Пицундатәи абаталион акомандаҟаҵаҩыс даман Леон иорден занашьоу Нугзар Делба. Уи ихаҭыԥуаан Геннади Ҵәыџь, Алықьса Жьиба. Абаталион комиссарс дыҟан Леон иорден занашьоу Ҭенгиз Габуниа. Абаталион ахаҭа шьақәгылан х-ротак рыла. Лӡаатәи арота дахагылан Леон иорден занашьоу Џьон Дбар. Арота еиҿкаан ақыҭақәа Лӡаа, Асыџьқәа инхоз рыла. Аҩбатәи арота шьақәгылан Пицундаа рҵеицәеи Оҭҳаратәи авзводи рыла. Арота акомандаҟаҵаҩ – данҭаха ашьҭахь Леон иорден занашьоу Ларик Аиба. Ахԥатәи аротаҿы еибашьуан Пицунда инхоз аурыс рԥарцәеи Алаҳаӡытәи аԥсуааи. Арота акомандаҟаҵаҩ – данҭаха ашьҭахь Леон иорден занашьоу Виачеслав Дбар.

Абаталион аилазаараҿы иҟан Агәымшәаразы амедал занашьоу Милор Барцыц командаҟаҵаҩыс дызмаз аԥшыхәратә взвод. Пицундатәи абаталион аибшьцәа хә-ҩык Аԥсны Афырхаҵа ҳәа ахьӡ ҳаракы рыхҵоуп: Зурик Папаа, Валера Шәлымба, Ганга Қардиа, Лиалиа Ԥаразиа, Дауҭ Зарданиа. 30-ҩык иреиҳаны иранашьоуп Леон иорден, 200 – инарзынаԥшуа – Агәымшәаразы амедал. Аԥсны ахақәиҭра рхы ақәырҵеит 60-ҩык Пицунда абаталион аибашьцәа.

Иультәи ажәылараан Гәыма ақыҭан иҭахеит: Дбар Михаил, Коркьиа Анатоли, Лолуа Баҭаҟәа, Папцаа Мирод, Папцаа Едуард, Панамарчук Александр, Ҳагәышь Аслан, Ҳагәышь Владимир, Харчлаа Нугзар, Ҵышәба Валикәа, Чехьериа Заур.

Абаҟа амҵан ашәҭшьыҵәрақәа шьҭарҵеит аибашьцәа рҭаацәа, аветеранцәа.