Виачеслав Михаил-иԥа Ҷыҭанаа диит абҵаамза 19, 1955 шықәса рзы Очамчыра араион Ԥақәашь ақыҭан.  

1973 шықәсазы уи далгеит Аҟәатәи ашкол-интернат №1, 1978 шықәсазы - А.М. Горки ихьӡ зху Аҟәатәи аҳәынҭқарратә арҵаҩратә Институт афилологиатә факультет аԥсуа бызшәеи алитературеи рыҟәша.

Еиуеиԥшым ашықәсқәа рзы иара агазеҭ «Аԥсны Ҟаԥшь» акорреспондентс, аҟәша аредакторс аус иуан, анаҩс – ажурнал  «Аԥсны аҟазаара» аҭакзыԥхықә маӡаныҟәгаҩыс дыҟан.

1992–1993 шш. Аԥсны жәлар Рџьынџьтәылатәи еибашьраан иара арадио «Би-би-си» акорреспондентс аус иуан, иара Аԥсны жәлар ахақәиҭреи ахьыԥшымреи рзы рфырхаҵаратә қәԥара иазкны арадиоматериалқәа еиқәиршәон.

В.Ҷыҭанаа ажәеинраалақәа рыҩра далагахьан ашкол данҭаз ашықәсқәа рзы. Иара ирҿиамҭақәа ркьыԥхьуан ажурналқәа «Амцабз», «Алашара», агазеҭ «Аԥсны ҟаԥшь» уҳәа егьырҭ аҭыжьымҭақәа рҿы.

Виачеслав Ҷыҭанаа иажәеинраалақәа  «Аԥсуа поезиа антологиа. XX ашәышықәса» аҩбатәи атом ианылеит («Антология абхазской поэзии. XX век» (Акуа–Москва, 2001; переиздание — Акуа–Москва, 2009). Д. Чачхалиеи В.Краскови аурыс бызшәахьы еиҭагаз иажәеинраалақәак алитературатә еизга «Ерцаху» (Аҟәа, 1981), аизга  «Однажды в апреле» (Қарҭ, 1982) рдаҟьақәа ирнылеит. В. Ҷыҭанаа аԥсышәала иҭыжьыз ажәеинраалақәа жәпакы дравторуп.  

Урҭ рхыԥхьаӡараҿы иҟоуп:  «Зов родной» (1981),  «Небесный сад» (1984),  «Проходящий день» (1987).

Аурысшәахь еиҭаганы иҭыхьуп аизгақәа «Золотая нить» (Москва, 1987), «Недосказанное слово» (Аҟәа, 2005).

Апоет ҳаҭырла дыргәаладыршәеит иколлегацәа, иуацәеи иҭынхацәеи, иара убас иҩызцәеи дыздыруаз ауааи.