01 Ԥхынкәын 2021

АЖӘАБЖЬҚӘА

Аҟәа. Абҵарамза 3, 2021 шықәса. Аҧсныпресс. Аҧсны агәабзиарахьчара аминистр Едуард Быҭәба атәыла амедусбарҭақәа рҳақьым хадацәеи аепидемиологцәеи алархәны авакцинациа амҩагара азы  изаамҭанытәиу азҵаарақәа рылацәажәара мҩаҧигеит. 

Аусмҩаҧгатә ихы алаирхәит амобилтә еимадара азы Аилазаара «А-Мобаил» адиректор Хада Борис Барцыц. Уи алаҵа ҟазҵахьоу ауаа уи азы QR- код зцу асертификат аелектронтә версиа рыҭара азы аплатформа аҧҵара апроцесс шымҩаҧысуа атәы еиҭеиҳәеит. 

«Аусурақәа зегьы рхыркәшара азы мышқәак аҭаххоит. Иахьа ҳара абаза аҧышәара мҩаҧаагоит»,- ҳәа иҳәеит Борис Барцыц.

Убри аан агәабзиарахьчара аминистр авакцина ҟазҵахьоу ауаа рзы адыррақәа шыхьчахо, насгьы агәабзиарахьчара Аминистрра аҿы ишеизгахо азы адырра ҟаиҵеит. Аминистр иажәақәа рыла, араҟа аилазаара «А-Мобаил» апрограмматә еиқәыршәара аҿы ацхырааҩ аҳасабала иқәгылоит.

QR- кодқәа раиура ауааҧсыра рзы  излауа ала ирмариахоит. Аамҭа кьаҿ иалагӡаны урҭ раиура азы ихымҧадатәиу аинформациа зегьы аларҵәахоит.

Аҟәа. Абҵарамза 3, 2021 шықәса. Аҧсныпресс.  Аҧсны Жәлар Реизара-Апарламент ҧыхьатәи адепутат, 1992-1993 шш. Аҧсны жәлар Рџьынџьтәылатәи еибашьра аветеранцәа Еиду Ахеидкыла  ахаҭарнак Ахра Бжьаниа, Апарламент ҧыхьатәи адепутат, ауаажәларратә еиҿкаара «Аидгылара» ахантәаҩы Кан Кәарҷиа, Очамчыра араион абыргцәа Рхеилак ахантәаҩы Ныгәзар Кациа, ҧыхьатәи аекономика аминистр, ауаажәларратә еиҿкаара «Аҧсны жәлар Реиҿкаара» анапхгаҩы Адгәыр Арӡынба, Апарламент ҧыхьатәи адепутат, ауаажәларратә еиҿкаара «Аруаа» ахантәаҩы Ҭемыр Гәлиа,  иара убас аибашьра аветеран Зураб Кокаиа ҳазҭоу ашықәс цәыббрамза 30 рзы Аҟәа ақалақь, Амҳаџьыраа Рыҧшаҳәа аҟны Жәлар Реизара-Апарламент адепутат Гарри Кокаиа, аибашьра аветеранцәеи аҩныҵҟатәи аусқәа Рминистрра анапхгараҭара ахаҭарнакцәеи рыбжьара  иҟалаз аинциденти, иара убас иахьатәи амш азы атәыла аҩныҵҟа ишьақәгылаз аҭагылазаашьеи рзы ргәаанагара рҳәарц азы иахьа Апарламент аилатәара ахь иааит. 

Ахра Бжьаниа иҳәеит: «Амшын аҧшаҳәа аҿы иҟалаз аинцидент азинтә гәаангара аганахьала ахәаҧшреи, ариашареи ахәшьара аҭареи залыршахом, избан акәзар, апроцессуалтә нормақәа зегьы реилагалара, изеиҧшразаалак ахарадҵара ада Аҧсны атәылауаа рганахьала амчра ахархәара мҩаҧысит, урҭ ҧҟаны икажьны ицеит».

Ахра Бжьаниа игәаангарала, амчратә структура ахаҭарнакцәа рхымҩаҧгашьа акала аилыркаареи ариашареи моралла еиҧш аидеологиа аганахьалагьы иҟалаӡом.

