Ацҳаражәҳәарҭаҿы иазгәарҭеит Урыстәылатәи атәылауаҩра аиура аетапқәа зегьы рҿы ацхыраара мҩаԥызгоу аиуристтә фирма «Ахьчара» азинтә мчы ҳәа акгьы шамам.

Аԥсны иҟоу Урыстәылатәи Афеднрациа адипломатиатә хаҭарнакра агәҽанызаара ҟанаҵоит «ари афирма атәылауаҩра аиуразы, арзаҳалқәа аус рыдуларазы азинмчы ҳәа акгьы амам, ԥарала ас еиԥш амаҵзурақәа рымҩаԥгара азакәан аилагара ауп иаанагоу».

Урыстәыла атәылауаҩра аиуразы ихымԥадатәиуп:

Хәыда-ԥсада аофициалтә саит аҿы аҽҭаҩра: sukhum.kdmid.ru.
Иазыԥҵәоу аамҭазы аконсултә ҟәшахьы анеира (аҩналарҭа ыҟоуп Аидгылара амҩаду ала).

Аконсултә еизга шәатәуп аусшәҟәқәа зегьы анеизгахалак ашьҭахь, Аԥсны Аҵәахырҭатә Банк аҿы.

«Шәгәышәҽаныз, аофициалтә хыҵхырҭақәа рыда акгьы агәра шәымган!» - ҳәа ааԥхьара ҟанаҵоит Ацҳаражәҳәарҭа.