сегодня 14:00
Асҭамыр Гәыниеи Елена Поповеи еиҭарҳәеит асурдологиа аусхк аҟны еицырзеиԥшу апрограмма анагӡара атәы
Апрограмма «Аԥсны Аҳәынҭқарраҟны асурдологиатә цхыраареи аудиологиатә скрининги реиҿкаара» аҳәаақәа ирҭагӡаны Аҟәа ишьақәдыргылоит злымҳа иагу ахәыҷқәа зааӡо аҭаацәарақәа рзы акраамҭатәи асоциал-рҵаратә реабилитациа асистема, иара убас имҩаԥысуеит аҭҵаарадырра-практикатә усмҩаԥгатәқәа.
Ареспубликазы акрызҵазкуа ари апроект анагӡара иалацәажәеит Аԥсны агәабзиарахьчара аминистр Асҭамыр Гәыниеи злымҳа иагу ауаа рыцхырааразы икоммерциатәым автономтә еиҿкаара адиректор «Сара адунеи абжьы саҳауеит!» Елена Поповеи. Аусбарҭа ахада инаҵшьны иазгәеиҭеит апроект атәылауаа раԥшьгара ишақәҿнаҭыз.
«Гәыԥҩык ачымазцәа адепутат Алиса Гәлариа лахь ааԥхьара ҟарҵеит, лара лакәзар, Агәабзиарахьчара Аминистррахь ажәалагала ҟалҵеит. Урыстәылатәи Афедерациа агәабзиарахьчара Аминистрра ацхыраарала ҳара иҳалшеит В.В.Дворианчиков напхгара зиҭо Санкт-Петербургтәи алымҳаи, ахәдеи, аԥынҵеи, ацәажәареи рыҭҵааратә институт аусзуҩцәа рыҽрымадара», - ҳәа адырра ҟаиҵеит аминистр.
