Аҟәа. Мшаԥымза 25, 2024 шықәса. Аԥсныпресс. Урыстәылатәи атуристә фымцадәыӷба «Ласточка» Аҟәаҟа аԥышәатә реис нанагӡеит.
Ари афымцадәыӷба раԥхьаӡа акәны Аҟәаҟа иааит. Иҳаҩсыз ашықәс азы уи Шәачеи Гагреи ирыбжьан.
Ареспубликатә Униатартә Наплакы «Аԥснытәи аихамҩа» адиректор Хада Арсоу Ҷыҭанаа адәыӷба аараҟны аихамҩа аусзуҩцәа ирыӡбараны иҟоу ауадаҩрақәа аарԥшын ҳәа иазгәеиҭеит. «Ари раԥхьатәи Аҟәанӡа аԥышәатә реис ауп. Иҟоуп азгәаҭарақәак, аха урҭ зегьы рырҽеира алшоит. Гагранӡа ҳабзиан ҳааит, уи анахыс Аҟәанӡа иахьабалак аанҿасырҭақәеи атоннельқәеи рыҟны ҳаангылон, зегьы ҳрыхәаԥшит, зегь анаҳҵеит», -ҳәа иҳәеит иара.
Иара иажәақәа рыла, ихадоу уадаҩрас иҟоу –афымцадәыӷба «Ласточка» иаабац адәыӷбақәа иахьреиҳау ауп.
Арсоу Ҷыҭанаа ишазгәеиҭаз ала, иҟоу ауадаҩрақәа шыӡбахаз еиԥшҵәҟьа, адәыӷба даҽа знык ԥышәарк аҳасабала ибжьысуеит.
Аԥсны аԥыза-министр актәи ихаҭыԥуаҩ, аенергетикеи атранспорти рминистр Џьансыхә Нанба еизаз зегьы афымцадәыӷба «Ласточка» Аԥсны аҳҭнықалақь Аҟәа ахь раԥхьатәи ареис анагӡара рыдиныҳәалеит, уи «Ласточка» Аҟәанӡа аара аҵак ду шамоу инаҵшьны иазгәеиҭеит. Иара Урыстәыла аихамҩа аҟазацәа иҟоу ауадаҩрақәа иаарласны аҭыԥ ишықәырҵо иҳәеит.
