Аҟәа. Ажьырныҳәамза 18, 2024 шықәса. Аԥсныпресс. Ажьырныҳәамза 18 рзы Аԥсны иҟоу Приднестровиа-Молдавтәи Ареспублика аофициалтә Хаҭарнакра 17 шықәса ахыҵит. Аԥсны адәныҟатәи аусқәа рминистр Инал Арӡынба Аԥсны иҟоу Приднестровиа-Молдавтәи Ареспублика аофициалтә Хаҭарнакра ахада Гарри Кәпалба дидныҳәалеит.
Адныҳәалараҿы иазгәаҭоуп:
«Шәара ҳаҭыр дула сшышәзыҟо шьақәырӷәӷәо гәык-ԥсыкала ишәыдысныҳәалоит Аԥсны иҟоу Приднестровиа-Молдавтәи Ареспублика аофициалтә Хаҭарнакра аартра 17-шықәса ахыҵра амш.
Аофициалтә Хаҭарнакра аусура Аԥсны Аҳәынҭқарреи Приднестровиа-Молдавтәи Ареспубликеи рыбжьара аусеицура арӷәӷәара аҿы ароль ду нанагӡоит.
Агәрагара аасырԥшуеит аофициалтә Хаҭарнакра аусура иалҵшәаны аԥсны-приднестровтәи аизыҟазаашьақәа ԥхьаҟагьы еизҳара роулап ҳәа», - иазгәаҭоуп адныҳәаларатә цҳамҭа аҿы.
