Апрактика ишаҳнарбо ала, ақыҭақәа рҿы иҟоу, анхарҭаҩнқәа зтәу, анхарҭатә хыбрақәеи аҩнқәеи рыҭиразы инхарҭатәым астатус ахь ииаргоит.

Аиԥш-зеиԥшу аҭагылазаашьа шьақәгылоит иара убас ақалақьтә еиланхарҭақәа рҿы ауадарацәа змоу аҩнқәа рҿы.  Убас, ауада рацәа змоу аҩнқәа аҩбатәи аихагылаҿы иҟоу ауадақәа инхарҭатәым астатус ахь риагара апрактика ыҟоуп», — ҳәа аҳәоит аилыркааратә шәҟәаҿы.

Аиҭакрақәа инарықәыршәаны, иалкаау аҭагылазаашьақәа раан акоммерциатә хархәаразы аҭыԥантәи аҳәынҭқарратә усбарҭақәа рыӡбарала инхарҭатәым астатус ахь аиагара имҩаԥгазар алшоит абарҭ ахыбрақәа рганахьала: ақалақьтә еиланхарҭақәа рҿы ауадарацәа змоу аҩнқәа актәи реихагылақәа рҿы иҟоу анхарҭа уадақәа; ақалақьтә еиланхарҭақәа рҿы ахатәыҩнқәа рҟны анхарҭатә уадақәа.

Азакәан апроект адкылара аԥшьыргеит Апарламент Аиҳабы Лаша Ашәба, адепутатцәа Демур Гогиа, Венори Бебиеи Дмитри Маршьани. Дмитри Маршьан анхарҭатә закәанԥҵара аиҭакрақәа ралагалара заҭаххаз иҳәеит.

«Избан акәзар иҟаӡам аицеиԥшра, иахьа иҟаӡам анхарҭатә ҩнқәеи анхарҭатә хыбрақәеи инхарҭатәым астатус ахь риагаразы изеиԥшразаалак анормативқәа.  Иахьа аҭыԥқәа рҿы администрациақәа рхадацәа рхала арҭ азҵаарақәа рыӡбоит. Гагра араион Ахадара ада, егьырҭ анапхгаҩцәа анхарҭатә ҩнқәеи анхарҭатә хыбрақәеи инхарҭатәым астатус ахь риагаразы иалаҵоу арзаҳалқәа рзы аинформациа аминистрцәа Реилазаара ахь иаарышьҭӡом.   Егьырҭ араионқәа рхадарақәа ирымоу аҩныҵҟатәи анормативтә усшәҟәқәа рхы иархәаны рхала аӡбамҭақәа рыдыркылоит», – ҳәа иҳәеит Дмитри Маршьан.

Уи иажәақәа рыла, анхарҭатә ҩнқәеи анхарҭатә хыбрақәеи инхарҭатәым астатус ахь риагара иадҳәалоу афактқәа рацәоуп, аиҳарак Мрагыларатәи Аԥсны иахьаҵанакуа.

«2025 шықәсазы мрагыратәи араионқәа рҿы 100 инарзынаԥшуа анхарҭатә ҩнқәеи анхарҭатә хыбрақәеи инхарҭатәым астатус ахь риагара афактқәа аҭыԥ рыман.  Аиҳарак ас еиԥш аиагарақәа аҭыԥ ахьроуа амшын аԥшаҳәа иазааигәаны игылоу  ахыбрақәа роуп. Ари азҵаара хымԥада иҭышәынтәалатәуп», –  ҳәа иазгәеиҭеит Дмитри Маршьан.

Апарламент Аиҳабы Лаша Ашәба азакәанԥҵара аиҭакрақәа ралагаларзы ажәалагалақәа рыҟаҵара аԥхьа адепутатцәа Аԥсны еиуеиԥшым араионқәа рҿы иҟоу аҭагылазаашьа ҭырҵааит ҳәа иазгәеиҭеит.

Апарламент Аиҳабы иажәақәа рыла, зыдгалара мҩаԥысуа азакәан апроект анхарҭатә ҩнқәеи анхарҭатә хыбрақәеи инхарҭатәым астатус ахь риагара азы аӡбамҭақәа «иҳәазо раекспансиа» апроцесс аанкылара алнаршоит.

Аҳәынҭқарра-зинтә политиказы апарламенттә Еилакы ахантәаҩы Дауҭ Хәытаба убасҵәҟьа Аилак аҿы изықәшаҳаҭхаз азакәан апроект адкылара дадгылеит.

Апарламент аҿы Аҳәынҭқарра Ахада ихаҭарнак Дмитри Шамба иара убас Аҳәынҭқарра Ахада Иусбарҭа иарбоу аԥшьгара инагӡаны адгылара анаҭоит ҳәа иазгәеиҭеит.

«Иарбоу аԥшьгара Ареспублика Аԥсны Атәылауаҩратә Закәанеидкыла аҩбатәи ахәҭа иарбоу анормақәа рыцәцара аҽазышәарақәа аԥхьырҟәҟәаара иазырхоу азакәанԥҵаратә ԥкрақәа рышьақәырӷәӷәара алнаршоит. Ишәгәалашәозар, 2008 шықәса инаркны аахәара-аҭира, аиҭныԥсахлара, ҳамҭас аҭара, уҳәа рзы аиқәшаҳаҭрақәа (аилаӡарақәа) ирызку Атәылауаҩратә Закәанеидкыла ахқәа еиҭамҵуа анхаратә мазара иадҳәалоу хазы игоу аиҭакрақәа алагалоуп. Аха Анхаратә Закәанеидкыла аҿы иҟоу азиндырратә бжьаха ахархәара аманы иҟан. Иарбоу азакәан апроект ала ҳара ари абжьаха – ахатәы нхарҭатә ҩнқәеи анхарҭатә хыбрақәеи инхарҭатәым астатус ахь ииаганы, анаҩс аҭиразы аҳәаанырцәтәи атәылауаа рыдгалара алзыршо ишьақәыргылоу ақәиҭымзаарақәа рыбжьажьразы азиндырратә лшара аԥаҳхуеит», –  ҳәа иҳәеит Дмитри Шамба.