Аҟәа. Мшаԥымза 19, 2024 шықәса. Аԥсныпресс. Мшаԥымза 26 – 28 рзы Москватәи аобласт аҿы иҟоу аҽыбӷаҟазара-спорттә клуб «Виват, Россия» аҿы имҩаԥысраны иҟоуп конкур азы Аԥсны Ахраҿа агаразы атурнир, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы асаит.
Азыҟаҵаҩ, уаанӡа аҩаӡара Гран-при иаҵанакуаз аҽыбӷаҟаза, иара убас аицлабра аиҿкааҩцәа иреиуоу Харлам Симониа, атурнир абар шьҭа хәынтәны имҩаԥысуеит, аконкуренттә еицлабра бзиа иазыԥшуп ҳәа инаҵшьны иазгәеиҭеит.
Аспортсменцәа 150 см. рҟынӡа амаршрутқәа рҿы еицлаблоит. Атурнир аԥхьахәтә фонд миллионк мааҭ рҟынӡа инаӡоит.
Атурнир Аԥсны Аҳәынҭқарра Ахада Аслан Бжьаниа, Аԥсны аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба, иара убас Урыстәылатәи Афедерациаҿы иҟоу Аԥсны Аҳәынҭқарра Аҷыдалкаатә зинмчы змоу ацҳаражәҳәаҩ Алхас Кәыҵниа иҟарҵаз адгыларала имҩаԥысуеит.