«Иҧшьоу Аиааира Амшныҳәа аҽны аибашьра аветеранцәа, аинвалидцәа рыҧҟоит, аплошьад аҿы  икажьны ицоит. Ари  ҟазҵазгьы аҳәынҭқарра ахаҭарнакцәа роуп, абарҭ аветеранцәеи иара ҳара зегьи ашәахтәқәа ззаҳшәо аструктурақәа, азакәанҧҵара инақәыршәаны зусура иалкаау аҳәаақәа ирҭагӡоу ауаа. Ас еиҧш иҟоу аҳәаақәа ирҭагӡам  ауснагӡатәқәа зегьы – абандитизм ауп.  Убри аҟнытә амилициа азы азакәани егьырҭ анормативтә актқәагьы ыҟоуп. Аҭагылазашьа еиҳагьы изыруадаҩуа акакәны иҟоуп даҽакгьы, - дара азинхьчаҩцәа рхаҭақәагьы Аиааира Амш азгәарҭон, ахҭыс ахьыҟалаз аҭыҧ ахь инеит ақьафурҭа аҟынтәи. Аветеранцәа ари амш аҽны ауаажәларра рзы  изеиҧшразаалак ашәарҭара рхылҿиаауазҭгьы, иашьашәалоу ауснагӡатәқәа мҩаҧгатәын. Авидеоҭыхымҭа аҿы иубоит иҭацәу аплошьад аҿы ауаа ҭынч доусы  рмашьынақәа рахь ишнеиуа. Иарбан  шәарҭароу нас идырҿиоз урҭ ауаа рзы, уи еилкааӡам?», - ҳәа иҳәеит Ахра Бжьаниа. 

Ахра Бжьаниа аминистр акзарак акгьы ихараӡам, уи аветеранцәа рганахьала амчра ихы аимырхәеит, уи мацара инапы аҵаҟа иҟоу роуп ус зхы мҩаҧызгаз, убри аҟнытә иара иарбоу аинцидент азы аҭакҧхықәра идӡам ҳәа зҳәо ауаа дрықәшаҳаҭӡам.

«Исҳәарц исҭаху, иара зынӡа инапгьы имҟьазҭгьы, баша уаҟа дыҟазҭгьы, уигьы азхон иара иганахьала ӷәӷәала аҽҧынкылара аиуразы. Уимоу, иара ақалақь егьи аҵыхәан аныҳәа азгәеиҭозҭгьы, убри аан иара инапаҵаҟа иҟоу аусзуҩцәа, ахәҭакахьала ихаҭыҧуаҩцәа ас еиҧш ахымҩаҧгашьа аадыршызҭгьы, усҟангьы иара имаҵураҭыҧ аанкылара алзмыршо аҭакҧхықәра идҵахон», - ҳәа иҳәеит Ахра Бжьаниа.

Ахра Бжьаниа игәанагарала, аминистр иҟалаз аинцидент ашьҭахь ихала имаҵураҭыҧ аанижьыр акәын. Ас еиҧш аҭагылазаашьаан уи уаанӡа заҟа еффективла анапхгаҩы иуалҧшьа наигӡоз ахшыҩзышьҭра аҭатәӡам.

«Ҿырҧштәыс иаазгар сылшоит ҳаамҭазтәи аҭоурых аҟынтәи жәабала аҿырҧштәқәа, даара еффективла аус зуа анапхгаҩцәа знык иадамзаргьы ауаажәларра ринтересқәа ирықәымшәо руснагӡатәқәа рзы ҧхьатәара ианцоз. Уажәы иҟалаз ахҭыс азинхьчаратә система ахҧша акала иашьамшәало ауснагӡатә аҭыҧ аиуит.  Уи арҽеира азы, сара сгәаанагарала, аминистр ҧхьатәара дышцо азы аҳәамҭа ҟаиҵар ауп.  Уи ихала уи дзазымхәыцзаргьы, уи ҟазҵаша Аҳәынҭқарра Ахада дҳамоуп.  Ҳара Апарламент ахь ааҧхьара ҟаҳҵоит иарбоу ахҭысқәа ииашоу ахәшьареи ахҳәааи арҭарц, насгьы иалшоны иҟазар, Аҳәынҭқарра Ахада абжьгарак аҳасабала иҵырҳәарц уи ауаажәларра ринтерес ахьӡала ииашаны хьаҳә-хьачарада аӡбамҭа адкылара шихәҭоу», - ҳәа иажәа хыркәшо инаҵшьны иазгәеиҭеит Ахра Бжьаниа.

