Дамеи Аҩӡба амҩатә ԥҟарақәа реилагара аус адулареи ахылаԥшреи рзы аҟәша аусура излауа ала арӷәӷәара хымԥадатәиуп ҳәа иазгәеиҭеит. Уи аҟәшеиҵа ахатәы еилазаара аҿаԥхьа амҩатә ԥҟарақәа еилазго амашьынарныҟәцаҩцәа инагӡаны ахьырхәра рақәыршәара азы адҵа ықәиргылеит. Дамеи Аҩӡба азакәан еилазго зегьы аҭакԥхықәра рыдҵара алыршареи, амчратәи азинхьчаратәи усбарҭақәа рхылаԥшреи, амҩахылаԥшартә маҵзура аусзуҩцәа астационартә ҭыԥқәа рҿы русура арӷәӷәареи рзы анапынҵақәа ҟаиҵеит.

«Ихадоу апринцип – ахьырхәра хырԥашьа амамзаара ауп. Аӡәгьы хырҩа имҭакәа аилагара ҟазҵаз зегьы аҭакԥхықәра иақәыршәалатәуп. Уи ишашоу шәара шәҭакԥхықәра ауп, уи  ауп ҳтәыла анапхгареи амҩаҿы иахьа иҟоу аҭагылазаашьеи ҳҿаԥхьа хыдҵас иқәнаргыло», - ҳәа иҳәеит Дамеи Аҩӡба.

Уи иара убас инаҵшьны иазгәеиҭеит ҷыдала ахылаԥшра шаҭалатәу атәыла амчратә структурақәеи азинхьчаратә усбарҭақәеи русзуҩцәа рыла амҩатә ԥҟарақәа реилагара иадҳәалоу афактқәа.