«Инаҵшьны иазгәаҳҭоит, атәыла аҩныҵҟа имҩаԥысуа аполитикатә процессқәа изакәанымкәа рҽалагаларазы изеиԥшразаалак аҽазышәарақәа алмыршазароуп.

Ареспублика Аԥсны аҩныҵҟатәи аусқәа анҭыҵтәи аҽалагаларазы алшара аԥхьырҟәҟәаара азы Аԥсны Жәлар Реизара-Апарламент адепутатцәа иҟоу азакәанԥҵараҿы азинтә нормақәа рырӷәӷәаразы алшара иахәаԥшуеит», – ҳәа иазгәаҭоуп Апарламент апресс-маҵзура иаланарҵәаз аҳәамҭа аҿы. Адепутатцәа иара убас ихадараны ирыԥхьаӡоит  Апарламент ахатә усдырра аҳәаақәа ирҭагӡаны атәыла аҿы ауаажәларра-политикатә еизыҟазаашьақәа реибарххара ахь ицәырызгар алшо ахҭысқәа есымша оперативла ишазхьаԥшуа азгәаҭара.

Убас, абҵарамза 12 рзы Жәлар Реизара-Апарламент аҿы Ареспублика Аԥсны алхратә процесс зҽалазгало аҳәаанырцәтәи атәылауаа ыҟазар шалшо азы атәылахьчареи амилаҭтә шәарҭадареи рзы аилаки аҳәынҭқарра-зинтә политиказы аилаки реилатәара мҩаԥысит.  

Адепутатцәа атәыла апрокурор Хадеи ихадоу амчратә структурақәа зегьы рнапхгаҩцәеи ирзыӡырҩит. Урҭ ирабжьыргеит абҵарамза  5 рзы  аҭыԥ змаз ахҭысқәа иҟоу азакәанԥҵара аилагара аганахьала ганрацәала, аобиективла апроцесуалтә гәаҭара мҩаԥыргарц рабжьыргеит.

Аԥсны Жәлар Реизара-Апарламент атәылауаа, аполитикатә мчрақәа, аиҿкаарақәеи аидгыларақәеи апартиақәеи рахь ааԥхьара ҟанаҵоит ауаажәларратәи аҳәынҭқарратәи аинтерессқәа рыхьчара ахьӡала наҟ-ааҟ аҽԥныҳәақәа рыҟаҵареи ахарадҵареи мап рыцәкны аҭагылазаашьа аҭышәынтәаларазы аҟәышреи ахарахәыцреи аадырԥшырц.