Аҟәа. Лаҵарамза 7, 2024 шықәса. Аԥсныпресс. Аҳазалхратә ҭыԥ «Аҳаирбаӷәаза Шәача» аҿы Аԥсны аҳәынҭқарратә ҳазалхратә Еилакы аусзуҩцәа апассаџьырцәеи урҭ реидареи ргәаҭара амҩаԥгара азы аԥышәатә дыррақәа раиура азы рԥышәахысра мҩаԥысит. Абри азы адырра ҟанаҵоит Шәача ақалақь аҿы иҟоу Краснодартәи аҳазалхырҭа апресс-маҵзура.
Иарбоу аусмҩаԥгатә аиҿкааразы аԥсуа ган иҟанаҵаз ажәалагала ҳазҭоу ашықәс нанҳәамзазы имҩаԥысраны иҟоу аԥышәатә ԥыррақәа, иара убас 2025 шықәсазы иазԥхьагәаҭоу Аҟәатәи аҳаирбаӷәаза аартра иадҳәалоуп. Аԥснытәи аделегациа аилазаараҿы иҟан Аҳазалхратә шәҟәҭагалареи аҳазалхратә гәаҭареи рзы Аусбарҭа Хада аҳазалхратә ҭыԥ «Аҟәа» аиҳабы Ҭемыр Амҷба, иара убас Аусбарҭа аҟәшақәа рнапхгаҩцәеи аспециалистцәеи.
Аԥышәахысра амҩаԥгараан Аԥсны Аҳәынҭқарратә ҳазалхратә Еилакы амаҵурауааи аҳазалхратә ҭыԥ «Аҳаирбаӷәаза Шәача» аусзуҩцәеи аҳазалхратә гәаҭара амҩаԥгареи аҳаиртә транспорт ала еиҭаҵуа апассаџьырцәа, аидарақәа, анапылеидара рганахьала аҳазалхратә операциақәа рымҩаԥгареи ирыдҳәалоу азҵаарақәа жәпакы ирылацәажәеит. Аԥсуа ган аҳазалхратә ҭыԥ аусура атехнологиатә схема гәарҭеит, ҷыдала ахшыҩзышьҭра арҭеит аиҳарак ақәыӷәӷәара аныҟәоу аԥхынтәи аамҭахәҭазы аҳазалхратә гәаҭара иамоу аҷыдарақәа, иара убас апрограмматә хархәагақәа рфункционалтә лшарақәа.
Аҳазалхратә гәаҭара азона аҿы урыстәылатәи аҳазалхыҩцәа аԥснытәи рколлегацәа иддырбеит аҳаиртә транспорт ала иаауа реиԥш ицо апассаџьырцәа рзы асекторқәа,» ҩ-хырхарҭаны иҟоу акоридор» асистема ахархәара, ҳаамҭазтәи агәаҭаратә техникатә хархәагақәа, аушьҭра-гәаҭаратә ҭыԥ аҿы еиԥш аидарадкыларатә хәҭа аҿы ишьақәыргылоу арентгенеиқәыршәага. Абарҭқәа зегьы ирыбзоураны ирласны, дара апасаџьырцәа идеилмыркаакәа иааз аиадара аҭара аҟынӡа инаӡаанӡа изаку аилкаара алыршахоит. Аԥснытәи аҳазалхыҩцәа аинтерес рызцәынагеит аушьҭра-гәаҭаратә ҭыԥ аҿы ишьақәыргылаз аинформациатә ԥыррақәа, аилыркаагатә терминалқәа. Араҟа апассаџьырцәа аҳазалхратә закәанԥҵара иадҳәаланы ирызцәырҵуа азҵаарақәа зегьы рзы аҭак роур рылшоит.
Аԥснытәи аҳазалхыҩцәа аҳазалхратә ҭыԥ «Аҳаирбаӷәаза Шәача» анапхгараҭара изызҿлымҳаз азҵаарақәа зегьы рыла ианаамҭаз аинформациа раиура ахьалыршахаз азы иҭабуп ҳәа рарҳәеит. Анаҩс Аԥсны Аҳәынҭқарратә ҳазалхратә Еилакы аусзуҩцәа Урыстәылатәи Аҳазалхратә Академиа Ростовтәи аҿга абазала адистанциатә ҵаратә технологиақәа рхархәарала аҽазыҟаҵарақәа рахысра, иара убас агәаҭаратә комплексқәа рхархәарала аусура аԥышәа аизырҳара азԥхьагәаҭаны ирымоуп.
