭатәи араионтә хәышәтәырҭа Хада абаланс аҿы иҟалоит, уи араион ауааԥсыра ацхыраара рыҭара иазкхоит.
Астационартә рентгентә аппаратқәа ҩба Ҭҟәарчали Гагреи иазоужьхоит, ҳәа адырра ҟаиҵеит Урыстәылатәи Афедерациа агәабзиарахьчара аминистр Михаил Мурашко.
