Аҟәа. Цәыббрамза 10, 2022 шықәса. Аԥсныпресс /Алеқсеи Шамба/. Иахьа Ф. Искандер ихьӡ зху Аурыс драматә театр аҿы Москва ақалақь 875-шықәса ахыҵра азгәаҭара инамаданы алитература-поетикатә хәылԥазы мҩаԥысит. Аусмҩаԥгатә мҩаԥысуан асцена ду аҿы. Иара активла рхы аладырхәит артисцәа реиԥш дара ахәаԥшцәагьы. Уи даара иаарту, ауаа еидызкыло атмосфера аԥнаҵеит, ари аурыс театр иаҷыда ҟазшаьаны иҟоуп жәаҳәарада.
Ахәылԥаз мҩаԥигон Рубен Депелиан. Уи апублика аҿаԥхьа иқәгылоз артистцәа рылаҳәара мҩаԥигон. Иара алитературатә рҿиамҭақәа рцыԥҵәахақәа рыԥхьарала ахәаԥшцәа иқәгылоз афырхацәа рсахьаркырратә нырра раиура армариеит.
Имҩаԥгахеит идуум, аха асахьаркыцратә ҵакы ала инагӡаны ихарҭәаахаз аспектакль, араҟа ажәеираалақәеи ашәақәеи доусы рхатәы ҭыԥ ааныркылон. Москва ақалақь иазкны иаԥҵаз еицырдыруа асоветаамҭа иатәу ашлиагерқәа рыдагьы, аномерқәа рыбжьара аԥсшьараамҭақәа раан даара иԥшӡоу С. Рахманинов ипрелиудиа ре-минор аҳәон. Уи, сара изласнырыз ала, ареволиуциа ҟалаанӡатәи Москвеи анаҩстәи аамҭазтәи Москвеи рыбжьара ашьҭрамадара аԥнаҵон.
Апоетикатә хәылԥазы рхы аладырхәит даара иԥшӡоу абжьы хаа зхоу Аԥсны зҽаԥсазтәыз артистка Наталиа Папасқьыр, згәы цҳафыруа, атемперамент ӷәӷәа змоу Емиль Петров, аҟыбаҩ бзиа змоу артистцәа Симона Спафопуло, Мадлена Барцыц, Марина Скворцова, Осман Абыхәба, Лоида Тыркба, Руслан Жьиба. Жәаҳәарада, иазгәоумҭар залшом асцена аҿы имҩаԥысуаз зегьы даара аҟазаратә гьама змоу атеатр адиректор Хада Иракли Хьынҭәба инапхгарала ишымҩаԥысуаз.
Агәра ганы сыҟоуп ас еиԥш иҟоу амузыка-поетикатә формат анаҩгсьы изныкымкәа ишеиҿкаахало.
Ахәылԥаз аиҿкаара рхы аладырхәит Аҟәа иҟоу Москаватәи Акультуратә Усуратә Ҩны «Москва Аҩны», Урыстәыла аҳҭнықалақь анапхгара афинанстә цхыраарала иаԥҵоу Москва жәларбжьаратәии адәныҟаекономикатәии аимадарақәа рдепортаменти аитәылауаа Москватәи Рыҩни.
