«Ҳаҭыр зқәу аҟәаа, Аԥсны аҳҭнықалақь асасцәа! 

Гәык-ԥсык ала ишәыдысныҳәалоит Аҟәа ақалақь Амш.

Ари аныҳәа еиднакылоит ҳақалақь ссир ашьақәгылареи аҿиареи зааԥсара аду, уаҵәтәи аԥеиԥш бзиа ачаԥара знапы иану зегьы.

Аҟәа – 2500-шықәса инареиҳаны изхыҵуа, аҭоурых беиа змоу, ацивилизациа дуқәа рышьҭыҵреи ркаҳареи ирхаану қалақьуп.

Ашәышықәсақәа иргәылсны, уи еиқәнархеит даҽакы иаламҩашьо ахаҿра, аԥшӡара, иаҵоу аԥхарра. Аҟәа ҳара зегьы ҳзы аҳҭнықалақь мацараны иҟаӡам, ари Аԥсны иагәуп, ҳҳәынҭқарратәра, ҳхақәиҭра, ҳмилаҭтә акра иасимволуп. 

Иахьа иумбарц залшом ҳаҳтнықалақь аҽеиҭакра ишану. Есҽны аҽаԥсахуеит, имҩаԥысуеит аиҭашьақәыргыларатә усурақәа, амҩақәа, апаркқәа реиҿкаара иаҿуп. Ҳара зегьы ҳҿаԥхьа иқәгылоу уснагӡатәны иҟоуп ҳақалақь аҭоурыхтә хаҿра еиқәырханы аԥшӡара, ахаара аихаҳара. 

Акыр иаԥсоу аҟәаа, абри аныҳәамш азы зегьы ишәзеиӷьасшьарц сҭахуп агәабзиара, аҭынчра, аизҳазыӷьара, аихьӡара ҿыцқәа ҳаԥсадгьыл Аԥсны, ҳаҳҭнықалақь аизҳазыӷьара ахьӡала.