Аҟәа. Лаҵарамза 4, 2023 шықәса. Аԥсныпресс. Лаҵарамза 6, асааҭ 11:00 рзы, В.Арӡынба ихьӡ зху Аҳәынҭқарратә Арратә Ахьӡ-Аԥша амузеи Аԥсны иҟоу Урыстәыла аус ацура Ахаҭарнакреи Аԥсны Аҳәынҭқарра Ахада Иусбарҭа, атәылахьчара Аминистрра, Аԥсны иҟоу Урыстәыла Ацҳаражәҳәарҭа рыцхыраарала имҩаԥгахоит жәларбжьаратәи акциа «Агәалашәара Амца».
Акциа аҳәаақәа ирҭагӡаны урыстәылатәи аган ала аԥснытәи аган иамадахоит Александратәи абаҳча аҿы Кремльтәи аҭӡы ааигәара иаку Имыцәо амца ахәҭаҷқәа.
Идырым Асолдаҭ иҳаҭгәын — Александратәи абаҳча аҿы Кремльтәи аҭӡы ааигәара иҟоу амемориалтә архитектуратә ансамбль ауп. 1997 шықәса инаркны Идырым асолдаҭ иҳаҭгәын аԥхьа ишьақәгылоуп Аԥыԥшырҭа № 1. Ари амонумент Урыстәыла акультуратә ҭынха аобиект астатус аҭоуп, иара убас арратә ахьӡ-аԥша Амилаҭзегьтәи амемориал астатус ахҵоуп.
Ҭагалан, 1966 шықәсазы Асовет Еидгыла Акоммунисттә Партиа Акомитет Хада Кремль аҭӡқәа рааигәара амемориал – Аџьынџьтәылатәи еибашьра Дуӡӡа аҿы иҭахаз афырхацәа ргәалашәара иазкны – Идырым асолдаҭ Иҳаҭгәан аԥҵара азы ажәалагала ҟанаҵеит. Ас еиԥш аԥшьгара Москва амҵан анемец фашисттә архәҭақәа рықәхра 25- шықәса ахыҵра иадҳәалахеит.
Идырым асолдаҭ иԥсыбаҩ ԥхынҷәынмза 2 рзы ԥыхьатәи аихамҩатә станциа азааигәара иҟаз аиашьаратә нышәынҭра аҟынтәи анышә иҵхны аексгумациа мҩаԥган. Араҟоуп 1941 шықәса анҵәамҭазы аӷа иршьаҟауааи итанктә архәҭақәеи ржәылара ахьаанкылаз.
Ԥхынҷкәынмза 3, 1966 шықәсазы аԥсыбаҩ зҭаз аҭоубыҭ аҳҭнықалақь ахь иааргеит. Аҳаҭыртә карули аибашьра аветеранцәеи зцыз аԥсыжратә процессиа Ленинградтәи ашоссе аҟынтәи Манежтәи аплошьад аҟынӡа имҩасит.
Анаҩс алахьеиқәҵаратә митинг мҩаԥысит. Араҟа ажәахә ҟаҵо дықәгылеит Криуково агаразы ажәыларақәа рҿы 16-тәи архәҭа акомадаҟаҵаҩыс иҟаз Асовет Еидгыла амаршал Константин Рокоссовски. Амитинг ашьҭахь аҭоубыҭ Александратә баҳча ахь ииаргеит, анаҩс артиллериатә салиут еицҭырҟьаны уи анышә иамардеит.
