Аидгыла аоппозициа атәыла анапхгара аусмура, ажәлар аинтересқәа рыхьчара мап ацәнакуеит ҳәа ахара адҵарала иҟанаҵо аҳәамҭақәа ирықәшаҳаҭӡам.

«Ааигәа Аҳәынҭқарра Ахада Бадра Гәынба иҟаиҵаз аҳәамҭа аҿы инҭкааны иҳәеит иара Аконституциа агарант иаҳасабала имоу апозициа атәы. Аҳәынҭқарра Ахада инаҵшьны иазгәеиҭеит: азакәанреи азинеиҿкаареи изинркым аметодқәа рыла рышьақәыргылара залшаӡом. Аҳәынҭқарра Ахада аполитикатә ҭыӡшәеи апопулисттә лозунгқәеи рзы апроцессуалтәии азакәанԥҵаратәи анормақәа еилазго ауснагӡатәқәа рымҩаԥгаразы гәҭакы имаӡам. Аҳәынҭқарра Ахада еилыкка иазгәеиҭеит абҵарамза 5 рзы иҟалаз ахҭысқәа рзы Аконституциа агарант иаҳасабала ипозициа: Аԥсны — ари зинтә ҳәынҭқарроуп, аӡбамҭақәа зегьы аультиматумқәа рықәыӷәӷәарала акәымкәа, азинмҩала ирыдыркылалоит. Аԥсны дарбанзаалак атәылауаҩ аҳәаанырцәтәи аҳәынҭқаррахь дрырҭаӡом; азакәани аҭышәынтәалареи азакәан иаҿагылоу амҩала рышьақәыргылара залшом; Азакәанхьчаратә усбарҭақәа ахҭыс нагӡаны аҭҵаара мҩаԥыргоит аполитикатә кониуктура акәымкәа, азакәан ишаҳәо инақәыршәаны.

Асуверенитет ахьчара ианалацәажәо аоппозициа афактқәа иазхьаԥшӡом.

Атәыла аполитикатә партиақәеи ауаажәларратә еиҿкаарақәеи Реидгыла Аҳәынҭқарра Ахада хьаҳәхьачарада иааникыло ипозициа  инагӡаны адгылара арҭоит», – ҳәа иаҳәоит аҳәамҭа атекс аҿы. Аидгыла иалаху иара убас Аԥсны жәлар ракзаара Афорум иаднакылаз арезолиуциа авторцәа апартиатә интерессқәа рынагӡаразы ҳаамҭазтәи аԥсуа ҳәынҭқарра ашьаҭаркҩы ихьӡ ахархәаразы аҽазышәара ииашаӡам ҳәа ирыԥхьаӡоит.

«Ҳара  Аԥсны Афырхаҵа, амилаҭ рԥыза, Аԥсны Актәи Ахада Владислав Григори-иԥа Арӡынба  ихьӡ ала аполитикатә мчык агәҭакы аҵәахразы ахархәара иаахҵәаны иахәҭамкәа иҳаԥхьаӡоит. Владислав Арӡынба ихьӡ  – ари Ҳиааиреи Ҳхьыԥшымреи иԥшьоу символуп, уи Аԥсны ажәлар зегьы иртәуп, иарбан политикатә партиазаалак излоу иахьыԥшымкәа ҳара зегьы ҳаиднакылоит», - иазгәаҭоуп аҳәамҭа аҿы.

Аполитикатә партиақәеи ауаажәларратә еиҿкаарақәеи Реидгыла убасҵәҟьа иақәшаҳаҭӡам аоппозициа атәыла амчрақәа «аполициатә методқәа» рхы иадырхәуеит ҳәа иҟанаҵо аҳәамҭақәа.

Аидгыла Аҳәынҭқарра Ахада иалхрақәа раан Цандрыԥшь ақыҭан алхратә ҭыԥ аҿы аҿагыларатә мчрақәа иҟарҵаз ажәылара ргәаладыршәеит.

