Уи иазгәеиҭеит аиԥылара иалахәыз иԥкааны, ахсаала аҿы  иддырбан иарбан хыбрақәоу иргылахо, насгьы урҭ ахьыргылахо аҭыԥи.

Ауаа  аԥсшьаҩцәа рнырхаразы аҭыԥқәеи изеиԥшразаалак асасааирҭатә комплексқәеи  иарбоу атерриториа аҿы ишыргыламхо агәра ргартә алшара роуит.

«Ҳаиԥылара иалҵшәаны ҳаиқәшаҳаҭхеит ақыҭауаа рҟынтәи 5-6-ҩык аҳаирбаӷәаза аҵакыра аладатәи ахәҭа аҿы инхо атәылауаа ринтересқәа рыхьчареи  анаҩс аҳаирбаӷәаза аҿиара аперспективатә план алацәажәареи     рзы Аҳәынҭқарра Ахада Ихаҭыԥуаҩ Бадра Гәынба напхгара зиҭо акоординациатә штаб аусура ралагалара азы ҳаиқәшаҳаҭхеит», – ҳәа иҳәеит Џьансыхә Нанба.  

Аминистр даҽазныкгьы аԥсшьаҩцәа рнырхара азы аԥсшьарҭаҭыԥқәеи асасааирҭақәеи, мамзаргьы апартаментқәеи рыргылара хықәкыс иҟаҵаны аҳаирбаӷәаза аҵакыра арҭбаара иазку аинформациа ҵабыргӡам ҳәа даҽазныкгьы инаҵшьны иазгәеиҭеит.

«Ҳара уажәазы аҳаирбаӷәаза аҿиара азы аперспективтә план ҳалацәажәоит. Убри ахықәкы ала ҳара ақыҭауаа аилацәажәара рҽаладырхәырц ааԥхьара раҳҭеит», – ҳәа иҳәеит иара.

Ауаа рыхгара азы ателеграмм-каналқәа рҿы ицәырҵыз аинформациа Џьансыхә Нанба убасҵәҟьа имцыркуп ҳәа ахиҳәааит.

Аминистр аҿаҵаҩи аԥсуа гани аҳаирбаӷәаза аҵакыра арҭбаара азы еицырзеиԥшу  аплан рымоуп ҳәа иазгәеиҭеит.

«Уи иҟоу акомплекс ахәҭак аоперативтә хархәара аҳасабала Аԥсны атәылахьчара Аминистрреи Урыстәылатәи Афедерациа Арбџьармчқәа рыструктурақәеи  иахьрыҭоу ауп изыдҳәалоу. Жәларбжьаратәи анормақәа зегьы ирықәшәо ҳаамҭазтәи аҳаирбаӷәаза аргылара азы, иҟоу атерриториа  азхом, убри инамаданы аҩбатәи аетап ҳәа изышьҭоу аперспективтә ҿиара аплан алацәажәара мҩаԥысуеит. Ҳара ари азҵаара алацәажәара ақыҭа ахаҭарнакцәагьы ралархәра ихымԥадатәины иҳаԥхьаӡеит», – ҳәа инаҵшьны иазгәеиҭеит Џьансыхә Нанба. отметил Джансух Нанба.