Аҟәа. Абҵарамза 3, 2021 шықәса. Аҧсныпресс.  Аҧсны Жәлар Реизара-Апарламент адепутатцәа «Аҧсны Аҳәынҭқарреи Урыстәылатәи Афедерациеи рҳазылхратә усбарҭақәа рҿы наҟ-ааҟтәи азшьа азы» Аҧсни Урыстәылеи ирыбжьарҵаз Аиқәшаҳаҭра аратификациа азыруит.

Аусшәҟәы адгалара мҩаҧго, Аҳәынҭқарра Ахада Апарламент аҟны есымшатәи ихаҭарнак Саида Быҭәба ари аиқәшаҳаҭра аҳәынҭқаррабжьаратәи астатус шамоу азгәалҭеит. Ари аиқәшаҳаҭра анапаҵыҩра еиҧыларада имҩаҧган: аҧсуа ган анапаҵыҩра мҩаҧнагеит жәабранмза 18, 2021 шықәсазы, урыстәылатәи аган – мшаҧымза 5, 2021 шықәсазы.

«Аиқәшаҳаҭра аганқәа рҳазылхратә усбарҭақәа русзуҩцәа, азинҷыдала ишьақәыргылоу, аганқәа иахьрыҵанакуа амаҵуратә усура инамданы ирҳау амаҵурашықәс уахь иналаҵыны, аганқәа рзакәанҧҵара инақәыршәаны ишьақәыргылоу ашәагаа ала  амаҵура аџьашықәс азы аулафахәы ахь ахәцҵақәа ршәара азы  амаҵзура аџьашықәс наҟ-ааҟтәи азхаҵара азҧхьагәанаҭоит», - ҳәа иазгәалҭеит лара.

Аиқәшаҳаҭра аҽҳәара ацҵара азы алшара аманы, хәы-шықәсатәи  аҽҳәара иҭагӡаны анапаҵыҩра мҩаҧгоуп.

Аҟәа. Абҵарамза 3, 2021 шықәса. Аҧсныпресс. Аҧсны Жәлар Реизара-Апарламент адепутатцәа «2021 шықәсазы Ареспубликатә биуџьет азы» азакәан аиҭакрақәеи ацҵақәеи аларгалеит. 

Аусшәҟәы адгалара мҩаҧылгеит абиуџьети акредиттә еиҿкаарақәеи ашәахтәқәеи афинансқәеи рзы Апарламент Аилак ахантәаҩы Натали Смыр.

«Аҳәынҭқарратә биуџьеҭ ахырхарҭа  хадақәа абарҭ ашәагаақәа рыла ишьақәырӷәӷәахоит: ахашәалахәқәа рыла – 10 млрд.903 млн. мааҭ, аныхтә хәҭа ала – 12 млрд. 187 млн. мааҭ. Абиуџьеҭтә дефицит 1 млрд 283 млн. мааҭ рҟынӡа еизҳаит. Иара убас ареспубликатә биуџьеҭгьы апараметрқәа рҽеиҭаркуеит. 2021 шықәсазы Ареспубликатә биуџьеҭ ахашәалахәқәа рзеиҧш еицҵалыҵ – 8 млрд.587 млн мааҭ рҟынӡа инаӡеит, ахарџьтә хәҭа – 9 млрд. 821 млн. мааҭ», - ҳәа адырра ҟалҵеит адепутат Натали Смыр.   

Абиуџьеҭ еиҭаку апараметрқәа рылацәажәара апрофилтә комитет аҿы ҩынтә имҩаҧысит.

Азакәан апроект акомитет аҿы алацәажәараан Абжьаҟазаратә ӡбарҭа аӡбамҭа ала ауалқәа ршәара азы иазҧхьагәаҭаз 90 млн. мааҭ  иарбоу ахырхарҭа ала рдәықәҵара мап ацәкра азы аӡбамҭа рыдыркылеит. 