«Аоппозициа ахаҭарнакцәа ԥыҭҩык рхаҭа рхымҩаԥгашьа ргәалашәар бзиан. Атәылауаа ирхамышӡацт Аҳәынҭқарра Ахада иалхрақәа раан Цандрыԥшь аҳаблан иҟаз ахҭысқәа.    Усҟан аоппозициа адгылаҩцәак бџьарла еиқәных алхратә ҭыԥ иақәлеит, алхратә комиссиа иалаз аҳәса дыршәеит. Ауаажәларра усҟан рыбжьы рмаҳаит иахьа Аԥсны атәылауаа рзинқәа рыхьчаразы иқәгыло рыбжьы», - ҳәа аҳәамҭа ҟанаҵоит Аидгыла.

Аидгыла иалоу аиҿкаарақәа агәра аганы иҟоуп Аҳәынҭқарра Ахадеи атәыла Анапхгареи иҭышәынтәалоу русеицура иабзоураны атәылауаа хра злоу аиҭакрақәа рбаратәы иҟоуп иахьа:  шықәсырацәала ажәлар ӷәӷәала изыргәамҵуаз аамҭа-аамҭала алашара арцәарақәа аанкылеит, асоциалтә зҵаарақәа рыӡбара  алыршахоит, атәылауаа рҿы ауааԥсыра ишиашоу рацәажәара мҩаԥысуеит. «Аҭагылазаашьа шыҟаҵәҟьоу абас ауп — Аҳәынҭқарра Ахадеи Аиҳабыреи инарыгӡо аусура абзоурала, атәылауаа анырра рызҭо алҵшәақәа рбоит. Шықәсырацәала агәынамӡара ҳазцәырызгоз аамҭа-аамҭала алашара арцәарақәа ртәы ҳхашҭит. Асоциалтә зҵаарақәа рыӡбара алыршахоит, араионқәа рҿы атәылауаа ишиашоу рацәажәара мҩаԥысуеит», — ҳәа иазгәаҭоуп аусшәҟәы аҿы.

«Аԥсны жәлар алхрақәа раан иарбоу акурс азы рыбжьы арҭеит – аҭышәынтәалара, Урыстәылатәи Афедерациеи Аԥсни рыбжьара аҳаҭыреиқәҵарала ишьаҭарку астратегиатә еидгылара арҿиареи арӷәӷәареи. Уи атәы лассы-лассы иазгәеиҭоит Аҳәынҭқарра Ахада», – иаҳәоит атәыла аполитикатә партиақәеи ауаажәларратә еиҿкаарақәеи иҟарҵаз аҳәамҭа аҿы.

Аидгылара агәаанагарала «Аҳәынҭқарра Ахада амилаҭтә ԥыза ихаҿсахьа аԥҵара иҽазишәоит», мамзаргьы «аполитикатә шьаҿақәа итрадициатәууи ақьабзтә усмҩаԥгатәқәа рылахәхарала ихыҩуеит» ҳәа ацәажәарақәа даараӡа агәынамӡара цәырнагоит, уи акритика азычҳауа иҟаӡам.

Аидгылаҿы агәара ганы иҟоуп Аҳәынҭқарра Ахада аԥсуа ҵасқәа дызрықәныҟәо џьара аимиџь ашьҭыхра, мамзаргьы аполитикатә еффект аиура азы акәӡам.

«Ҳажәлар рҵасқәа рықәныҟәара, ҳҭоурых ҳаҭыр ақәҵара, Аԥсуара  аныҟәгара, аиҳабацәа пату рықәҵара, рхаҵгылара, ҳазхылҵыз ргәалашәара аиҷаҳара – ари аполитикатә технологиаӡам.  Ари иара иԥсҭазаашьоуп, иааӡароуп, иҭаацәа иларҵаз ауп, анаҩс иара ихәыҷқәа ирылааиаӡо ауп», – ҳәа инаҵшьны иазгәаҭоуп аҳәамҭа аҿы.  

Аполитикатә партиақәеи ауаажәларратә еиҿкаарақәеи Реидгыла аоппозициаа рахь ааԥхьара ҟанаҵеит аультиматумқәеи амақаррақәеи рбызшәа ааныжьны, Аконституциа пату ақәҵаны, ажәлар рҭахра ҳаҭыр ақәҵаны, Аԥсадгьыл иазеиӷьхо аконструктивтә усура рҽаладырхәырц.