Аҟәа. Лаҵарамза 6, 2024 шықәса. Аԥсныпресс. Ф.А.Искандер ихьӡ зху Аҳәынҭқарратә аурыс драматә театр аҿы Урыстәылатәи Афедерациа акультура Аминистрра афинанстә цхыраарала 2024 шықәсазы Иван Тургенев ироман «Абацәеи аԥацәеи» рыла еихьӡылоу аспектакль ықәыргылахоит. Абри азы ТАСС ахь адырра ҟаиҵеит атеатр адиректор Иракли Хьынҭәба.
«Ҭагалан азы ҳара ҳалагоит аурыс классика ала мҽхакы ҭбаала аусура – Иван Тургенев ироман «Абацәеи аԥацәеи» ала еихьӡылоу аспектакль ақәыргылара аҽазыҟаҵара. Арежиссиор - Егор Равински, Евгени Вахтангов ихьӡ зху Аҳәынҭқарратә академиатә театр аҟны иҟоу Борис Шьукин ихьӡ зху атеатралтә институти Урыстәылатәи атеатралтә ҟазара Аинститути-ГИТИС роушьҭымҭа.
Ари аспектакль азы иазоужьуп Урыстәылатәи Афедерациа акультура Аминистрра аҟынтәи афинансыркра. Аԥхьарбара мҩаԥгахароуп ҳазҭоу 2024-тәи ашықәс абҵарамза актәи азыбжаазы», -ҳәа иҳәеит Иракли Хьынҭәба.
Атеатр адиректор Хада иажәақәа рыла, Егор Равински аспектакльқәа ықәиргылахьеит иреиӷьу Москва ақалақь аҿы иҟоуи егьырҭ Урыстәыла иреиӷьу атеатрқәеи рҿы. Аԥсны иара раԥхьаӡа акәны аспектакль ықәиргылоит.
2023 шықәса инаркны Урыстәылатәи Афедерациа Ахада Идҵа анагӡара аҳасабала, Урыстәыла акультура Аминистрра аҳәаанырцә иҟоу аурыс театрқәа хықәкылатәи ацхыраара рыҭара апрограмма қәҿиарала инанагӡоит. Ари апрограмма аҳәаақәа ирҭагӡаны, 2023 шықәсазы Аԥсны иҟоу Аурыс драматә театр аурыс классика арҿиамҭақәа рыла аспектакльқәа рықәыргыларазы иахәҭоу аиқәыршәагақәа раахәаразы афинанстә цхыраара аҭан.
