28.Мшаҧы.2023

Аԥснытәи адраматә театр аҿы ахәаԥшцәа иддырбеит аԥхьарбаратә спектакль «Атәымуаҩ дызлагылоу аҭаацәаратә портрет».

Аҟәа. Мшаԥымза 28, 2023 шықәса. Аԥсныпресс /Алексеи Шамба/. С. Ҷанба ихьӡ зху Аԥснытәи аҳәынҭқарратә драматә театр мшаԥымза  27 – 28 рзы Алхас Шамба иқәиргылаз аспектакль  «Атәымуаҩ дызлагылоу аҭаацәаратә портрет» аԥхьарбарала  ахәаԥшцәа ргәалаҟазаара шьҭнахит.  

Ари апиеса алхра машәыршақә иҟамлаӡеит. Урыстәылатәи адраматург Степан Лобозиоров еицырдыруа икоммедиа аҵакы еилкаауп. Имариам иахьатәи ҳаамҭазы даара иҳазхом апозитив, убри аҟнытә игәыҟаҵагоу, агәалаҟазаара шьҭызхуа ари аҭоурых ҳәара аҭахымкуа иаамҭаҵәҟьаны иҟоуп.  

Иааркьаҿны асиужет ҳазааҭгылап. Уи абас иҟоуп. Ақыҭатәи аклуб адиректор атәымџьарантәи иааз асахьаҭыхыҩ абжьааԥнытәи ауадаҩрақәеи аимак-аиҿакқәеи змоу иаабац ҭаацәарак рҿы дынирхеит. Аԥшәма ишьапы ԥҵәаны дышьҭоуп, иара аҩыжәра иахьҽадицало азы иԥшәмаԥҳәыс  диацәҳәауеит, аԥҳа аиститут аҭалареи ақалақь аҿы инхо арԥыс длынасыԥхарц лҭахуп, анду, уих, есымша дгәамҵуеит, дмырмыруа аҩны дыҩноуп... Адиректор иакәзар, асахьаҭыхыҩ аԥшәмацәа рыԥҳа длеиламҳарц азы асаси аԥшәмацәеи зеиҿамԥшуа иҟаларц ацәгьақәа рыбжьиҳәоит, илшо зегьы ҟаиҵоит. Убасала, ишнеишнеиуа дара хыла-гәыла еилалоит!

Ари аурыс ҷыдаҟазашьа змоу, аурыс иумор зныԥшуа аурыс рҿиамҭа арежиссиори актиорцәеи аԥсуацәа ахаҵаны аарԥшра рҽазыршәеит.  Уи зеиӷьыҟам ала ирылшеит.  Амилаҭқәа зегьы дара рхатәы иумор шрымоугьы, араҟа имҩаԥысуаз аиҭагара адагьы заманалаҵәҟьа еилукааратәы иҟан. Аԥсуа театр актиор ҟазацәа Маиа Џьыкырба, Гарри Џьынџьал, Гәыда Ажьиба, Есма Кәыҵниа, Гәыдиса Ҭодуеи Леон Кәыр-огли афеериатә ҟазшьа аҭаны ррольқәа нарыгӡеит, уи иабзоураны апиеса ихадоу ахшыҩҵак ахәаԥшыҩ иҟынӡа цәыӡда инаӡеит. Иара еижьаганы имариоуп, аха акыр иуниверсалтәуп, актуалрагьы аҵоуп: иахьа даҽа аамҭанык еиԥшымкәа аҵак ду амоуп аӡәи аӡәи реизыӡырҩра, арыцҳеибашьареи аӡәы ихьаа аганахь авамсреи.

Ароль хадақәа руак назыгӡоз Гәыдиса Ҭодуа аԥхьарбараанӡа Аԥсныпресс акоррепондент диҿцәажәо абас иҳәеит:

«Аԥсны макьаназы ҳара иааҳакәыршаны иҟоу рахь ахшыҩзышьҭреи агәцаракреи раарԥшра ҳҽазаҳшәоит, аха иагьа ус иҟазаргьы, узызхәыцша рацәоуп. Сара сгәаанагарала, ахала аҟазаареи хи-ԥси мацара рзы адәы ақәзаареи, - уи даара ихәарҭам усуп».

P.S. Ахәаԥшцәа рыла иҭәыз азал абара, гәыкала аччабжь аҳареи актиорцәа ргәыхыҭхыҭра анырреи шаҟа игәыҟаҵагахазеи. Аспектакль бзиаӡа ҳзырбази здаҟам атәыла амилаҭтә театр хымԥада аиҭарҿиара шыҟало азы агәрагареи ҳазҭаз ақәыргыларатә гәыԥ зегьы иҭабуп ҳәа раҳҳәоит. Ас еиԥш ахҭысқәа уанрыхәаԥшлк ашьҭахь, уи убасҵәҟьа ишыҟало азы агәыҩбара узцәырҵӡом.

 

 


Read 206 times
Image
Image
Image
Image
Информационное Агентство "АПСНЫПРЕСС" (РГУ "АПСНЫМЕДИА") © 2024
Все права на любые материалы, опубликованные на сайте, защищены в соответствии с абхазским и международным законодательством об авторском праве и смежных правах. Использование любых аудио-, фото- и видеоматериалов, размещенных на сайте, допускается только с разрешения правообладателя и ссылкой на www.apsnypress.info.