Станислав Зосим-иԥа Лакоба диит жәабранмза 23, 1953 шықәса рзы Аҟәа ақалақь аҿы.

Далгеит А. М. Горки ихьӡ зху Аҟәатәи арҵаҩратә Институт аҭоурых-филологиатә факультет (1976). Аинститут ашьҭахь агазеҭ «Советская Абхазия» акорреспондентс, иара убас Аԥсны аҭоурых-культуратә ҭынха абаҟақәа рыхьчаразы Аилазаара аҵарауаҩ-маӡаныҟәгаҩыс аус иуан (1976–1978).  .

 1980 шықәса инаркны — анаукатә усзуҩыс, 1989 шықәса инаркны — Д.У.Гәлиа ихьӡ зху абызшәеи алитературеи аҭоурыхи Ринститут (уажәы Агуманитартә ҭҵаарақәа Ринститут) аҿы аҭоурых аҟәша аиҳабыс ауас иуан.

1991 – 1996 шш. рзы – Ареспублика Аԥсны Иреиҳаӡоу Асовет-Апарламент адепутатс дыҟан; 1993-1994 шш. рзы – Аԥсны Иреиҳаӡоу Асовет ахантәаҩы актәи ихаҭыԥуаҩыс дыҟан, 1994-1996 шш. рзы – Апарламент Аиҳабы актәи ихаҭыԥуаҩыс дыҟан.

С. Лакоба – Владислав Арӡынба изааигәаз иҩызцәа дреиуан. Станислав Лакоба Еиду Амилаҭқәа Реиҿкаара аегида ала, Урыстәыла абжьаҟазарала имҩаԥысуаз аԥсуа-қырҭуатә еиҿагылара аҭышәынтәаларазы Женеватәи апроцесс активла ихы алаирхәуан.

2004 шықәсазы Аҳәынҭқарра Ахада иалхрақәа актәи аетап аан Сергеи Багаԥшь дивагыланы Аҳәынҭқарра Ахада ихаҭыԥуаҩыс икандидатура ықәгылан. Аҳәынҭқарра Ахада иалхрақәа аҩбатәи аетап аан аԥсуа жәлар рыҩныҵҟа аҭышәынтәалара ашьақәыргыларазы иара имыцхәрас Аҳәынҭқарра Ахада ихаҭыԥуаҩыс Рауль Ҳаџьымба иқәыргылара дақәшаҳаҭхеит.

2005 шықәса инаркны нанҳәамза  18, 2009 шықәсанӡа, иара убас ԥхынҷкәынмза 2011 шықәса инаркны жьҭаарамза, 2013 шықәсанӡа – Ареспублика Аԥсны ашәарҭадара Ахеилак амаӡаныҟәгаҩыс дыҟан.

Станислав Лакоба – шәкы инареиҳаны Аԥсни Кавказ ажәларқәеи рҭоурых, рполитика, ркультура иазку ашәҟәқәа, амонографиақәа, арҵагашәҟәқәа, астатиақәа, аочеркқәеи аессеқәеи дравторуп.

2000 – 2004 шш. рзы Станислав Лакоба  ааԥхьара змоу апрофессор иаҳасабала Ауниверситет Хоккаидо (Иапониа) аҟны иҟоу славиантәи аҭҵаарақәа Рцентр аҿы аҭҵаарадырратә усура инапы алакын, Токиатәи ауниверситет аҿы алекциақәа дрыԥхьон. Иапониа иҟазаара аамҭа иалагӡаны иҭижьит аурыс бызшәала иҩу ҩ-шәҟәык: «Абхазия - де-факто или Грузия - де-юре? О политике России в Абхазии в постсоветский период 1991-2000 гг.», «Абхазия после двух империй. XIX-XXI вв.».

Аԥсны акультуреи аполитикатә ҭоурыхи рызҵаарақәа ирызкыз Жәларбжьаратәии арегионбжьаратәи аконференциақәа жәпакы ихы алаирхәуан.

С. Лакоба – 1991 шықәсазы Аҟәа ақалақь аҿы иҭыжьыз арҵагатә цхыраагӡа «Аԥсны аҭоурых» аредактор хадас дыҟан. Уи еиҭаҭыжьын Гәдоуҭа ақалақь аҿы 1993 шықәсазы.

2006 шықәсеи 2015 шықәсеи рзы академик О. Бгажәба иацавторрала иҭижьит арҵагашәҟәы «Аԥсны аҭоурых ажәытәӡатәи аамҭа инаркны иахьа уажәраанӡа» («История Абхазии с древнейших времён до наших дней") 10-11-тәи аклассқәа рзы.

Станислав Лакоба инапы иҵыҵыз еиҳа еицырдыруа ашәҟәқәеи амонографиақәеи рхыԥхьаӡараҿы иҟоуп: "Боевики Абхазии в революции 1905-1907 годов" (Сухуми, 1984); "Крылились дни в Сухум-Кале. Историко-культурные очерки" (Сухуми, 1988); "Очерки политической истории Абхазии" (Сухуми, 1990); "Столетняя война Грузии против Абхазии"  (Гагра, 1993); "Ответ историкам из Тбилиси" (Сухум, 2001); "Абхазский архив" (Москва, 2002); несколько разделов по истории в книге: The Abkhazians. Ed.by G. Hewitt (London; New York, 1999); разделы по истории в монографии "Абхазы" (Москва, 2012); "Большой террор в Абхазии:1937-1938 гг." (Совет Европы, 2017), уҳәа убас егьырҭгьы.