Алеқсандр Ахмедов анаҩс аҭиразы изакәанымкәа аахәара, аҵәахра, аиагара, ажәакала, зыкапан дуу анаркотикатә маҭәашьарқәа Аԥсны иахьаҵанакуа аларҵәара азы ахара идҵоуп.

Уаанӡа иҟаз адыррақәа рыла, Аԥсны аҩныҵҟатәи аусқәа Рминистрра анаркотикқәа реикәыршара ахылаԥшра азы Аусбарҭа аусзуҩцәеи Гәдоуҭа араион аҩныҵҟатәи аусқәа Русбарҭа ашьаусԥшааратә ҟәша аусзуҩцәеи лаҵарамза 27, 2024 шықәса рзы дааныркылеит усҟан Аԥсны иахьаҵанакуа «имаӡоу аҭаҵәахқәа» рыла анаркотикқәа рыларҵәараҿы игәҩараз Алеқсандр Ахмедов.

Хаҭала игәаҭараан иаанкылаз идырбалеит иагьимырхит аҭиразы ирхиаз анаркотикатә маҭәашьар згәылаз 95 еилаҳәара.

Дааныркылаанӡа Алеқсандр Ахмедов Гәдоуҭа араион Приморское ақыҭан «имаӡоу аҭаҵәахқәа» хәба рыҟаҵара дахьӡеит. Амилициа аусзуҩцәа иарбоу аҭаҵәахқәагьы ԥшааны иқәыргеит.

Иаанкылаз идырбалаз анаркотикатә маҭәашьар «Метадон» азеиԥш капан 93 грамм иреиҳауп.