Актәи аҭыԥ ааникылеит Руслан Ламчава, аҩбатәи аҭыԥ – Давид Мышәба, ахԥатәи аҭыԥ – Адгәыр Мышәба, ҳәа адырра ҟанаҵоит Аҿари аспорти русқәа рзы Аҳәынҭқарратә Еилакы.

Аицлабрақәа мҩаԥысит Очамчыра араион Аӡҩыбжьа ақыҭан иҟоу аспорт-хысратә комплекс «ГОРА» абазаҿы.  

Аицлабрақәа реиҿкааҩцәа –  Аԥсны аҿари аспорти русқәа рзы Аҳәынҭқарратә Еилаки Аԥсны ахысразы Афедерациеи.

Атурнир зынӡа рхы аладырхәит 26 - ҩык аспортсменцәа – ахысратә спорт абзиабаҩцәеи аветеранцәеи. Аицлабрақәа ирылахәыз адисциплина «Игьежьу астенд» («Круглый стенд» (Skeet)) аҿы еицлабуан.

Аиааирагаҩцәа аҳамҭақәа рыҭара ацеремониа рхы аладырхәит Аҿари аспорти русқәа рзы Аҳәынҭқарратә Еилакы ахантәаҩы ихаҭыԥуаҩ Беслан Карчааи Ареспублика Ҭаҭарстан ахылатәи астендтәи ахысразы Афедерациа апрезидент Сергеи Диомини.