«Сара, атәачахәқәа ршәара ала ауалқәа ахьыҟоу, аковид алаҵәара иахьаҿу аҳәынҭқарра аҿы 2011 инаркны 2014 шықәсанӡа ишьақәгылаз ауалқәа рыхҩара азы 90 млн. мааҭ рдәықәҵара ахықәкы иашьашәаламкәа исыҧхьаӡоит... Насгьы, аиаша шәасҳәап, сара ас еиҧш еилкаам аӡбамҭақәа здызкыло аӡбарҭақәа митәык рыгәра сгом.  Ауалқәа реицҵалыҵ –  312 млн мааҭ рҟынӡа инаӡоит. Ҳара анагӡаратә мчра 90 млн. мааҭ аҳҭар, усҟан иарбан принцип ала, аиуаратәи, аиҩызаратәи, мамзаргьы аобиективтә аку арҭ аҧаратә хархәагақәа реихшара шымҩаҧысло?! - ҳәа азҵаара ҟалҵеит адепутат Натали Смыр.

Аҟәа. Абҵарамза 3, 2021 шықәса.  Аҧсныпресс.  Абҵарамза 2 рзы Аҟәа ақалақь ахада Беслан Ешба ихьӡала 1992-1993 шш. Аҧсны Аџьынџьтәылатәи еибашьра аветеранцәа Еиду Ахеилак ахаҭарнак Ахра Бжьаниа инапы зҵаиҩыз иарбоу Ахеилак  аҟынтәи ашәҟәы неит. Ашәҟәы аҿы ахәҭакахьала иазгәаҭоуп: «Адырра шәаҳҭоит, абҵарамза 4, 2021 шықәса рзы  Аҟәа ақалақь Адраматә театр аҿаҧхьа 1992-1993 шш. Аҧсны жәлар Рџьынџьтәылатәи еибашьра аветеранцәа Еиду Ахеилак амитинг  мҩаҧнагоит.  Уи алагоит асааҭ 13:00 рзы».

Ари ашәҟәы аҭак ҟаҵо Аҟәа ақалақь ахада Аҳәынҭқарра Ахада Иқәҵара инақәыршәаны амассатә усмҩаҧгатәқәа рымҩаҧгара азы аҧкрақәа алагалоуп ҳәа иҳәеит, ҳәа иаанацҳауеит аҳҭнықалақь Ахадара апресс-маҵзура.

Аҟәа. Жьҭаарамза 30, 2021 шықәса. Аԥсныпресс. Жьҭаарамза 30 рзы Аԥсны аполитикатә репрессиақәа ирылаӡыз ргәалашәара Амш азгәарҭоит. Аҭоурыхдырыҩцәа изларҳәо ала, Аԥсны ХХ ашәышықәса  30-тәи - 40 - тәи ашықәсқәа рзы арепрессиақәа зықьҩыла ауаа ирыхькьысит, раԥхьаӡа иргыланы аинтеллигенциеи аполитикатәии аеилита иаҵанакуаз.

Шьыжьы инаркны Апарламент аҿаԥхьа иҟоу асквер аҿы игылоу аполитикатә репрессиақәа ирылаӡыз рбаҟа амҵан ашәҭ шьыҵәрақәа шьҭарҵеит арепрессиақәа ирықәшәаз рыуацәеи рҭахцәеи, ауаҩы изинқәа рыхьчаразы азинмчы змоу Асида Шьаҟрыл, ауаажәларра рхаҭарнакцәа.

Асида Шьаҟрыл аполитикатә репрессиақәа  – ари даара атрагедиа дууп, усҟан миллионла ауаа ҿааҳәыра рымамкәа алагерқәа рахь ишьҭын, шәнызықьҩыла иреихсны ишьын ҳәа инаҵшьны иазгәалҭеит.  Уи ишазгәалҭаз ала, ари амш аҽны формалла ааха зауз ауаа ргәалашәара акәымкәа, усҟантәи аамҭазы иҟалаз арыцҳара ду ҩаԥхьа аҟамларазы ахшыҩзышьҭра аҭареи иахәҭоу алкаақәа рыҟаҵареи роуп хадара злоу.  

