Аҟәа. Ԥхынгәымза 1, 2025 шықәса. Аԥсныпресс. Аихамҩатә станциа Гагрыԥшь аус ауӡом 1992-1993шш. Аԥсны жәлар Рџьынџьтәылатәи еибашьра анхыркәшаха инаркны, абар шьҭа ҩажәижәаба шықәса инареиҳаеы араҟа изеиԥшразаалак аиҭашьақәыргыларатә усурақәа мҩаԥырымгаӡацт.
Аԥснытәи Аихамҩа анапхгараҭара астанциақәеи авокзалқәеи реиҭашьақәыргылара азҵаара ҷыда ахшыҩзышьҭра анаҭоит. Иазԥхьагәаҭоу апрограмма аҳәаақәа ирҭагӡаны, Ареспубликатә Унитартә Наплакы «Аԥснытәи аихамҩа» абиуџьет ахарџь ала, ахәҭакахьала Аҟәатәии Гәдоуҭатәи авокзалқәа еиҭашьақәыргылахеит, шьаҭанкыла аремонт ҟаҵоуп астанциа Абаҭаа аҿы, аԥснытәи аинвесторцәа рхарџь ала еиҭашьақәыргылоуп астанциа Ԥсырцха, аусурақәа хацыркуп астанциақәа Афон Ҿыци Гагрыԥшьи рҿы.
Астанциа Гагрыԥшь аиҭашьақәыргылара мчыбжьык аԥхьа ахыб ақәхреи афымцацәаҳәақәа рнагаразы аҽазыҟаҵаратә усурақәа рынагӡареи рыла иалагеит. Ахаҳәцәы ашьҭаҵаразы аҵакыра арыцқьара иалагахьеит.
Адәахьтәи аусурақәа анхыркәшахалак ашьҭахь астанциа аҩныҵҟа иҟоу ауадақәа реиҭашьақәыргылара азԥхьагәаҭоуп. Аусураџқәа мҩаԥысуеит атәыла анапхгара анапынҵала, атранспорттә инфраструктура аҿиара апрограмма ҳәаақәа ирҭагӡаны АУН «Аԥсытәи аихамҩа» адиректор Хада хаҭала наигӡо ахылаԥшра ала имҩаԥысуеит.
