Аҟәа. Мшаԥымза 27, 2023 шықәса. Аԥсныпресс. Аминистрцәа Реилазаара хатәгәаԥхарала еибашьуаз, Донбасс имҩаԥысуа иҷыдоу арратә операциа аҿы иҭахаз Дмитри Торгашови Бесик Липартиеи рҭаацәа рзы зныктәи асоциалтә цхыраара шьақәнарӷәӷәеит.
Дмитри Торгашов иаб 1 млн. мааҭ рҟынӡа инаӡо зныктәи асоциалтә цхыраара изшәахоит Бесик Липартиа иҭаацәа – 500 нызықь мааҭ.
Атәыла Анапхгара ала иара убас ишьақәыргылахеит Адам Лагәлаа иҭаацәа рзы иназыцҵоу асоциалтә цхыраара.
Донбасстәи Жәлартә Республика хатәгәаԥхарала еибашьуаз Адам Лагәлаа иҭаацәа данҭаха амш инаркны иҭынхаз ихәыҷқәа рыцыԥхьаӡа есымза ирызшәалахоит 10 нызықь мааҭ.
Асоциалтә цхыраара ахәыҷқәа ироулоит 18 шықәса рхыҵаанӡа. Ахәыҷқәа латәарала иҷыдоу абжьаратәи, мамзаргьы иреиҳаӡоу аҵараиурҭақәа рҿы аҵара рҵозар, усҟан урҭ 23 шықәса рхыҵаанӡа асоциалтә цхыраара раҭалахоит.
