«Иахьа ари аҳаирплан аԥышәаратә ԥырра нанагӡеит. Ҳара аҳаирплан арныҟәага аусуратә режимқәа зегьы рҿы аԥырратә лшарақәа, аруль аусушьа гәаҳҭон. Аԥырраан изеиԥшразаалак уадаҩрак цәырымҵӡеит. Аԥырра иахәҭоу аҩаӡараҿы имҩаԥысит», – ҳәа иазгәеиҭеит Заур Ешба.

Аиҭашьақәыргыларатә усурақәа рымҩаԥгараан, Заур Ешба иажәақәа рыла иамхны ирҽеин  20 инарзынаԥшуа  аҳаирплан амаҭәахәқәа.  

«Иамхын амҵәыжәақәа, аелеронқәа, амҵәыжәҩақәа рыҵақәа, аҭышәныртәалагақәа (астабилизаторқәа), аҳаракыра  аԥсҟы, ахырхарҭа аԥсҟы, уҳәа убас иҵегьы.  Уи зегьы иԥырганы ҿыц еибыҭаны, еиҭашьақәыргыланы еибаҳҭеит. Мҽхакы ҭбаала аусура нагӡан. Ари ашьҭахь аԥыррахь инаҳашьҭраны иҟоуп аҩбатәи аҳаирплан «Ан-2», уи  аиҭашьақәыргылара ҳалагахьеит», –  ҳәа инаҵшьны иазгәеиҭеит иара.

Аҳаиртә техника аиҭашьақәыргыларазы иаҭахыз аԥаратә хархәагақәа иԥшааит Аҳәынҭқарра Ахада Бадра Гәынба.

Заур Ешба иара убас ааигәа ашьха иаԥну Ԥсҳәы ақыҭахь ареис нагӡахоит ҳәа адырра ҟаиҵеит.