«Ари амҩа иаҵоу астратегиатә ҟазшьа ҳасаб азуны ҳара атоннель ареконструкциа амҩаԥгаразы аӡбамҭа ҳадаҳкылеит. Ари амҩазаҵәык ала ауп Аҩадатәи Лаҭаҟа узланеиуа. Аусура ҩ-етапкны имҩаԥыслоит. Актәи аетап адгьылҳәазарақәа раан ааха зауз атоннель ахаҭа ареконструкциа азԥхьагәанаҭоит», – ҳәа иҳәеит Аҳәынҭқарра Ахада. Иара убасгьы иазгәеиҭеит атоннель аиҭашьақәыргылара ахаҳго ҳалагар, зынӡа Кәыдрытәи аҩхааи  Аԥсны аҳҭнықалақьи еимаздо, астратегиатә ҟазшьа змоу амҩаду  ада ҳаанхар алшоит.

«Аҩхааҿы атоннельгьи амҩагьы атәыла ашәарҭадара азы аҵак ду амоуп. Аҩхааҿы иҟоуп ҳара ҳархәҭақәа реиԥш урыстәылатәи аҳәаахьчаҩцәагьы. Амҩа ареконструкциа амҩаԥгара азҵаара 2008 шықәсазы иқәдыргылахьан, аха аԥаратә хархәагақәа рыԥшаара залмыршакәа иаауан. Урыстәылатәи ҳколлегацәеи ҳареи ҳаиқәшаҳаҭрақәа ирыбзоураны ҳара ари акыр зҵазкуа апроект анагӡаразы аԥаратә хархәагақәа рзоужьра ҳалшеит», – ҳәа иҳәеит Аҳәынҭқарра Ахада.