Аҟәа. Рашәарамза 8, 2022 шықәса. Аԥсныпресс. Аманда Касланӡиа, Лана Ҵәыџьба. Лаҵарамза 14 рзы имҩаԥгаз аиҭалхрақәа раан алхырҭатә ҭыԥхада №18 (ақ. Гәдоуҭа) ала иалхыз адепутат Леонид Лакербаиа, апарламенттә еилакқәа ҩба реилазаара далалеит: абиуџьети акредиттә еиҿкаарақәеи ашәахтәқәеи афинансқәеи рзы аилаки, асоциалтә политикеи аџьеи агәабзиарахьчареи адемографиеи, аветеранцәеи аибашьра аинвалидцәеи русқәа рзы апарламенттә еилаки.
Алхырҭтә ҭыԥхада №18 (ақ. Гәдоуҭа) аҿы хәажәкырамза 12 рзы имҩаԥгаз алхрақәа рҿы иқәгылаз акандидатцәа рҟынтәи аӡәгьы алхрақәа рахь иааиз алхыҩцәа рыбжьқәа рҟынтәи 50% еиҳаны иахьырмоуз инамаданы аиҭалхрақәа рымҩаԥгаразы аӡбамҭа рыдыркылеит.
Адепутат Асҭамыр Герхьелиа аграртә политикеи аԥсабаратә ресурсқәеи аекологиеи рзы апарламенттә еилакы аҟынтәи аекономикатә политикеи ареформақәеи рзы апарламенттә еилакы ахь дыиасит.
