Аҳәынҭавтоинспекциа Аусбарҭа аиҳабы Дамеи Аҩӡба аветеранцәеи иколлегацәеи рзанааҭтә ныҳәа рыдиныҳәалеит, хаҭалатәи аилазаара ахамеигӡареи азанааҭдырреи рзы ҭабуп ҳәа реиҳәеит.

Аԥыза-министр ихаҭыԥуаҩ, аҩныҵҟатәи аусқәа рминистр Роберт Киут аҩныҵҟатәи  аусқәа  рминистырра асистемеи ауаажәларра рыԥсҭазаареи рҿы Аҳәынҭавтоинспекциа инанагӡо ароль ҷыда инаҵшьны иазгәеиҭеит.

Аминистр дырзааҭгылеит аусбарҭа анормативтә база арҿыцраҿы, апрофилактикатә усура арӷәӷәараҿы, атехникатә еиқәыршәара арҿыцраҿы ирымоу аихьӡарақәа, иара убасгьы иазгәеиҭеит иааиуа ашықәсқәа рзы аԥыжәара змоу ауснагӡатәқәа.

Аҳәынҭавтоинспекциа амаҵзура аветеран Нури Смыр иусура раԥхьатәи ашықәсқәеи, урҭ ирыцыз ауадаҩрақәеи ирызку игәалашәарақәа ҳацеиҩишеит.

Аԥсны  Жәлар Рџьынџьтәылатә еибашьра иалахәыз аҩныҵҟатәи  аусқәа  рминистрра аусзуҩцәа 28-ҩык Аԥсны Афырхацәа ҳәа ахьӡ иаԥсахеит, - ҳәа азгәеиҭеит  аветеранцәа Рассоциациа ахантәаҩы Аслан Дгебиа - урҭ рахьтә иҟоур иахьа азал аҿы итәоу.

Дгебиа аветеранцәа ҭабуп ҳәа реиҳәеит хацәынмырха русуразы.

Имҩаԥган аҳамҭақәа ранашьареи ахьӡқәа рыхҵареи иазкыз ацеремониа.

Иҿырԥшыганы рмаҵуратә уалԥшьақәа рынагӡареи, русураҿы арбага ҳаракқәеи, амҩатә шәарҭадара аиҿкаареи рҿы рлагала ду азы Аҳәынҭавтоинспекциа аусзуҩцәа гәыԥҩык иранашьан аусбарҭатә ҳамҭақәа, аҳаҭыртә шәҟәқәа, аџьшьарақәа. Ҷыдала зҽалызкааз аинспекторцәа изаамҭанытәиу ахьӡ ҷыдақәа рыхҵан.

Амедалқәа ранаршьеит амаҵзура аветеранцәагьы.