Аҟәа. Жьҭаарамза 29, 2021 шықәса. Аԥсныпресс. Аԥсны Аҳәынҭқарра Ахада Аслан  Бжьаниа Москва иусуратә визит аҳәаақәа ирҭагӡаны имҩаԥысит Урыстәыла атранспорттә министр Витали Савелиеви иареи реиԥылара.

 Аҟәа. Жьҭаарамза 29, 2021 шықәса. Аԥсныпресс. Аслан Бжьаниеи Урыстәылатәи Афедерациа аспорт аминистр Олег Матыцини реиԥылара мҩаԥысит.

Аԥсны Аҳәынҭқарра Ахада Аслан Бжьаниеи Урыстәылатәи Афедерациа аспорт аминистр Олег Матыцини реиԥылара мҩаԥысит.

Аҟәа. Жьҭаармза 29, 2021 шықәса. Аԥсныпресс. Аԥсныҟа иааит Ҟарачы-Черкессиатәи Ареспублика акультура аминистр Зураб Агирбов  напхгара зиҭо аделегациа. Иколлега дидикылеит Аԥсны акультура аминистр Гәыдиса Агрба.

Аусуратә еиԥылара аҳәаақәа ирҭагӡаны аусеицуреи арҿиаратә еимадареи рырӷәӷәара иадҳәалоу азҵаарақәа жәпакы ирылацәажхәеит, ҳәа адырра ҟанаҵоит Аԥсны акультура Аминистрра апресс-маҵзура.

Аҟәа. Абҵарамза 29, 2021 шықәса. Аԥсныпресс.  Аҳәынҭқарра Ахада Аслан Бжьанаиа анаука Амш инамаданы Аԥсны Аҳәынҭқарра анаукатә еилазаара дрыдныҳәалеит. Адныҳәалара ашәҟәы аҿы, ахәҭакахьала иазгәаҭоуп:

«Азин сышәҭозар, шәзанааҭтә ныҳәа – анаука Амш шәыдысныҳәалар сҭахуп.

Аҵарауаҩны аҟазаара – уи аԥсҭазаара зегьы иалагӡаны иҿыцу аартрақәеи адыррақәеи рыла игәылҭәаау, есыҽнытәи аҽадцалара зҭаху аусура аҽазкра ауп иаанаго. Ҳҵарауаҩ дуқәа рыхьӡқәа хьтәы нбанла ҳҭоурых адаҟьақәа рыдагьы адунеи анаука аҭоурых ианылеит.  

ПАРЛАМЕНТ-НАРОДНОЕ СОБРАНИЕ РА<br>Официальный сайт
АГЕНТСТВО ПРАВИТЕЛЬСТВЕННОЙ СВЯЗИ РА<br>Официальный сайт
АДМИНИСТРАЦИЯ ПРЕЗИДЕНТА РЕСПУБЛИКИ АБХАЗИЯ<br>Официальный сайт
МЧС РЕСПУБЛИКИ АБХАЗИЯ<br>Официальный сайт
КАБИНЕТ МИНИСТРОВ РЕСПУБЛИКИ АБХАЗИЯ<br>Официальный сайт
МИНЗДРАВ РЕСПУБЛИКИ АБХАЗИЯ<br>Официальный сайт
МИНИСТЕРСТВО ИНОСТРАННЫХ ДЕЛ РЕСПУБЛИКИ АБХАЗИЯ<br>Официальный сайт
ГЕНЕРАЛЬНАЯ ПРОКУРАТУРА РЕСПУБЛИКИ АБХАЗИЯ<br>Официальный сайт
АКАДЕМИЯ НАУК АБХАЗИИ ГОСУДАРСТВЕННОЕ НАУЧНОЕ УЧРЕЖДЕНИЕ «СУХУМСКИЙ ФИЗИКО – ТЕХНИЧЕСКИЙ ИНСТИТУТ»
СУХУМ<br>Официальный сайт
МВД РЕСПУБЛИКИ АБХАЗИЯ<br>Официальный сайт
AUSURA.SU<br>Биржа труда
Яндекс.Метрика

Login to your account

Username *
Password *
Remember Me