Аҟәа. Мшаԥымза 26, 2023 шықәса. Аԥсныпресс. Аԥсны Жәлар Реизара – Апарламент Аиҳабы Ашәба Лаша Аԥсны Аҳәынҭқарра Аконтрольтә палата аколлектив дыдирдырит анапхгаҩ ҿыц – Каха Пертаиа.
Лаша Ашәба Апалата аусзуҩцәа, иара анаԥҵаз инаркны напхгаҩыс ирымаз хаҭала Роберт Аршба иҭабуп ҳәа реиҳәеит имҩаԥгоу аусуразы: «Иахьатәи ахҭыс акраҵанакуеит, Аԥсны Аҳәынҭқарра Аконтролтә палата анапхгаҩы ҿыц дышәҳардыруеит. Аха уи аԥхьа Аԥсны Жәлар Реизара – Апарламент ахьӡала Роберт Аршба иҭабуп ҳәа иасҳәарц сҭахуп имҩаԥигаз аусуразы. Аколлектив зегьы иҭабуп ҳәа расҳәарц сҭахуп, избанзар шәара шәхааноуп аусбарҭа ауасхыр аназышьҭаҵоу, аҳәынҭқарра аихьӡарақәа ирызку алҵшәа бзиақәа раарԥшрагьы шәылшеит. Сгәы иаанагоит зышьаҭа ку атрадициа бзиақәа ирыцҵахоит ҳәа.
Аконтрольтә палата есқьынгьы азакәанреи, аргамаоеи, аҭакԥхықәра дуи ҟазшьа ҷыданы иаман».
Ашәба Лаша Аршба Роберт Аԥсны Аҳәынҭқарра азакәанԥҵара аҿиараҟны илагаламҭазы Аԥсны Жәлар Реизара – Апарламент Аҳаҭыртә шәҟәы ианеишьеит.
Аршба Роберт иҭабуп ҳәа ахиҳәааит ирҭаз азҿлымҳаразы: «10 шықәса раахыс сусура зегьы ара зыӡбахә ҳәаз апринципқәа ирыдҳәалан. Ишәзеиӷьасшьар исҭаху – хымԥада, урҭ рықәныҟәароуп. Сгәы иаанагоит аколлектив ахантәаҩ ҿыц адгылара ирҭоит ҳәа».
Аапалата аколлектив анапхгаҩы ҿыц ддырдыруа, Ашәба Лаша Каха Пертаиа идиныҳәалеит аҭакԥхықәра зцу аҳәынҭқарратә маҵзурахьы иалхра.
«Каха Заур-иԥа ҳара даҳдыруеит аҭакԥхықәра ныҟәызго, асистематә хәыцра змоу аӡә иаҳасабала. Агәра згоит аколлективи Шәареи иақәнагоу аизыҟазаашьақәа шәыбжьашәҵап ҳәа. Аколлектив профессионалтәуп, аихьӡарақәа жәпакы амоуп, урҭ аихьӡарақәа реихаҳара аилыршахоит ҳәа сгәы иаанагоит.
Апарламент Аиҳабы иара убас иаҵшьны иҳәеит: «Аудиторцәа ракәзар, урҭ рыҩныҵҟа иҟоуп аԥышәа змоу, насгьы ҩыџьа 1992–1993 шш. Аԥсны Аџьынџьтәылатә еибашьра аветеранцәоуп. Ас еиԥш иҟоу ауаа адгылара шәырҭар, зегьы шәылшоит. Аихьӡарақәа шәзеиӷьасшьоит».
Каха Пертаиа Апарламент Аиҳаби адепутатцәеи ирҭаз агәрагаразы иҭабуп ҳәа раҳәаны, иазгәеиҭеит Аконтрольтә палата аҳәынҭқарра ашьақәгылареи аҿиареи рыҟны иамоу аҵак ду.
«Аколлектив аганахьала азакәанра апринципқәа рықәныҟәарала, зхаҭабзиара ҳараку, алҵшәа змоу аусура мҩаԥаҳгап ҳәа сгәы иаанагоит», - иҳәеит иара, Роберт Аршба иусуразгьы иҭабуп ҳәа иаҳәаны.
Мшаԥымза 19 рзы Аԥсны Жәлар Реизара – Апарламент асессиа аилатәараҟны адепутатцәа Каха Пертаиа Аԥсны Аҳәынҭқарра Аконтрольтә Палата ахантәаҩыс далырхит.
