Аԥсны жәлар Рџьынџьтәылатәи еибашьра аҿы иҭахаз хатәгәаԥхарала еибашьуаз ргәаладыршәеит Гәдоуҭа ақалақь аҿы.

15.Нанҳәа.2025

Аԥсны жәлар Рџьынџьтәылатәи еибашьра аҿы иҭахаз хатәгәаԥхарала еибашьуаз ргәаладыршәеит Гәдоуҭа ақалақь аҿы.

Аҟәа. Нанҳәамза 15, 2025 шықәса. Аԥсныпресс. 1992 – 1993 шш. Аԥсны жәлар Рџьынџьтәылатәи еибашьра аҿы иҭахаз хатәгәаԥхарала еибашьуаз ҳаҭырла иргәаладыршәеит Гәдоуҭа ақалақь аҿы.

Аҳәынҭқарра Ахада Бадра Гәынба, Аҳәынҭқарра Ахада Ихаҭыԥуаҩ Беслан Бигәаа, атәыла аԥыза-министр Владимир Делба, атәыла Анапхгара алахәылацәа, Жәлар Реизара-Апарламент адепутатцәа, аибашьра аветеранцәа, хатәгәаԥхарала еибашьуаз, ауаажәларра рхаҭарнакцәа хатәгәаԥхарала еибашьуаз рбаҟа амҵан ашәҭшьыҵәрақәа шьҭарҵеит.

Абаҟа шьақәыргылоуп ақалақь-фырхаҵа Гәдоуҭа Кавказ Ашьхарыуа жәларқәа Рконфедерациа аштаб ахьыҟаз ахыбра азааигәара.

Раԥхьаӡа акәны Аԥсны ныҳәак аҳасабала Хатәгәаԥхарала еибашьуаз Рымш азгәарҭеит нанҳәамза 15, 2012 шықәа рзы. Ари амш аԥҵара азы аԥшьгара ҟаиҵеит Аԥсны ԥыхьатәи аԥыза-министр Леонид Лакербаиа. Нанҳәамза 8, 2013 шықәсазы Аԥсны усҟантәи Ахада Алеқсандр Анқәаб «Ареспублика Аԥсны агәалашәаратәи аныҳәатәи амшқәа рзы Азакәан аиҭакрақәеи ацҵақәеи ралагалара азы» Аусԥҟа инапы аҵаиҩит. Уи инақәыршәаны, нанҳәамза 15 аныҳәатә усуратә мшны – Хатәгәаԥхарала еибашьуаз Ирымшны ирылаҳәахеит.

Read 63 times