Аҟәа. Лаҵарамза 16, 2023 шықәса. Аԥсныпресс. Аҳәынҭқарра Ахада Аслан Бжьаниа Урыстәыла иҟоу, иара убас аилагӡарала Аԥсны иҟоу Венесуела ацҳаражәҳәаҩ ҿыц Хесус Рафаель Саласар Веласкес иҟынтәи агәраргагатә шәыҟәқәа идикылеит.

Аҳәынҭқарра Ахада ацҳаражәҳәаҩ бзиала уаабеит ҳәа еиҳәеит. «Шәара Аԥсны Венесуела аинтерресқәа ахаҭарнакра аура иадҳәалоу аҳаҭыртә, аҭакԥхықәра зцу амиссиа анагӡаразы анапынҵа шәмоуп. Шәара шәусура еиуеиԥшым аспектқәа: аполитикатә, ахәаахәҭра-економикатә, агуманитартә, иара убас, раԥхьа инаргыланы, ҳҳәынҭқаррақәа рыжәларқәа рыбжьара аимадара абжьаҵара ирыдҳәалахоит», - ҳәа иҳәеит Аслан Бжьаниа.  

Аҳәынҭқарра Ахада, аҳәынҭқаррабжьаратәи аизыҟазаашьақәа рҭоурых ахы ыҵнахит цәыббрамза 10, 2009 шықәсазы, усҟан Венесуела Аԥсны Аҳәынҭқарра ахьыԥшымра азханаҵеит ҳәа иазгәеиҭеит.  

«Ҳажәлари ҳҳәынҭқарреи рзы аҵак ду амоуп Венесуела аганахьала Аԥсны Аҳәынҭқарра азхаҵара»,- ҳәа иҳәеит Аслан Бжьаниа.

Аҳәынҭқарра Ахада инаҵшьны иазгәеиҭеит Ахада Уго Чавес Фриас Аԥсны азхаҵараҟны илагаламҭа. «Аԥсны жәлар ҳаҭырла дыргәаладыршәоит Венесуела ажәлар рҵеи иаша, раԥхьагыла Уго Чавес Фриас», - ҳәа иҳәеит иара.

Аслан Бжьаниа Аԥсны Аҳәынҭқарра Ацҳаражәҳәарҭа Венесуела иаартын 2010 шықәсазы, уи атәыла аполитикатә, адипломатиатә, акультуратә ԥсҭазаара активла ахы аланархәуеит ҳәа иазгәеиҭеит.

«Ҳара ҳусеицура ессаира аҽарӷәӷәоит. Адунеи аҿы уажәы имариам аҭагылазаашьа шьақәгыланы иҟоуп. Убри инамаданы ҳтәылақәа  рыбжьара аҩганктәи, аимабзиаратә еизыҟазаашьақәа рыҿиара ҷыдала аҵак ду аҵоуп», - ҳәа инаҵшьны иазгәеиҭеит Аҳәынҭқарра Ахада.

Ацҳаражәҳәаҩ Хесус Рафаэль Саласар Веласкес Аслан Бжьаниа иҭабуп ҳәа еиҳәеит асасдкыларазы. «Иахьатәи аусмҩаԥгатә сара сзы ҭагылазаашьа бзиоуп ара аҟазааразы, Аԥсны жәлар ҳаҭырла ҳшырзыҟоу аарԥшразы. Ҳара ҳдацқәа зыԥсҭазаара зегьы ахақәиҭра иазызкыз, зхы иақәиҭу, ихьыԥшым ауаа рҟынтә иаауеит. Ҳара ҳдипломатиа ажәларқәа ахатәҳәаақәҵаразы ирымоу азин ҳаҭыр ақәҵара иазкуп», - иҳәеит Ацҳаражәҳәаҩ.

Иазгәеиҭеит аԥхьаҟагьы аизыҟазаашьақәа рырӷәӷәареи рырҿиареи дышрықәгәыӷуа. «Ара сара аҩны сыҟоушәа збоит», - ҳәа иазгәеиҭеит иара.

«Сара Карибтәи адгьылқәа рҟынтәи, ҳҳәынҭқарра ахада Николас Мадуро Морос, атәыла анапхгареи Венесуела ажәлари рҟынтәи асалам шәзаазгеит. Цәыббрамза 10, 2009 шықәса аҩганктәи аизыҟазаашьақәа рыҿиара аҿы акыр зҵазкуа аҭоурыхтә хҭысны ҳгәалашәараҿы иаанхоит», - ҳәа иҳәеит Ацҳаражәҳәаҩ.

Иара иазгәеиҭеит, иара изы, Уго Чавес ишьҭрақәлаҩ, иҵаҩы иаҳасабала, араҟа аҟазаареи Аԥсны иҟоу ацҳаражәҳәаҩ иҭакԥхықәра анагӡареи ҳаҭыр дуны ишыҟоу.

Агәраргагатә шәыҟәқәа ранашьара иазкыз аныҳәатә церемониа рхы аладырхәит Аҳәынҭқарра Ахада Ихаҭыԥуаҩ Бадра Гәынба, атәыла аԥыза-министр Алеқсандр Анқәаб,  Жәлар Реизара-Апарламент Аиҳабы Лаша Ашәба, Аҳәынҭқарра Ахада Иусбарҭа анапхгаҩы Џьансыхә Нанба.