Аиԥылараҿы Урыстәыла иҟоу Аҷыдалкаатә зинмчы змоу Аԥсны ацҳаражәҳәаҩ Алхас Кәыҵниа Ацҳаражәҳәарҭа ҳазҭагылоу аамҭазы имҩаԥнаго аусуразы аҳасабырба ҟаиҵеит.

Аиԥылараҿы Аԥсны Аҳәынҭқарреи Урыстәылатәи Афедерациеи рыбжьара аимадарақәа рыҿиареи рырӷәӷәареи рҳәаақәа ирҭагӡаны, Урыстәыла иҟоу аҳәаанырцәтәи аҳәынҭқаррақәа рдипломатиатә миссиақәа рҿы аимадара ҿыцқәа рыбжьаҵара, рырӷәӷәара иадҳәалоу азҵаарақәа рҿы Ацҳаражәҳәарҭа аусура активтәра аҵак ду шамоу азгәаҭан.

Рашәарамза 6 рзы имҩаԥысраны иҟоуп Олег Барцыци Урыстәылатәи Афедерациа адәныҟатәи аусқәа рминистр Сергеи Лаврови реиԥылара.  

Имҩаԥысраны иҟоу аиҿцәажәарақәа рҿы аганқәа аԥсны-урыстәылатәи аҳәынҭқаррабжьаратәи амшхәаԥштә актуалра злоу азҵаарақәа ирылацәажәоит.